ఉత్తరాఖండ్లో 11మంది ఐఎఫ్ఎస్ అధికారులకు కరోనా పాజిటివ్గా తేలింది. దెహ్రాదూన్లోని ఎఫ్ఆర్ఐ(ఫారెస్ట్ రీసెర్చ్ ఇన్స్టిట్యూట్)లో శిక్షణ కోసం వచ్చిన వీరు కరోనా బారినపడ్డారు(fri dehradun covid news). ఈ వ్యవహారం రాష్ట్ర ఆరోగ్య విభాగంలో కలకలం రేపింది.
ఈ 11మంది లఖ్నవూ నుంచి దిల్లీ మీదుగా దెహ్రాదూన్ వచ్చారు. దిల్లీలో వారికి కొవిడ్ పరీక్షలు నిర్వహించారు. దెహ్రాదూన్ ఎఫ్ఆర్ఐకి చేరుకున్న అనంతరం రిపోర్టులు వచ్చాయి. వారికి కరోనా నిర్ధరణ అయ్యింది.
11మంది నివాసమున్న టిబెటన్ కాలనీ, ఎఫ్ఆర్ఐలోని హాస్టల్ను కంటోన్మెంట్ జోన్గా ప్రకటించారు అధికారులు. అయితే ఈ 11మందిలో ఓ సీనియర్ అధికారి.. తనకు కొవిడ్ పాజిటివ్ అని తేలిన వెంటనే అక్కడి నుంచి ఎవరికీ చెప్పకుండా వెళ్లిపోయారు. ఈ విషయాన్ని దెహ్రాదూన్ జిల్లా మెజిస్ట్రేట్ ఆర్ రాజేశ్ కుమార్.. పోలీసుల దృష్టికి తీసుకెళ్లారు.
ఎఫ్ఆర్ఐలో కరోనా కేసులు వెలుగుచూడటం ఇది కొత్తేమీ కాదు. 2020 మార్చిలోనే కొందరు అధికారులకు కొవిడ్ సోకింది. దీంతో ఆ ప్రాంతం మొత్తాన్ని మూసివేశారు.
టీకా తీసుకున్నా...
కర్ణాటక ధార్వాడ్లోని ఎస్డీఎమ్ వైద్య కళాశాలలో 66మంది విద్యార్థులు కొవిడ్ బారినపడ్డారు(sdm college covid cases). తొలుత.. కళాశాలలోని ఓ కార్యక్రమంలో పాల్గొన్న 40మందికి పాజిటివ్ అని తేలింది. అనంతరం మిగిలిన వారికీ వైరస్ సోకింది. అయితే వీరందరూ పూర్తిగా టీకాలు వేసుకున్న వారే కావడం గమనార్హం. వీరెవరికీ కరోనా లక్షణాలు లేవు.
అప్రమత్తమైన అధికారులు.. కళాశాలలోని విద్యార్థులందరికీ కొవిడ్ పరీక్ష నిర్వహించారు(karnataka covid news). 100కుపైగా మంది రిపోర్టులు రావాల్సి ఉంది.
జిల్లా ఆరోగ్య అధికారులు కళాశాలను సందర్శించారు. హాస్టల్ సహా మొత్తం ప్రాంతాన్ని శానిటైజ్ చేయాలని ఆదేశాలిచ్చారు.
ఇదీ చూడండి:- 539 రోజుల కనిష్ఠానికి కరోనా యాక్టివ్ కేసులు
