ఊరట విజయం కోసం టీమ్​ఇండియా ఎదురుచూపులు.. నేడు అఫ్గానిస్థాన్​తో ఢీ

author img

By

Published : Sep 8, 2022, 6:38 AM IST

india match with afganistan in asia cup 2022

టైటిల్​ ఫేవరెట్​గా ఆసియా కప్ టోర్నీలోకి అడుగుపెట్టిన టీమ్​ఇండియా.. అనూహ్యంగా ఫైనల్​కు దూరమైంది. తన చివర మ్యాచ్​లో నేడు అఫ్గానిస్థాన్​తో భారత్​ క్రికెట్ జట్టు తలపడనుంది. ఫైనల్‌ దారులు ఎలాగూ మూసుకుపోయిన నేపథ్యంలో.. కనీసం లోపాలన్నా సరిదిద్దుకుని జట్టుగా గాడిన పడాలన్నది టీమ్‌ఇండియా ఉద్దేశం. అఫ్గానిస్థాన్‌ను తక్కువ అంచనా వేస్తే అది పొరపాటే అవుతుంది.

Ind Vs Afg Match Asia Cup 2022: స్టార్లకు కొదువలేకున్నా వరుస పరాజయాలు చవిచూసింది. టైటిల్‌ ఫేవరెట్‌గా టోర్నీలో అడుగుపెట్టినా ఫైనల్‌కు దూరమైంది. ఈ నేపథ్యంలో భారత్‌ ఇప్పుడు ఊరట విజయం కోసం చూస్తోంది. ఆసియాకప్‌లో తన చివరి మ్యాచ్‌లో నేడు అఫ్గానిస్థాన్‌ను ఢీకొట్టనుంది. ఫైనల్‌ దారులు ఎలాగూ మూసుకుపోయిన నేపథ్యంలో.. కనీసం లోపాలన్నా సరిదిద్దుకుని జట్టుగా గాడిన పడాలన్నది టీమ్‌ఇండియా ఉద్దేశం. అఫ్గానిస్థాన్‌ను తక్కువ అంచనా వేస్తే అది పొరపాటే అవుతుంది.

ఫైనల్‌కు దూరమై అభిమానులను తీవ్రంగా నిరాశపరిచిన టీమ్‌ఇండియా ఆసియాకప్‌లో తన ఆఖరి పోరాటానికి సిద్ధమైంది. గురువారం జరిగే మ్యాచ్‌లో అఫ్గానిస్థాన్‌ను ఢీకొంటుంది. వరుసగా పాకిస్థాన్‌, శ్రీలంకల చేతుల్లో ఓడి నిరాశ చెందిన రోహిత్‌సేన ఎలా పుంజుకుంటుందో చూడాలి. అఫ్గానిస్థాన్‌తో పోరు తేలికైతే కాదు. గత రెండు మ్యాచ్‌ల్లో టీమ్‌ఇండియా సామర్థ్యం మేరకు ఆడలేకపోయిందనడంలో సందేహం లేదు. సరైన వనరులు లేకపోవడం, జట్టు ఎంపికలో లోపాలు కూడా జట్టుకు ప్రతికూలమయ్యాయి. కెప్టెన్‌ రోహిత్‌, కోచ్‌ ద్రవిడ్‌లు బ్యాటింగ్‌ ఆర్డర్‌లో మార్పులు చేసి, ప్రత్యామ్నాయాలను పరిశీలించడానికి సిద్ధంగా ఉన్నట్లు ఇప్పటివరకైతే అనిపించలేదు. పంత్‌ లేదా దీపక్‌ హుడా స్థానంలో దినేశ్‌ కార్తీక్‌ను తిరిగి జట్టులో తీసుకుంటారా లేదా అన్నది ఆసక్తికరం. హుడా గత మ్యాచ్‌లో ఏడో స్థానంలో బ్యాటింగ్‌కు దిగాడు.

