వెండితెరపై సినిమాలు.. ప్రేక్షకులకు ఎంతటి వినోదాన్ని పంచుతాయో.. అలానే బుల్లితెరపై పలు ఎంటర్టైన్మెంట్ షోస్ కూడా వీక్షకులకు అంతే సరికొత్త వినోదాన్ని ఇస్తాయి. రోజూ రకరకాల ఆలోచనలు, పనులతో సతమతమయ్యే ప్రేక్షకుడు.. టెన్షన్స్ను కాసేపు మర్చిపోయి కడుపుబ్బా నవ్వించేలా చేస్తాయి. అయితే వీటిని తెరకెక్కించడం అంత సులభమేమీ కాదు. ఓ సినిమాను రూపొందించడంలో ఎంతటి కష్టం దాగి ఉంటుందో ఈ స్పెషల్ షోస్ వెనుక కూడా అంతే కష్టం, శ్రమ ఉంటుంది. వీక్షకుడికి కొత్తదనాన్ని చూపించాలనే తాపత్రయంతో మేకర్స్ నిత్యం కష్టపడుతుంటారు. వ్యూయర్స్కు ఆనందాన్ని పంచేందుకు వారు శారీరకంగా, మానసికంగా ఒత్తిడికి గురవుతుంటారు. కాన్సెప్ట్స్ను సెలెక్ట్ చేసుకోవడం నుంచి షూటింగ్ పూర్తై టెలికాస్ట్ అయ్యే వరకు శ్రమిస్తుంటారు. అయితే బుల్లితెరపై కడుప్పుబ్బా నవ్వించే ప్రోగ్రామ్స్లో ఎంతో క్రేజ్ సంపాదించుకున్నాయి ఖతర్నాక్ షోస్ 'జబర్దస్త్', 'ఎక్స్‌ట్రా జబర్దస్త్'. ఇందులో కొంతమంది కమెడియన్లు కంటెస్టెంట్లుగా షోలో అడుగుపెట్టి టీమ్లీడర్లుగా ఎదిగారు. వారు వేసే పంచులు, చేసే కామెడీ.. మొత్తంగా వారు ప్రదర్శించే స్కిట్ ఎంతగానో అలరిస్తున్నాయి. ఈ నేపథ్యంలో తాజాగా ఈటీవీ భారత్తో ముచ్చటించిన ఈ టీమ్లీడర్లు.. తాము చేసే స్కిట్స్ వెనుక ఎంతటి శ్రమ, కష్టం ఉంటుందో తెలిపారు. ఎంతగా కష్టపడతారో వివరించారు. కొత్తదనం చూపించేందుకు ఎంతలా తాపత్రయం పడతారో చెప్పుకొచ్చారు. అవన్నీ వారి మాటల్లోనే..
రోహిణి మాట్లాడుతూ.. "మొదట సాఫ్ట్వేర్ జాబ్ వచ్చింది. ఓ సారి లంచ్ బ్రేక్లో సహచరులను ఎంటర్టైన్ చేస్తున్నా. అది చూసిన మా సార్ యాక్టింగ్ అంటే ఆసక్తి ఉందా? అని అడిగారు. ఆ సమయంలోనే మా అక్క కూడా నన్ను ప్రోత్సహించింది. ఆ తర్వాత ఆరు నెలల్లోనే సీరియల్స్లో అవకాశం వచ్చింది. అలా 'జబర్దస్త్'లోకి వచ్చా. చమ్మక్ చంద్ర టీమ్లో చేశా. అనంతరం యాక్సిడెంట్ అయి షోకు కాస్త దూరమయ్యా. మళ్లీ సీరియల్స్, టీవీ షో.. అనంతరం మళ్లీ కంటెస్టెంట్గా ఎంట్రీ ఇచ్చా. అయితే కంటెస్టెంట్గా ఉన్నప్పుడు పెద్దగా ఒత్తిడి ఏమీ ఉండదు. వాళ్లు చెప్పింది చేసి వెళ్లిపోతా. కానీ ఇప్పుడు టీమ్లీడర్ అయ్యాక ఫుల్ టెన్షన్. కష్టమైన పనే అయినా ఇష్టం కాబట్టి సంతోషంగానే ఉంది. సినిమా అవకాశాలు కూడా వచ్చాయి. ప్రేక్షకులకు దగ్గరవ్వడానికి 'జబర్తస్త్' మంచి ప్లాట్ఫామ్. ఇలానే నవ్విస్తూ ఇంకా బాగా చేయాలని ప్రయత్నిస్తా. నన్ను ఆదిరించిన ప్రతిఒక్కరికీ ధన్యవాదాలు. ఇది ఒక్క గొప్ప వరంగా భావిస్తున్నా. మొత్తంగా ఈ షోలో భాగస్వామ్యం అవ్వడం సంతోషంగా ఉంది." అని చెప్పింది.
