Hair Growth Tips : జుట్టు ఒత్తుగా, దృఢంగా పెరగాలా? ఈ పనులు అస్సలు చేయకండి
Hair Growth Tips In Telugu : చాలా మంది జుట్టు రాలే సమస్యతో బాధపడుతూ ఉంటారు. ఎన్ని షాంపూలు, కండీషనర్లు వాడినా.. ఫలితం కనబడదు. మరి అలాంటి వారు.. తమ జుట్టు వేగంగా, బలంగా, ఒత్తుగా పెరిగేందుకు.. ఏం చేయాలో ఇప్పుడు తెలుసుకుందాం!
Published : August 20, 2023 at 7:54 AM IST
Hair Growth Tips : మనిషికి అందాన్ని ఇచ్చేవి శిరోజాలు. అందుకే ప్రతి ఒక్కరూ జుట్టును అందంగా ఉండేలా చూసుకుంటారు. ఒక వేళ జుత్తు రాలుతూ ఉంటే.. బాగా ఆందోళనకు గురవుతారు. జుట్టు రాలే సమస్యను నివారించేందుకు.. వివిధ రకాల అశాస్త్రీయమైన ఉత్పత్తులను ఉపయోగిస్తారు. అయితే వీటి వల్ల జుట్టుకు ఎలాంటి ఉపయోగం ఉండదు. పైగా సైడ్ ఎఫెక్ట్స్ వచ్చే అవకాశం కూడా ఉంటుంది. అందుకే జుట్టు పొడవుగా, ఒత్తుగా పెరగాలంటే కొన్ని తప్పులు చేయడం ఆపేయాలి. అవేంటో ఇప్పుడు చూద్దాం..
Hair Loss Causes : అందం అంటే చర్మ సౌందర్యం మాత్రమే కాదు.. శిరోజాల సంరక్షణ కూడా. అయితే ఈ రోజుల్లో వాతావరణ కాలుష్యంతో పాటు మనం చేసే కొన్ని పొరపాట్లు జుట్టు ఆరోగ్యాన్ని దెబ్బతీస్తున్నాయి. ఫలితంగా కేశాలు ఎక్కువగా రాలిపోవడం, చిన్న వయస్సులోనే తెల్ల వెంట్రుకలు రావడం లాంటి సమస్యలు తలెత్తుతున్నాయి. కొంత మందికి జుట్టు బలంగా ఉండదు. ఎప్పుడూ ఏదో ఒక జుట్టు సమస్యతో బాధపడుతూ ఉంటారు. అందుకే ఆరోగ్యకరమైన జుట్టు కోసం ఏమేమి చేయాలి? ఏమేమి చేయకూడదు? అనే విషయాలను ఇప్పుడు తెలుసుకుందాం.
షాంపూలు అతిగా వాడవద్దు!
Shampoo For Hair Growth : హెయిర్ బ్రష్ లేదా దువ్వెన సరిగ్గా వాడటం జుట్టుకు మంచిది. అలాగని ప్రతి గంటకు ఓసారి జుట్టును దువ్వుకోవద్దు. ఇది జుట్టును మరింత దెబ్బతీస్తుంది. తరచూ షాంపూ చేయడం వల్ల కూడా జుట్టుకు నష్టం వాటిల్లుతుంది. షాంపూలో మీ స్కల్ప్లోని సహజ నూనెలను తొలగించే అనేక రసాయనాలు ఉంటాయి. అలాగే ఎక్కువగా షాంపూ చేయడం వల్ల జుట్టు రాలిపోతుంది. 'జుట్టు విషయంలో ఎలాంటి కేర్ తీసుకోవాలనేది చాలా మందికి అవగాహన ఉండదు. చర్మ సౌందర్యానికి తీసుకున్నట్లే జుట్టుకూ చాలా జాగ్రత్తలు తీసుకోవాలి. డ్రై హెయిర్ ఉన్నవారు కండీషనర్స్ ఎక్కువగా వాడాలి. వీళ్లు వారానికోసారి హెయిర్ వాష్ చేసుకుంటే సరిపోతుంది. ఆయిలీ హెయిర్ ఉన్నవారు తరచూ తలస్నానం చేయాలి. డ్రై హెయిర్ ఉన్నవారు వేడినీటితో కాకుండా మామూలు నీళ్లతో తలస్నానం చేయాలి. జుట్టు బలంగా, దృఢంగా మారాలంటే దానికి ఐరన్, కాపర్, జింక్, బీ-కాంప్లెక్స్, విటమిన్-డి లాంటి పోషకాలను అందించాలి' అని ప్రముఖ డెర్మటాలజిస్ట్ డాక్టర్ చంద్రవతి సూచిస్తున్నారు.