అతడికి ఒక్క ఓవర్‌ కూడా బౌలింగ్‌ ఇవ్వలేదు. అయితే లంక ఓపెనర్లు విరుచుకుపడుతున్న నేపథ్యంలో తాను హుడాకు బంతిని ఇవ్వలేకపోయానని ఆ తర్వాత రోహిత్‌ సమర్థించుకున్నాడు. అయిదో స్పెషలిస్ట్‌ బౌలర్‌గా హార్దిక్‌ పాండ్యను ఆడించే వెసులుబాటు భారత్‌కు లేదని, అలా చేస్తే అది ఆల్‌రౌండర్‌గా అతడి భారాన్ని పెంచుతుందని కూడా శ్రీలంకతో మ్యాచ్‌తో రుజువైంది. యుజ్వేంద్ర చాహల్‌ మూడు వికెట్లతో కాస్త ఫామ్‌ను అందుకున్నాడు. కానీ భారత్‌కు దీపక్‌ చాహర్‌ లాంటి వాడు కావాలి. ప్రపంచకప్‌కు ముందు అతణ్ని ఆడించి చూడాల్సిన అవసరముంది. ఇక రోహిత్‌ బ్యాటుతో సానుకూల దృక్పథాన్ని ప్రదర్శించాడు. అదే దృక్పథంతో కొన్ని మ్యాచ్‌ల్లోనైనా టాప్‌-3లో మార్పులు చేసి, ఫలితాల్లో తేడా వస్తుందేమోనని చూస్తాడా అన్నది చూడాలి. గత రెండు మ్యాచ్‌ల్లో ఆఖరి ఓవర్లలో పేలవ బౌలింగ్‌ కూడా భారత్‌ను దెబ్బతీసింది. ముఖ్యంగా రెండు మ్యాచ్‌ల్లోనూ 19వ ఓవర్లో భువనేశ్వర్‌ చాలా పేలవంగా బౌలింగ్‌ చేశాడు. అతడు బలంగా పుంజుకోవడం భారత్‌కు అవసరం.

అఫ్గానే కదా అనుకుంటే.. : చిన్న జట్టే అయినా అఫ్గానిస్థాన్‌ ఆత్మవిశ్వాసంతో ఉంది. తమది తీసిపారేయదగ్గ జట్టు కాదని ఆ జట్టు ఇప్పటికే నిరూపించుకుంది. రషీద్‌ ఖాన్‌, ముజీబ్‌, జద్రాన్‌, మహ్మద్‌ నబి, హజ్రతుల్లా జజాయ్‌, గుర్బాజ్‌ వంటి నాణ్యమైన టీ20 ఆటగాళ్లున్న అఫ్గాన్‌కు ఏ జట్టుకైనా షాకివ్వగల సామర్థ్యం ఉంది. ఈ జట్టు 170 పరుగుల లక్ష్యాన్ని ఛేదించగలదు. రషీద్‌ ఖాన్‌ నేతృత్వంలోని ఆ జట్టు బౌలింగ్‌ దళం ప్రత్యర్థిని నియంత్రించగలదు. పెద్ద జట్లతో క్రమం తప్పకుండా ఆడకపోవడం ఒక్కటే అఫ్గానిస్థాన్‌కు పెద్ద ప్రతికూలాంశం. అయితే టీ20 క్రికెట్లో ఒకరిద్దరు ఆటగాళ్ల ప్రదర్శన కూడా మ్యాచ్‌ గమనాన్ని మార్చగలదు. అలాంటి ఆటగాళ్లు అఫ్గానిస్థాన్‌కు చాలా ముందే ఉన్నారు. ఈ నేపథ్యంలో ఆ జట్టు భారత్‌ను ఎలా ఎదుర్కొంటుందో చూడాలి.

ఇదీ చదవండి: ఆఖర్లో 2 బంతులకు 2 సిక్సర్లు.. అఫ్గాన్​పై పాక్​ గెలుపు.. టీమ్​ ఇండియా ఇంటికి..

'ఇక ప్రయోగాలు ఆపండి'.. గావస్కర్​ కీలక సూచనలు

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.