Omicron virus news: కరోనా కొత్త వేరియంట్ ఒమిక్రాన్.. ప్రపంచ దేశాలను వణికిస్తోంది. దక్షిణాఫ్రికాలో వెలుగుచూసిన ఈ వేరియంట్.. ఆఫ్రికాలో తొమ్మిది దేశాలకు విస్తరించింది. అందులో బోట్సువానా, ఘనా, మోజాంబియా, నమీబియా, నైజీరియా, సెనెగల్, ఉగాండ, జింబాబ్వేలు ఉన్నాయి.
దక్షిణాఫ్రికాలో వేలసంఖ్యలో కేసులు వెలుగుచూస్తుండగా.. ఉగాండలో మొదటిసారిగా ఏడుగురికి ఒమిక్రాన్ పాజిటివ్గా నమోదైంది. నమీబియాలో 18 మంది ఒమిక్రాన్ బారిన పడ్డారు. నైజీరియాలో తాజాగా మూడు కేసులు వెలుగుచూశాయి.
దక్షిణాఫ్రికా వ్యాపారానికి తీవ్ర దెబ్బ..
దక్షిణాఫ్రికాలో ఒమిక్రాన్ కొత్త వేరియంట్ వెలుగుచూసినప్పటి నుంచి ఆ దేశంపై ప్రపంచదేశాలు ప్రయాణ ఆంక్షలు విధించాయి. విమాన రాకపోకలు స్తంభించాయి. దీంతో ఆ దేశ వ్యాపారంపై తీవ్రమైన దెబ్బపడింది. కరోనా కారణంగా 2020లో దక్షిణాఫ్రికా పర్యటకం 70 శాతానికి పడిపోయింది. దక్షిణాఫ్రికా పర్యటకానికి ప్రధాన ఆధారమైన బ్రిటన్ ప్రస్తుతం ఒమిక్రాన్ దృష్ట్యా ఆ దేశాన్ని రెడ్ లిస్ట్లో చేర్చింది.
యూకే కొత్త నిబంధనలు..
ఒమిక్రాన్ నేపథ్యంలో విదేశాల నుంచి వచ్చే ప్రయాణికులకు కొత్త నిబంధనలను తీసుకువచ్చింది బ్రిటన్. తమ దేశంలోకి రావడానికి 48 గంటల ముందు కొవిడ్ నెగటివ్ రిపోర్ట్ను తప్పనిసరి చేసింది. రెడ్ లిస్ట్ దేశాల నుంచి వచ్చేవారికి ప్రభుత్వ క్వారెంటైన్లోనే ఉండేలా నిబంధనలు విధించింది.
Omicron community transmission:
ఒమిక్రాన్ వేరియంట్ సామాజిక వ్యాప్తి మొదలైంది. ఇంగ్లాండ్లోని పలు ప్రాంతాల్లో ఈ వైరస్ సామాజికంగా వ్యాప్తి చెందుతోందని బ్రిటన్ వైద్య శాఖ మంత్రి సాజిద్ జావిద్ వెల్లడించారు. ఇప్పటివరకు దేశంలో 336 ఒమిక్రాన్ కేసులు గుర్తించినట్లు తెలిపారు. ఇందులో 261 ఇంగ్లాండ్లోనే బయటపడ్డాయని చెప్పారు. స్కాట్లాండ్లో 71, వేల్స్లో నాలుగు కేసులు వెలుగులోకి వచ్చాయని వివరించారు.
Omicron variant news:
కొత్తగా నమోదైన కేసుల్లో అంతర్జాతీయ ప్రయాణాలకు ఎటువంటి సంబంధం లేనివారు కూడా ఉన్నారని బ్రిటన్ ప్రతినిధుల సభకు అందించిన నివేదికలో జావిద్ పేర్కొన్నారు. దీని ద్వారా సామాజిక వ్యాప్తి ఉందని స్పష్టమవుతోందని అన్నారు.
ఒమిక్రాన్ను అడ్డుకునేందుకు తాము ఏ అవకాశాన్నీ వదిలిపెట్టడం లేదని జావిద్ స్పష్టం చేశారు. ఈ వేరియంట్ ప్రమాదకరమా? కాదా? అనే విషయాన్ని ఇప్పుడే చెప్పలేమని అన్నారు. టీకాలపై ఏ మేరకు ప్రభావం చూపుతుందనేదీ స్పష్టంగా తెలీదని చెప్పారు. శాస్త్రవేత్తలు దీనిపై నిర్ధరణకు వచ్చేంత వరకు.. తగిన జాగ్రత్తలు తీసుకోవాల్సిందేనని అన్నారు.
ఇదీ చదవండి: 'ఇంగ్లాండ్లో ఒమిక్రాన్ సామాజిక వ్యాప్తి'