"నేను జంగిల్ బుక్ అనే స్కిట్ చేశా. చాలా డిఫరెంట్గా ఉంటుంది. నిజానికి బిహైండ్ ది కెమెరా చాలా కష్టం దాగి ఉంటుంది. ఆలోచించాలి, లైన్స్ రాయాలి, దాన్ని డైరెక్టర్కు చెప్పాలి. ఆయన ఓకే చెబితే, మళ్లీ డైలాగ్స్ రాయాలి. ఆ తర్వాత ఆర్టిస్ట్ సెలక్షన్, ప్రాక్టీస్, షూట్ చేయడం జరుగుతుంది. దాదాపు ఈ ప్రక్రియ అంతా ఓ సినిమాకు జరిగినట్టే కొనసాగుతుంది. సినిమాకైనా కాస్త టైమ్ ఉంటుంది కానీ మాకు మాత్రం ఓ వారమే సమయం ఉంటుంది. ఇప్పటికే చాలా కథలు వచ్చేశాయి. కొత్త కథల రాయడం చాలా టఫ్. అందుకోసం రకరకాల ప్రయత్నాలు చేస్తాం. బుర్ర హీటెక్కిపోతుంది."
-కెవ్వు కార్తీక్
రాకెట్ రాఘవ మాట్లాడుతూ.. "ఈ షో ప్రారంభమైనప్పటి నుంచి దాదాపుగా ప్రతి ఎపిసోడ్ చేస్తున్నాను. నాకు ఇలా అవకాశం ఇవ్వడం సంతోషంగా ఉంది. షూట్ చేసే ప్రతిరోజు కొత్తగానే ఉంటుంది. ఎందుకంటే రోజూ దాని కోసం బాగా వర్క్, ప్రాక్టీస్ చేయాలి. దాన్ని మా డైరెక్టర్ ఓకే చేయాలి. చాలా మధనపడుతుంటాం. కొత్తగా ఏదో చేయడానికి ప్రయత్నిస్తుంటూనే ఉంటాం. అలానే కొనసాగిస్తుంటాం. ఇదంతా టీమ్ వర్క్. కలిసి చర్చిస్తాం. ఒకరికి నచ్చొచ్చు.. ఇంకొకరికి నచ్చకపోవచ్చు. చివరికి ఓ నిర్ణయానికి వస్తాం. తొమ్మిదేళ్ల నుంచి చేయడం వల్ల మా మధ్య ఓ ఎమోషన్ ఎప్పుడూ ఉంటుంది. అంతా ఒక ఫ్యామిలీ అయిపోయాం. అవసరమైనప్పుడు సాయంగా ఒకరికి కోసం ఒకరు తోడుగా ఉంటాం." అని పేర్కొన్నాడు.
"జబర్దస్లో ఉన్న మిగతా వాళ్ల లాగే నాకంటూ ఓ గుర్తింపు రావాలని అనుకున్నాను. కన్ఫ్యూజన్ స్కిట్ను ఎంచుకున్నాను. నా టీమ్ కూడా బాగా సపోర్ట్ చేసింది. మిగతా స్కిట్లా కాకుండా దీనికి పేపర్ వర్క్ ఎక్కువగా ఉంటుంది. దాదాపు వారం వరకు పడుతుంది. మూడు రోజులు ప్రాక్టీస్ చేస్తాం. అప్పుడు పక్కాగా ప్రజెంట్ చేస్తాం. లేదంటే స్టేజ్పై ప్రదర్శన చేయడం కష్టం. మా టీమ్ వాళ్లు బాగా సహకరిస్తారు, ప్రోత్సహిస్తారు. సాయి, హరిత, రమేశ్.. అంతకుముందు ఇమ్ము ప్రసాద్, బాబు బాగా సహకరించారు."
- వెంకీ
బుల్లెట్ భాస్కర్ మాట్లాడుతూ.. "కొంతమంది అంటుంటారు బోర్ కొట్టలేదా అని? .. కామెడీ , లవ్ ఎప్పటికీ బోర్ కొట్టదు. దేవదాస్ వచ్చి 50 ఏళ్లు అయింది. అయినా ప్రేమ కథలు తీస్తున్నారు. క్రియేటివిటీ ఉన్నంతవరకు ఎండింగ్ లేదు. ఎత్తుపల్లాలు ఉండటం సహజం. ఒకవేళ మా షోకి రేటింగ్ తక్కువ వచ్చినా వెంటనే పికప్ అవుతుంది. పేరు రావడం చాలా ఈజీ. కానీ దాన్ని నిలబెట్టుకోవడం చాలా కష్టం. దాని కోసం కష్టపడే క్రమంలో ఒత్తిడికి గురవుతాం. ఇలా ఓ సారి నేను సైకియాట్రిస్ట్ దగ్గరకు వెళ్లాను. అప్పుడు ఆయన 'నేను ఒత్తిడికి లోనైతే జబర్దస్త్ చూస్తాను అన్నారు'. ఓ రియాలిటీ షో ఇన్ని సీజన్స్ కొనసాగడం ప్రపంచంలోనే తొలిసారి. దేవుడి దయ వల్ల అంతా బాగా జరుగుతుంది. మిమ్మల్ని న్వవించడానికి ఎప్పటికీ ప్రయత్నిస్తూనే ఉంటాం." అని అన్నాడు.
ఇదీ చూడండి: 'జబర్దస్త్ వల్లే మా అమ్మకు మంచి వైద్యం.. కానీ ఆ విషయంలో మాత్రం..'
