తమిళనాడు సేలం జిల్లా, అత్తూరులో దారుణ ఘటన జరిగింది. బాబాయ్ని చూసి నేర్చుకోమని చెప్పినందుకు.. ఓ బాలుడు.. తన నానమ్మ, తాతయ్యలను చంపేశాడు.
ఏం జరిగిందంటే..?
సేలం జిల్లా అత్తూరులో కట్టురాజా(75), కసియమ్మల్(60) దంపతులు నివాసముంటున్నారు. వారికి దేసింగురాజా, మణి, కుమార్ అనే ముగ్గురు కొడుకులు ఉన్నారు. నిందితుడు.. కుమార్ సంతానంలో ఒకడు.
అయితే.. బాబాయ్ దేసింగురాజాను చూసి నేర్చుకుని జీవితంలో ఎదగమని నానమ్మ, తాతయ్య.. బాలుడికి సూచించారు. ఈ మాటతో ఆగ్రహం చెందిన బాలుడు.. నానమ్మ, తాతయ్యను చంపేయాలని నిశ్చయించుకున్నాడు. పథకం ప్రకారం.. మంగళవారం తెల్లవారుజామున.. బయటి నుంచి గొళ్లెంపెట్టి.. ఆ దంపతులు ఉంటున్న గుడిసెకు నిప్పంటించాడు. దీంతో కాలిన గాయాలతో వృద్ధ దంపతులు మృతిచెందారు.
ఈ ఘటనపై పోలీసులు కేసు నమోదు చేశారు. పరారీలో ఉన్న నిందితుడిని పట్టుకునేందుకు ప్రయత్నిస్తున్నారు.
ఇదీ చదవండి: పడవ బోల్తా పడి నలుగురు మృతి- ఏడుగురు గల్లంతు
