All Party Leaders Support for Agrigold Victims: అగ్రిగోల్డ్ బాధితులను ఆదుకోవాలని విజయవాడలో చేస్తున్న నిరసనలకు అఖిలపక్ష నాయకులు, ప్రజా సంఘాల నాయకులు సంఘీభావం తెలిపారు. ఈ సందర్భంగా అఖిల పార్టీ, ప్రజా సంఘాల నాయకులు మాట్లాడుతూ.. అగ్రిగోల్డ్ బాధితులను ఆదుకుంటామని జగన్ ఇచ్చిన మాట తప్పారు, మడమ తిప్పారని మండిపడ్డారు. బాధితులు సుదీర్ఘ పోరాటం చేసినా ఇప్పటి వరకూ సమస్యను పరిష్కారం చేయలేదంటే సిగ్గు చేటన్నారు. అగ్రిగోల్డ్ బాధితులను జగన్ ప్రభుత్వం మరోసారి మోసం చేసిందన్నారు.

"వైఎస్సార్ కాంగ్రెస్ పార్టీ వాళ్లు.. జగన్ మోహన్ రెడ్డి.. మాట తప్పడు, మడమ తిప్పడు అని పదేపదే చెప్తున్నారు. కానీ అగ్రిగోల్డ్ బాధితుల విషయంలో జగన్ కచ్చితంగా మాట తప్పినట్లే.. ఎందుకంటే ఇవాళ వాళ్ల ఆస్తులు ఉన్నాయి. ఆ ఆస్తులు అమ్మి అయినా సరే ఇచ్చి ఉండచ్చు. దానిపై చిత్తశుద్ధితో ప్రయత్నం చేయట్లేదు. ఏమంటే కోర్టులో వివాదం ఉందని తప్పించుకుంటున్నారు. నీవు ఎవరికైతే మాట ఇచ్చావో.. వారందరికీ మాట తప్పావు. మోసం చేస్తున్నావు. అగ్రిగోల్డ్ బాధితుల సమస్య సుమారు అయిదారు సంవత్సరాలుగా ఉంది.

ఇది ప్రభుత్వానికి సిగ్గు చేటు. తక్షణమే మూడు వేల కోట్లు ఈ బడ్జెట్ సమావేశాలలోపు కేటాయించి వారి సమస్యను పరిష్కరించాలి. ఆ రకంగా పరిష్కారం చేయలేకపోతే.. కచ్చితంగా వీధి పోరాటాలకు సమాయత్తం అవ్వాలి. కమ్యూనిస్ట్ పార్టీ తరపున మేము మద్దతు ఇవ్వడమే కాదు.. రాష్ట్రంలో ఉన్న ప్రతిపక్ష పార్టీలు, ప్రజా సంఘాలు అందరినీ కూడా కూడగట్టి అగ్రిగోల్డ్ బాధితుల అసోసియేషన్ తరపున చేస్తున్న పోరాటానికి పూర్తి స్థాయిలో అండగా ఉంటామని ప్రభుత్వాన్ని హెచ్చరిస్తున్నాం". - కె.రామకృష్ణ, సీపీఐ రాష్ట్ర కార్యదర్శి

"ఈ నాలుగు సంవత్సరాల కాలంలో అగ్రిగోల్డ్ బాధితులకు చెప్పింది ఏది అమలు పరిచారో శ్వేత పత్రం విడుదల చేయాలని మేము డిమాండ్ చేస్తున్నాం. అలా చేయకపోతే జూన్ నుంచి రాబోయే ఎన్నికల వరకూ రాష్ట్ర ప్రభుత్వంతో తాడోపేడో తేల్చుకొని.. బాధితులలో మరొకరి ప్రాణం పోకుండా కాపాడుకుంటాం". - ముప్పాళ్ల నాగేశ్వరరావు, అగ్రిగోల్డ్ బాధితుల సంఘం గౌరవ అధ్యక్షుడు

"వారం రోజులలోపు అందరికీ 20 వేల లోపు సెటిల్ చేస్తామని.. ఆర్నెళ్లలోపు మొత్తం సెటిల్ చేస్తామని చెప్పారు. కానీ ఈ రోజు ఆ మాటకు శఠగోపం పెట్టి.. ఆ యజమానులతోనే నేడు కుమ్మక్కై అగ్రిగోల్డ్ బాధితులను వీధులపాలు చేశారు". - వి.శ్రీనివాసరావు, సీపీఎం రాష్ట్ర కార్యదర్శి

అధికారంలోకి వచ్చిన ఏడాదిలో సమస్య పరిష్కరిస్తామని మేనిఫెస్టోలో చెప్పారన్నారు. మానిఫెస్టోను బైబిల్, ఖురాన్ అని చెప్పే జగన్మోహన్ రెడ్డి దాన్ని చిత్తు కాగితం చేశారన్నారు. ప్రవేశపెట్టిన రాష్ట్ర బడ్జెట్​లో 1 శాతం నిధులు కేటాయించలేరా అని ప్రశ్నించారు. ఇప్పటికైనా బడ్జెట్​లో నిధులు కేటాయించాలన్నారు. లేదంటే అన్ని పార్టీలను కలుపుకుని బాధితులకు అండగా వీధి పోరాటాలకు సైతం సిద్ధమవుతామన్నారు. ఇప్పటికే విద్యావంతులు ఎమ్మెల్సీ ఎన్నికల్లో బుద్ధి చెప్పారు, ఇప్పటికైనా బడ్జెట్​లో నిధులు కేటాయించి బాధితులను ఆదుకోవాలన్నారు.

ఇవీ చదవండి:

• దొరకని ఆచూకీ.. అజ్ఞాతంలోనే సంకల్పసిద్ధి నిందితుడు కిరణ్​
• ఆస్కార్ స్టేజ్​పై భారత మహిళా విజేతకు చేదు అనుభవం
• Ipl 2023: అంబానీకి షాక్​.. రూ.13.5 కోట్లు లాస్​.. మరి దిల్లీ ఓనర్​కు ఎంతంటే?