Bridge Collapse: శ్రీకాకుళం జిల్లాలోని వంతెనలకు అధికారుల నిర్వహణ లోపం శాపంగా మారింది. గ్రానైట్‌ లోడుతో వెళ్తున్న లారీ బరువు తట్టుకోలేక ఇటీవలే ఇచ్ఛాపురం నుంచి పలాస వెళ్లే ప్రధాన రహదారిపై ఉన్న వందేళ్ల నాటి బహుదా వంతెన కుప్పకూలిపోయింది. ఆ సమయంలో వంతెనపైగానీ, చుట్టుపక్కల ప్రజలు లేకపోవడంతో పెను ప్రమాదం తప్పింది. నిర్వహణ కొరవడటంతో వంతెన శిథిలావస్థకు చేరిందని స్థానికులు చెబుతున్నారు. ప్రస్తుతం జిల్లాలో చాలా చోట్ల.. ప్రధాన రహదారులపై ఉన్న వంతెనలు కూలిపోయే పరిస్థితుల్లో ఉండటం.. మరింత భయాందోళనకు గురిచేస్తోంది.

ఇచ్ఛాపురం మండలం డొంకూరు వద్ద 22 ఏళ్ల క్రితం నిర్మించిన ఉప్పుటేరు వంతెన కూడా శిథిలావస్థకు చేరింది. వంతెనకు ఇరువైపులా సుమారు 14 మత్స్యకార గ్రామాల ప్రజలు నిత్యం దీనిపై నుంచే రాకపోకలు సాగిస్తుంటారు. ఏళ్లుగా ప్రభుత్వ అధికారుల నిర్వహణ సరిగ్గా లేక.. వంతెన శిథిలావస్థకు చేరింది. స్తంభాలు ఎప్పుడు కుప్పకూలతాయోననే భయం వ్యక్తమవుతోంది.

పాతపట్నం నియోజకవర్గంలోని అలికాం-బత్తిలి మార్గంలో బ్రిటిష్‌ కాలంనాటి వంతెన పడిపోయే స్థితిలో ఉంది. నదీ ప్రవాహానికి కోతకు గురైన గోడల నుంచి పెచ్చులూడిపడుతున్నాయి. వజ్రపుకొత్తూరు మండలం కుంకులూరు-డెప్పూరు రహదారిపై 5 దశాబ్దాల క్రితం నిర్మించిన రాకాసిగడ్డ వంతెన కూడా శిథిలావస్థకు చేరింది. 20 గ్రామాల ప్రజలు రాకపోకలు సాగించే ప్రధాన వారధికి ఈ దుస్థితి పట్టింది. ఇలాంటి అనేక వంతెనలు జిల్లాలో శిథిలావస్థకు చేరినా.. వాటి మరమ్మతులపై దృష్టి పెట్టకుండా.. ప్రభుత్వం, అధికారులు ప్రాణాలతో చెలగాటం ఆడుతున్నారంటూ.. శ్రీకాకుళం జిల్లా ప్రజలు ఆగ్రహం వ్యక్తం చేస్తున్నారు.

"ఆనాటి సీఎం చంద్రబాబు నాయుడు 13వ విడత జన్మభూమి కార్యక్రమానికి ఇరవై సంవత్సరాల క్రితం మా గ్రామానికి విచ్చేశారు. ఆ సమయంలో మా గ్రామస్థులమంతా చంద్రబాబుకు మొరపెట్టుకోగా.. మాకు ఇక్కడ బ్రిడ్జ్ మంజూరు చేశారు. బ్రిడ్జి నిర్మించి చాలా ఏళ్లు కావటం వల్ల ఇప్పుడు ఇది శిథిలావస్థకు చేరుకుంది. ఇచ్ఛాపురం వెళ్లాలంటే ఈ వంతెనను దాటే మేము వెళ్లాలి. గ్రామంలోకి అంబులెన్స్, ఫైర్ ఇంజన్ వంటి అత్యవసర సర్వీసులు కావాలంటే ఈ వంతెనపైనే రాకపోకలు సాగించాలి. కావున శిథిలావస్థకు చేరుకున్న ఈ బ్రిడ్జికి మరమ్మతులు చేయాలని కోరుకుంటున్నాము." - స్థానికుడు

"ఈ వంతెనను నిర్మించి చాలా ఏళ్లు కావంటంతో ప్రస్తుతం శిథిలావస్థకు చేరుకుంది. మత్స్యకారులు కూడా.. చేపల వేటకు వెళ్లేటప్పుడు ఈ వంతెనపైనే రాకపోకలు సాగించాలి. ఈ బ్రిడ్జిపై మత్స్య సంపదతో వెళ్తే.. ఎప్పుడు వంతెన కింద పడిపోతారో తెలియని పరిస్థితి ఉంది. ఈ వంతెనకు సైడ్ వాల్స్ కూడా లేవు. ప్రభుత్వం దీనిపై జోక్యం చేసుకుని వంతెన మరమ్మతు పనులు నిర్వహించాలని కోరుకుంటున్నాము." - స్థానికుడు

శ్రీకాకుళంలో శిథిలావస్థకు చేరుకున్న వంతెనలు

ఇవీ చదవండి:

• వంశధార నదిపై కూలిన పురాతన వంతెన
• కొత్త పార్లమెంట్​ భవనాన్ని ప్రారంభించిన మోదీ.. లోక్​సభ స్పీకర్​ కుర్చీ వద్ద 'సెంగోల్'​ ప్రతిష్ఠ
• 'జురాసిక్‌ పార్క్‌' మూవీని రిజెక్ట్​ చేసిన శ్రీదేవి.. ఎందుకంటే?