కోనోకార్ప‌స్ జాతి మొక్క

రోడ్డు డివైడర్లో పెంచిన మొక్కలపై నిషేధం.. అంత డేంజరా?

CONOCARPAS TREES : రాష్ట్రంలోని ప్రధాన రహదారుల వెంట, డివైడర్లలో.. ఎక్కడ చూసినా ఆకుపచ్చగా, ఏపుగా ఎదిగే మొక్కలు కనిపిస్తుంటాయి. అయితే ఇప్పుడు ఆ మొక్కలపై నిషేధం విధించినట్టు సమాచారం. కొమ్మనాటితే చాలు అటు అందంగానూ.. ఇటు ఆక‌ర్ష‌ణీయంగానూ.. ఏపుగా పెరిగే  కోనోకార్పస్​ జాతి మొక్క తక్కువ కాలంలోనే దేశం మొత్తం విస్తరించింది. ఇప్పుడేమో.. ఈ మొక్కల పెంపకాన్ని ఒక్కో నగరం నిషేధిస్తూ వస్తోంది. మరి ఈ మొక్కను నిషేధించే యోచనకు కారణాలేంటో తెలుసుకుందాం రండి..!

విదేశీ జాతికి చెందిన కోనోకార్ప‌స్ మొక్క‌పై హైద‌రాబాద్ మ‌హాన‌గ‌ర‌పాల‌క సంస్థ నిషేధం విధించే యోచనలో ఉంది. దుబాయి, అమెరికా, ఆఫ్రికా ఖండంలోని కొన్ని దేశాల్లో బాగా ప్రాచుర్యం పొందిన ఈ మొక్క‌ను.. కొన్నేళ్ల క్రితం దేశంలోని వేర్వేరు పుర‌పాల‌క సంస్థ‌లు దిగుమ‌తి చేసుకున్నాయి. కొమ్మ‌ను తుంచి మ‌ట్టిలో నాటితో చాలు.. ఈ మొక్క బ‌తికేస్తుంది. అలా త‌క్కువ స‌మ‌యంలో కోనోకార్ప‌స్ జాతి మొక్క.. దేశం మొత్తం విస్త‌రించింది. స‌రిగ్గా అదే స‌మ‌యానికి విదేశాల్లో దీనిపై ఆందోళ‌న మొద‌లైంది.

ఇప్ప‌టి వ‌ర‌కు నాటిన చెట్ల సంగ‌తి అటుంచి.. కొత్త‌గా కొనొకార్ప‌స్ మొక్క‌ను నాటొద్ద‌ని హైదరాబాద్​ అర్బ‌న్ బ‌యో డైవర్సిటీ విభాగం నిర్ణ‌యం తీసుకుంది. జ‌నావాసాల్లో, రోడ్లు విభాగినిల‌పై, పైపులైన్ల‌పైన‌, రోడ్ల‌కు ఇరువైపులా అస్స‌లు నాటొద్ద‌ని కేంద్ర కార్యాల‌యం అన్ని స‌ర్కిల్ క‌ర్యాల‌యాల‌కు స్ప‌ష్టం చేసింది.

ఈ చెట్టు పువ్వు నుంచి వెలువ‌డే రేణువులు శ్వాస‌కోశ సంబంధిత స‌మ‌స్య‌ల‌కు కార‌ణ‌మ‌వుతుంద‌ని ప‌రిశోధ‌కులు హెచ్చ‌రించారు. అలాగే.. చెట్టు యొక్క బ‌ల‌మైన వేరు వ్య‌వ‌స్థ పైపులైన్ల‌ను ధ్వంసం చేస్తుంద‌ని, పునాదుల‌ను, గోడ‌ల‌ను బ‌ల‌హీన‌ప‌రుస్తుంద‌ని గుర్తు చేశారు. దుబాయ్, త‌దిత‌ర దేశాలు కూడా ఈ మొక్క‌ను ఈ కార‌ణాల‌తోనే ప‌క్క‌న‌పెట్ట‌డం గ‌మ‌నార్హం.

