అమెరికా నుంచి అలా అడుగుపెట్టిందో లేదో.. నిహారికకి 'కేజీఎఫ్‌ హీరో యష్‌తో పనిచేస్తారా?' అని ఫోన్‌! నెల తిరక్కుండానే మళ్లీ అదే ప్రశ్న. ఈసారి అవకాశం మహేశ్‌బాబుతో! అజయ్‌ దేవగణ్‌, షాహిద్‌ కపూర్‌.. ఆమె డేట్స్‌ కోసం ప్రయత్నించినవారే. హీరోయిన్‌ కోసం అనుకుంటున్నారా? కాదండీ.. ఒక్కటీ.. ఒకే ఒక్క రీల్‌లో ఆమెతో పనిచేయడానికి ఇదంతా! అంత గొప్పేంటి ఆమెలో అంటారా? అయితే చదివేయండి!

Niharika Nm: ఈమె డేట్స్‌ కోసం స్టార్​ హీరోలు క్యూ!

నిహారిక పుట్టింది చెన్నై. పెరిగిందేమో బెంగళూరు. కంప్యూటర్‌ ఇంజినీరింగ్‌ రెండో ఏడాదిలో సరదాగా యూట్యూబ్‌ ఛానెల్‌ ప్రారంభించింది. తనకు ఇష్టమైన హాస్యాన్ని ఎంచుకొని 2016 నుంచి వీడియోలు పోస్ట్‌ చేయడం మొదలెట్టింది.

అలా ఆమె చేసిన 'పరీక్షల సమయంలో విద్యార్థులు..' అంటూ చేసిన వీడియో నెట్టింట్లో వైరల్‌ అయ్యింది. ఈ ఒక్క వీడియో వారం రోజుల్లో పది వేలమంది ఫాలోయర్లను తెచ్చిపెట్టింది. ఇక అక్కడ్నుంచి ఆ సంఖ్య క్రమంగా పెరుగుతూ వచ్చింది.

ఈమె డ్యాన్సర్‌, మోడలింగ్‌ కూడా చేసేది. వీటితో చదువు మీద శ్రద్ధ పెట్టలేకపోతున్నా అనిపించింది. దీంతో యూట్యూబ్‌ని పక్కన పెట్టేసింది.

నిహారికకి స్కూలుకి వెళ్లడం, గంటల కొద్దీ పాఠాలు వినడమంటే అస్సలు ఇష్టముండదు. కానీ ఏ తరగతిలో అయినా 90 శాతానికి పైగా మార్కులు సాధించాల్సిందే.

ఇంట్లోవాళ్ల కోసం ఇంటర్‌లో మేథ్స్‌ ఎంచుకుంది. ఐఐటీ కోచింగ్‌లో చేరింది. ‘కష్టపడి’ చదవడం అంటే ఇష్టంలేని తను ప్రవేశపరీక్షలో అర్హత సాధించలేకపోయింది. దీంతో స్థానిక కళాశాలలో చేరింది

లాక్‌డౌన్‌కి రెండు నెలల ముందు నిహారిక ఎంబీఏ కోసమని యూఎస్‌ వెళ్లింది. కరోనా.. ఎటూ వెళ్లలేని పరిస్థితి. ఒంటరితనాన్ని దూరం చేసుకోవడానికి మళ్లీ వీడియోలు మొదలుపెట్టింది.

బ్రేకప్‌ మీద తను చేసిన రీల్‌ లక్షల మందిని ఆకర్షించడమే కాదు.. రెండు నెలల్లో పదిలక్షల మంది అనుసరించేలా చేసింది.

లిఫ్ట్‌లో వ్యక్తుల ప్రవర్తన, ఎవరింటికైనా వెళ్లినప్పుడు కుక్క మన మీదకు వస్తే.., ఇన్‌స్టాలో ఫాలోయర్లను పెంచుకోవడానికి అన్‌ఫాలో చేయడం, రెస్టారెంట్లలో వివిధ వ్యక్తుల ప్రవర్తన.. ఇలా చుట్టూ జరిగే సంఘటనలే ఆమె కథా వస్తువులు. ఆ సమయాల్లో మనం ఎలా భావిస్తామన్న దానికి హాస్యం జోడిస్తుంది.

తెలుగు, తమిళం, కన్నడ, హిందీ, ఇంగ్లిష్‌ భాషలొచ్చు. సంభాషణ ఆంగ్లంలో ప్రారంభమైనా.. తమిళ, తెలుగు, కన్నడ యాస ఉంటుంది. చివర్లో అది పూర్తయ్యేదీ ఈ భాషలతోనే! అదే ఎక్కువ మందికి చేరువ చేసింది.

ఇప్పుడామె యూట్యూబ్‌ ఖాతాను 9.6 లక్షలు, ఇన్‌స్టాను 22 లక్షల మందీ అనుసరిస్తున్నారు. తన ఫాలోయర్లలో రకుల్‌, రెజీనా, కుష్బూతోపాటు బాలీవుడ్‌ స్టార్లూ ఉన్నారు.

అంతర్జాతీయ స్థాయిలో యూట్యూబ్‌ నిర్వహించిన క్రియేటర్‌ ఫర్‌ ఛేంజ్‌ ప్రోగ్రామ్‌కి దేశం తరఫున వరుసగా రెండుసార్లు ప్రాతినిధ్యం వహించడమే కాదు.. అంబాసిడర్‌ కూడా. ఈమె ఒక్క వీడియో రోజులో 10లక్షల వ్యూస్‌ అందుకుంటుంది.

యశ్‌తో చేసినదానికి ఒక్కరోజులో 30 లక్షలు.

మహేశ్‌తో చేసిందైతే ఆ మార్కు 18 గంటలకే చేరింది.

షాహిద్​ కపూర్​తో

చిన్నతనంలో లావుగా ఉండేదాన్ని. నోటి చుట్టూ ర్యాష్‌, పెద్ద కళ్లద్దాలు.. దీంతో బాడీషేమింగ్‌, ఏడిపించడం లాంటివెన్నో ఎదుర్కొన్నా. కొద్దిరోజులయ్యాక నామీద నేనే జోకులు వేసుకునేదాన్ని. అలాగైతే నన్ను వేరుగా చూడరని! కానీ ఇంటికెళ్లి ఏడ్చేదాన్ని.

"నచ్చింది చేస్తే అంతే.. ఎవరైనా రాణించగలుగుతారు. అయితే ఎవరో మిమ్మల్ని నమ్మాలి అని కూర్చోవద్దు. ముందు నేను చేయగలను అని మిమ్మల్ని మీరు నమ్మాలి" అని చెప్పే నిహారిక టెడెక్స్‌ స్పీకర్‌ కూడా.

Niharika Nm: ఈమె డేట్స్‌ కోసం స్టార్​ హీరోలు క్యూ!

Niharika Nm: ఈమె డేట్స్‌ కోసం స్టార్ హీరోలు క్యూ!