బన్నీ పక్కన సాయి పల్లవి.. పుష్ప 2కు ఓకే చెప్పిన రౌడీ బేబీ!

టాలీవుడ్​ ఐకాన్​ స్టార్​ అల్లు అర్జున్​ హీరోగా సుకుమార్ దర్శకత్వంలో తెరకెక్కిన పుష్ప మూవీ తెచ్చి పెట్టిన క్రేజ్​ అంతా ఇంతా కాదు. గతేడాది విడుదలైన ఈ సినిమా థియేటర్లలో సందడి చేయడమే కాకుండా వరల్డ్​ లెవెల్​లో గుర్తింపు పొందింది. దీంతో అల్లు అర్జున్ రేంజ్​ ఇంకాస్త పెరిగింది. ఐకాన్​ స్టార్​ కాస్త పాన్​ వరల్డ్​ స్టార్​ అయిపోయారు. ఇక అల్లు అర్జున్​తో పాటు సినిమాలోని ప్రతి వ్యక్తి పేరు దేశమంతటా మారుమోగిపోయింది. రష్మిక, ఫహాద్ ఫాజిల్​, సునీల్​ ఇలా అందరి పేర్లు అభిమానుల నోట నానిపోయాయి. ఇక డైలాగ్స్​ గురించి ప్రత్యేకంగా చెప్పనక్కర్లేదు. 'పుష్ప అంటే ఫైర్​', అలాగే 'తగ్గేదే లే' అనే డైలాగ్స్ ఇప్పటికీ ట్రెండ్ అవుతూనే ఉన్నాయి. ఇక తాజాగా ఈ సినిమా సీక్వెల్​ షూట్​ నడుస్తోంది. ఇప్పటికే అందులోని కీలకమైన నటీనటులంతా షూట్​లో బిజీ అయిపోయారు. అయితే సోషల్​ మీడియాలో ఓ వార్త హల్​ చల్​ చేస్తోంది. అదేంటంటే ఈ సినిమాలో నటి సాయి పల్లవి కూడా ఓ రోల్​ చేస్తోందట. అయితే ఈ విషయాన్ని సినిమా యూనిట్​ అఫిషియల్​గా చెప్పనప్పటికీ ఈ వార్త నిజమైతే ఎంత బాగుంటుందో అంటూ అభిమానులు వేయి కళ్లతో ఎదురు చూస్తున్నారు.