IPL 2023: దిల్లీ ఫ్రాంఛైజీకి షాక్.. రూ.22 కోట్లు లాస్​.. మరి నీతా అంబానీకి ఎంతంటే?

క్రికెట్​ అభిమానులు ఎంతగానో ఎదురుచూసే ఐపీఎల్​ 16వ సీజన్​ త్వరలోనే ప్రారంభం కానుంది. ఇప్పటికే ఆటగాళ్ల మినీ వేలం పూర్తికాగా.. ఆయా జట్లు ప్రాక్టీస్​ను మొదలు పెట్టాయి. ట్రోఫీని సాధించడమే లక్ష్యంగా నెట్స్​లో శ్రమిస్తున్నాయి. కానీ మరోవైపు, దాదాపు అన్ని జట్లకు లీగ్​ ప్రారంభానికి ముందే షాక్​లు తగులుతున్నాయి. గాయాల కారణంగా పలువురు ఆటగాళ్లు లీగ్​కు దూరమవుతున్నారు. సీజన్​ మొదలయ్యేందుకు టైమ్​ దగ్గరపడేకొద్దీ గాయపడిన ప్లేయర్ల జాబితా పెరుగుతూ వస్తోంది. దిల్లీ క్యాపిటల్స్​ జట్టుకు రోడ్డు ప్రమాదానికి గురైన రిషభ్​ పంత్​, సర్ఫరాజ్​ ఖాన్​, అన్రిచ్​ దూరమయ్యారు. మోస్ట్​ సక్సెస్​ ఫుల్​ టీమ్​ ముంబయి ఇండియన్స్​ కు జస్ప్రీత్​ బుమ్రా, రిచర్డ్​సన్ దూరమయ్యారు. చెన్నై సూపర్​ కింగ్స్​ జట్టుకు స్టార్​ ప్లేయర్​ బెన్​ స్టోక్స్​తో పాటు మరో ఐదుగురు ప్లేయర్లు ఆయా జట్లకు అందుబాటులో ఉండరు. అయితే ఈ సీజన్​కు దూరమవ్వనున్న ఆటగాళ్లకు ఫ్రాంఛైజీలు మొత్తం సొమ్మును చెల్లిస్తాయా? లేక సగమే ఇస్తుందా? సీజన్​కు ముందు ఆయా ఫ్రాంచైజీలు ఎంత మేరకు నష్టపోనున్నాయి?