Smartphone features: 2022లో విడుదలయ్యే ఆండ్రాయిడ్ స్మార్ట్ ఫోన్లలో ఎలాంటి ఫీచర్లు ఉంటాయోనని ఎప్పుడైనా ఆలోచించారా? క్వాల్కామ్.. స్నాప్డ్రాగన్ 8 జెన్ 1 ప్రాసెసర్ రాకతో వచ్చే ఏడాది ఫోన్లలో సరికొత్త ఫీచర్లు అందుబాటులోకి రానున్నాయి.
అయితే అన్ని స్మార్ట్ ఫోన్లలో ఈ చిప్ ఫీచర్ ఉండాలని లేదు కానీ.. హై ఎండ్ ఫోన్లు అయిన షియోమి, శాంసంగ్, ఒప్పో, సోనీ, వన్ ప్లస్ ఇతర మోడళ్లలో దీనిని పొందుపర్చే అవకాశాలు పుష్కలం.
మరి ఈ స్నాప్డ్రాగన్ 8 జెన్ 1 ఫ్లాగ్షిప్ ప్రాసెసర్తో ఏమేం ఫీచర్లు వస్తాయంటే..
Always-on camera
ఈ ప్రాసెసర్తో వచ్చే ఆసక్తికరమైన ఫీచర్లలో.. ఆల్వేస్ ఆన్ కెమెరా గురించి మొదట చెప్పుకోవాలి. మీ ఫోన్ను ముట్టుకోకుండానే ఎన్నో కెమెరా ఫీచర్లను పొందొచ్చు.
- ఫోన్ను కనీసం టచ్ చేయకుండానే.. ఫేషియల్ రికగ్నిషన్తో అన్లాక్ చేయొచ్చు.
- ప్రస్తుత ఆండ్రాయిడ్ ఫోన్లను స్టాండ్ బై మోడ్ నుంచి మేల్కొలిపేందుకు బటన్ ప్రెస్ చేయడం లేదా ఫోన్ను తీయడం ఉంటుంది. కానీ భవిష్యత్తులో ఇది అవసరం ఉండదు.
- ఫోన్ మీ పక్కన ఉన్నా ముట్టుకోకుండానే.. కెమెరా వైపు చూస్తే చాలు హోం స్క్రీన్ ఫ్లాష్ అయ్యి డిస్ప్లే ఓపెన్ అవుతుంది.
- ఫోన్ను అన్లాక్ చేయకుండానే.. క్యూఆర్ కోడ్లను కూడా స్కాన్ చేయొచ్చు.
8K HDR video shooting
2022లో రానున్న ఫీచర్లలో 8కే హెచ్డీఆర్ వీడియో షూటింగ్ ఒకటి.
- స్నాప్డ్రాగన్ 8 జెన్ 1 ప్రాసెసర్తో కూడిన ఫోన్లతో.. 8K HDRలో వీడియోలు చేయొచ్చు. యాపిల్ ఐఫోన్ ప్రోలో కూడా వీడియో రికార్డింగ్ సామర్థ్యం 4K వరకే అందుబాటులో ఉంది.
- ఈ ఫీచర్తో అత్యుత్తమ రిజల్యూషన్లో వీడియో షూట్ చేయొచ్చు.
Video Bokeh effect
ఇమేజ్లో బ్యాక్గ్రౌండ్ బ్లర్ చేయడం తెలిసే ఉంటుంది. ఫొటోల్లో అవసరం లేని ఆబ్జెక్ట్ నాణ్యతను తగ్గించడం కోసం ఉపయోగిస్తారు. ఇప్పుడు ఈ వీడియో బొకే ఎఫెక్ట్తో వీడియో బ్యాక్గ్రౌండ్లో కూడా బ్లర్ చేయొచ్చు. ఏఐ సాంకేతికతతో ఈ ఫీచర్ రూపొందింది.
ఈ ఫీచర్ ఐచ్ఛికం(ఆప్షనల్). అవసరం అనుకుంటే వాడొచ్చు.
Improved performance
ఇది అన్ని ఫోన్లకు తప్పనిసరి. స్నాప్డ్రాగన్ 8 జెన్ 1 ప్రాసెసర్ ఫోన్లు.. ఇతర అన్ని స్మార్ట్ ఫోన్ల కంటే వేగంగా పనిచేస్తాయి.
- ఫోన్ పనితీరు 20 శాతం మెరుగుపడుతుంది.
- ఈ ఫీచర్ వస్తే మొబైల్ గేమ్స్ ఆడేటప్పుడు, బ్రౌజింగ్ చేస్తున్నప్పుడు ఫోన్ స్లో అయ్యే అవకాశమే లేదంటున్నారు నిపుణులు.
Lossless audio over Bluetooth
ప్రస్తుత ఫోన్లలో బ్లూటూత్ హెడ్ఫోన్స్ ద్వారా పాటలు వినేటప్పుడు.. ఆడియో అంత స్పష్టంగా వినిపించకపోవచ్చు. వినియోగదారు రాజీ పడే ప్రసక్తే లేకుండా.. కొత్త చిప్ ద్వారా ఆడియో క్లారిటీగా వినిపించేలా సాంకేతికత అందుబాటులోకి రానుంది.
స్నాప్డ్రాగన్ సౌండ్ టెక్నాలజీకి సపోర్ట్ చేసే హెడ్ఫోన్స్కు మాత్రమే ఈ ఫీచర్ అందుబాటులో ఉంటుంది. ప్రస్తుతానికి ఇవి తక్కువే ఉన్నా.. రాబోయే రోజుల్లో ఈ జాబితా పెరుగుతుందని టెక్ నిపుణులు అంటున్నారు.
Even faster 5G connectivity
- రాబోయే తరం స్మార్ట్ఫోన్లలో 5G స్పీడ్తో 10జీపీపీఎస్ వరకు అత్యంత వేగంగా డౌన్లోడ్లు చేసుకోవచ్చు. దీంతో 4K రిజల్యూషన్ వీడియోలను సెకన్లలోనే డౌన్లోడ్ చేసుకోవచ్చు.
- పెద్దగా స్ట్రీమింగ్ లేకుండానే.. 8K రిజల్యూషన్తో వీడియో చాట్ చేసుకోవచ్చు.
ఇవీ చూడండి: మీ ఐఫోన్ ఇకపై మీరే రిపేర్ చేసుకోవచ్చు!