బిహార్లో ముజఫర్పుర్ జిల్లాలో హృదయ విదారక ఘటన జరిగింది. ఓ మహిళ తనకు పిల్లలు లేరనే అసూయతో తన వదిన కుమారుడు(మేనల్లుడిని) హతమార్చింది. అనంతరం శవాన్ని బెడ్రూంలోనే పూడ్చి.. చెడు వాసన రాకుండా అగరబత్తులు వెలిగించి మెనేజ్ చేసింది.
పోలీసులు తెలిపిన వివరాల ప్రకారం.. విభాదేవి అనే మహిళ బొచ్చా పోలీస్ స్టేషన్ పరిధిలోని బాల్తిపుర్ గ్రామంలో నివసిస్తోంది. ఆమెకు పిల్లలు లేరు. పైగా తరచూ భర్తతో గొడవలు పడుతూ ఉండేది. అయితే తన వదిన.. పిల్లలతో సంతోషంగా ఉండడం చూసి విభాదేవి అసూయతో రగిలిపోయింది. దీంతో ఇంట్లో ఎవరూ లేని సమయంలో మూడున్నరేళ్ల తన వదిన కుమారుడిని చంపేసింది. అనంతరం తన బెడ్రూంలో గొయ్యి తవ్వి బాలుడి శవం పాతిపెట్టింది. మట్టి కప్పి.. చెడు వాసన రాకుండా అగరబత్తులు వెలిగించి మేనేజ్ చేసింది. ఈ క్రమంలో పనులకు వెళ్లి తిరిగి వచ్చిన బాలుడి కుటుంబ సభ్యులు 'పిల్లాడు ఎక్కడా' అని విభాదేవిని అడగగా.. తనకు తెలియదంటూ బుకాయించింది. ఈ విషయం తెలిసిన గ్రామస్థులు బాలుడి కోసం ఊరంతా గాలించారు.
అనంతరం ఆ గ్రామస్థులు.. విభాదేవి ఇంట్లో మట్టి తవ్వి ఉండటం గమనించి.. అనుమానంతో ఆమెను ప్రశ్నించారు. అయితే ఆమె స్థానికులను తప్పుదోవ ప్టటించేందుకు ప్రయత్నాలు చేసింది. ఏమీ లేదని.. ఎలుకల వల్ల అలా అయిందని సమాధానమిచ్చింది.ఆమె చెప్పిన మాటలకు పొంతన కుదరకపోవడం వల్ల.. అనుమానం వచ్చి గోతి ఉన్న చోట తవ్వగా విస్తుపోయారు. చిన్నారి మృతదేహం.. ఇసుకలో కూరుకుపోయి కనిపించింది.
సమాచారం అందుకున్న పోలీసులు ఘటనా స్థలానికి చేరుకుని.. నిందితురాలిని అరెస్టు చేశారు. తదుపరి దర్యాప్తునకు బాలుడి మృతదేహాన్ని పోస్టుమార్టం నిమిత్తం ఆస్పత్రికి తరలించారు. కాగా, తనకున్న ముగ్గురు సంతానంలో ఒకడే కొడుకని కన్నీరు మున్నీరుగా విలపించాడు చనిపోయిన బాలుడి తండ్రి వినయ్ కుమార్.
ఇవీ చదవండి : రెండు రాష్ట్రాల సరిహద్దుల్లో హింస.. ఆరుగురు మృతి