ఇక ప‌రిశోధ‌కుల హెచ్చ‌రిక‌ల‌తో.. పుణే న‌గ‌ర‌పాల‌క సంస్థ అధికారులు అప్ర‌మ‌త్త‌మ‌య్యారు. కొత్త‌గా చేప‌ట్టే మొక్క‌లు నాటే కార్య‌క్ర‌మాల్లో కొనొకార్ప‌స్‌ను చేర్చొద్ద‌ని, పూర్తిగా ప‌క్క‌న‌పెట్టాల‌ని నిర్ణ‌యించినట్టు సమాచారం. ఉత్త‌ర్‌ప్ర‌దేశ్‌లోని కొన్ని స్థానిక సంస్థ‌లూ ఇదే నిర్ణ‌యానికొచ్చాయి. క్ర‌మంగా ఆ నిషేధాజ్ఞ‌లు హైద‌రాబాద్‌లోనూ అమ‌ల‌య్యే అవకాశాలు కనిపిస్తున్నాయి.

దుబాయ్ బ‌ల్దియా అధికారులైతే.. వేళ్ల‌తో స‌హా కోనోకార్ప‌స్‌ను చెట్ల‌ను తొల‌గించారు. ఇప్పుడు మ‌న దేశంలోనే చెట్ల‌ను పెంచ‌డంపై ఒక్కో న‌గ‌రం నిషేధం విధిస్తూ వెళ్తోంది.

అయితే ఈ మొక్కలు మన రాష్ట్రంలో విస్తరించటం వెనుక ఓ కథుందండీ.. అదేంటంటే.. రాష్ట్రానికి చెందిన కొంతమంది ప్ర‌జాప్ర‌తినిధులు, ఉన్న‌తాధికారులు తిరుమ‌ల వెళ్లి వ‌స్తుండ‌గా కోనోకార్ప‌స్ మొక్క‌పై దృష్టి ప‌డింది. రోడ్డు పొడ‌వునా చ‌క్క‌గా పెరిగి, ప‌చ్చ‌ని ప‌ర‌దాలా క‌నిపించ‌డంతో.. తెలంగాణ‌లోనూ ఈ మొక్క‌ల‌ను నాటాల‌ని అభిప్రాయ‌ప‌డ్డారు. అనుకున్న‌ట్లే హైద‌రాబాద్‌తో పాటు రాష్ట్రవ్యాప్తంగా అన్ని మున్సిపాలిటీలు, మున్సిప‌ల్ కార్పొరేష‌న్లు, పంచాయ‌తీల్లోని న‌ర్స‌రీల్లో మొక్క‌ల పెంప‌కం మొద‌లైంది.

యుద్ధం చేసినట్టు.. హ‌రిత‌హారంలో ఈ మొక్కలనే ఎక్కువ‌గా నాటారు. ఆశించిన‌ట్లే ఆ మొక్క‌ల‌న్నీ ఏడాది, రెండేళ్ల‌లో ఏపుగా పెరిగాయి. రోడ్ల పక్క‌న‌, డివైడర్లలో, పార్కుల్లో, ఖాళీ స్థ‌లాల్లో, ప‌రిశ్ర‌మ‌ల్లో విరివిగా వెలిశాయి. వేరే ఏ మొక్క ఇవ్వ‌నంత ప‌చ్చ‌ద‌నంతో పాటు గుబురుగా, ఎత్తుగా పెర‌గ‌డంతో ప్ర‌జ‌ల్లోనూ దీనిపై మంచి అభిప్రాయం ఏర్ప‌డింది. వ్య‌క్తిగ‌తంగా చాలా మంది ఈ మొక్క‌ల‌ను పొలాల్లోని దారుల‌కు ఇరువైపులా, ఇంటి పెర‌ట్లో, ఇంటి చుట్టూ ప్ర‌హ‌రీలా నాటుకున్నారు. అంతా బాగుంద‌నుకునే స‌మయానికి.. మ‌హారాష్ట్రలోని పూణే న‌గ‌ర‌పాల‌క సంస్థ కోనోకార్ప‌స్ దుష్ప్రభావాలపై ఆందోళ‌న వ్య‌క్తం చేసింది. ఇంకేముంది ఈ మొక్కలపై నిషేధం మొదలైంది.