నీళ్లు ఎక్కువగా తాగాలి
Water For Hair Growth : శిరోజాల సంరక్షణకు ఆరోగ్యకరమైన జీవనశైలి తప్పనిసరి. ఇందులో భాగంగా మంచినీళ్లు ఎక్కువగా తీసుకోవాలి. దీని వల్ల శరీరంలో నీటిస్థాయిలు పెరగడమే కాకుండా చర్మంలోని మలినాలు, వ్యర్థాలు బయటకు వెళ్లిపోతాయి. ఫలితంగా కుదుళ్ల ఆరోగ్యం మెరుగుపడుతుంది. ఇది జుట్టు ఎదుగుదల, దృఢత్వానికి మేలు చేస్తుంది. విటమిన్ల లోపం జుట్టుపై ప్రతికూల ప్రభావం చూపుతుంది.
ఆరోగ్యకరమైన ఆహారం తీసుకోవాలి!
Hair Growth Foods : విటమిన్ల లోపం వల్ల జుట్టుపై పడే ప్రతికూల ప్రభావాన్ని నిరోధించాలంటే ప్రొటీన్లు, బయోటిన్ ఉండే పదార్థాలను ఎక్కువగా తీసుకోవాలి. ప్రొటీన్లు, బయోటిన్ అధికంగా లభించే గుడ్లు, ఆకుకూరలు, పెరుగు మొదలైన వాటిని ఆహారంలో చేర్చుకోవాలి. మరీ అత్యవసరమైతే నిపుణుల సలహా మేరకు విటమిన్ సప్లిమెంట్స్, బయోటిన్, ఒమేగా-3 ఫిష్ ఆయిల్ ట్యాబ్లెట్స్ వాడాలి. ఇందులోని పోషకాలు జుట్టు ఆరోగ్యంగా ఎదిగేందుకు సహకరిస్తాయి. 'జుట్టు సంరక్షణకు ప్రొటీన్లు చాలా ముఖ్యం. న్యూట్రిషన్ సప్లిమెంటేషన్ చేయడం మూలంగా జుట్టు వేగంగా పెరుగుతుంది. దీని ద్వారా జుట్టు బలంగా, దృఢంగా తయారవుతుంది. సీజనల్గా కూడా హెయిర్ గ్రోత్లో తేడా వస్తుంది. ఒక్కో సీజన్లో జుట్టు వేగంగా పెరుగుతుంది.. ఒక్కో సీజన్లో గ్రోత్ తక్కువగా ఉంటుంది. ఇవి కాకుండా శరీరంలో హార్మోన్ల సమస్యలు ఏమైనా ఉన్నాయేమో చూసుకోవాలి. రెగ్యులర్ పీరియడ్స్, థైరాయిడ్ ప్రాబ్లమ్స్ ఉన్నా హెయిర్ గ్రోత్ ఉండదు' అని డాక్టర్ చంద్రవతి చెబుతున్నారు.
హెయిర్ డ్రయ్యర్స్ వద్దు!
Hair Dryer Disadvantages : తలస్నానం తర్వాత జుట్టును సహజంగానే ఆరనివ్వాలి. అలా కాకుండా వేడి ఎక్కువ ఉత్పత్తి చేసే హెయిర్ డ్రయ్యర్స్ వాడితే కుదుళ్లలో దురద, అలర్జీలు, జుట్టు చివర్లో చిక్కడం వంటి సమస్యలు తలెత్తుతాయి. గోరువెచ్చటి నీటిని తలస్నానానికి వినియోగించాలి. అలాగే గాఢత తక్కువగా ఉండే షాంపూలు మేలు చేస్తాయి. తలస్నానం చేసిన వెంటనే జుట్టును దువ్వకూడదు. అలా చేస్తే వెంట్రుకలు తెగిపోవడం, ఎక్కువ జుట్టు రాలిపోవడం లాంటి సమస్యలు వస్తాయి.
