Skin Glow Tips At Home : వాతావరణం ఎలా ఉన్నా సరే.. కొందరి చేతులు, కాళ్లు పొడిబారి, పగిలి ఇబ్బంది పెడుతుంటాయి. ఈ సమస్యకు కారణమేదైనా చిన్న చిన్న జాగ్రత్తలు తీసుకుంటే.. పాదాలు, అరిచేతులను కోమలంగా మార్చుకోవచ్చు.
- కాళ్లు, చేతులపై మృతకణాలు పేరుకున్నప్పుడు కూడా చర్మం పొడిబారి నిర్జీవంగా కనిపిస్తుంది. మీ పరిస్థితి కూడా ఇదే అయితే.. తరచూ మృతకణాలు తొలగించేందుకు ప్రయత్నించండి. దానికి సంబంధించిన కొన్ని పూతలు తయారుచేసి వేసుకుంటే ఫలితం కనిపిస్తుంది. చర్మం కూడా ఆరోగ్యంగా మారుతుంది.
- రాత్రి పడుకునే ముందు కొబ్బరినూనెను పాదాలకు రాసుకుని మర్దన చేయాలి. ఆ తర్వాత సాక్సులు వేసుకోవాలి. ఇలా ప్రతిరోజూ చేయడం వల్ల పొడిబారిన చర్మం కాస్తా చాలా తక్కువ వ్యవధిలోనే మృదువుగా మారుతుంది.
- గోరువెచ్చని నీటిలో కొద్దిగా వంటసోడా, ఏదైనా కొన్ని చుక్కల అత్యవసర నూనెను వేయాలి. కుదిరితే కొన్ని గులాబీ రేకలూ వేసుకోవచ్చు. ఇందులో చేతులు లేదా కాళ్లను ఓ పదినిమిషాలు ఉంచి తీసేయాలి. ఇలా చేయడం వల్ల కాళ్లు, చేతుల చర్మం మృదువుగా మారుతుంది.
- గోరువెచ్చని నీటిలో కొద్దిగా ఎప్సమ్‌ సాల్ట్‌ వేసుకుని అందులో కాళ్లు లేదా చేతుల్ని ఉంచాలి. పదినిమిషాల తర్వాత బయటికి తీసి కడిగేసుకోవాలి. ఇలా చేయడం వల్ల ఆ భాగాలకు రక్తప్రసరణ కూడా సజావుగా అందుతుంది.
- సగం నిమ్మచెక్కను తీసుకుని చక్కెరలో ముంచి తీయాలి. దీన్ని కాళ్లు, చేతులకు రాసుకోవాలి. అలాగే రాత్రి నిద్రించే ముందు ఆలివ్‌నూనెను రాసుకుని, మర్దన చేసుకున్నా సరిపోతుంది. ఇది చర్మాన్ని ఎంతో కోమలంగా ఉంచుతుంది.
ఇవీ చదవండి: పక్షవాతం వస్తే వెంటనే ఏం చేయాలో తెలుసా?
మీ పెంపుడు కుక్కకు వ్యాక్సిన్ వేయించారా?.. లేకుంటే ఇబ్బందే!
