కొనసాగుతున్న సికింద్రాబాద్ అల్లర్ల ప్రధాన సూత్రధారి విచారణ

author img

By

Published : Jun 22, 2022, 3:20 PM IST

కొనసాగుతున్న సికింద్రాబాద్ అల్లర్ల ప్రధాన సూత్రధారి విచారణ

Agnipath Protest: దేశవ్యాప్తంగా సంచలనం సృష్టించిన సికింద్రాబాద్‌ రైల్వేస్టేషన్‌ కేసులో.. పోలీసులు దర్యాప్తు ముమ్మరం చేశారు. విద్యార్థులను రెచ్చగొట్టారనే ఆరోపణలు ఎదుర్కొంటున్న ఏపీకి చెందిన సాయి ఢిపెన్స్‌ అకాడమీ నిర్వాహకుడు ఆవుల సుబ్బారావును ఉత్తర టాస్క్‌ఫోర్స్‌ కార్యాలయంలో పోలీసులు విచారిస్తున్నారు. కేసుకు సంబంధించి... వివిధ కోణాల్లో అతడి నుంచి వివరాలు సేకరిస్తున్నారు.

Agnipath Protest: కేంద్ర ప్రభుత్వం ప్రవేశపెట్టిన అగ్నిపథ్‌ విధానాన్ని వ్యతిరేకిస్తూ సికింద్రాబాద్‌ రైల్వే స్టేషన్‌లో జరిగిన అల్లర్లపై దర్యాప్తు కొనసాగుతోంది. సికింద్రాబాద్‌ అల్లర్లను ప్రోత్సహించారనే అభియోగాలపై ఈ నెల 18న ప్రకాశం జిల్లా కంభంకు చెందిన ఆవుల సుబ్బారావును పోలీసులు అదుపులోకి తీసుకొని నరసరావుపేటకు తరలించి నాలుగు రోజులుగా విచారించారు. తాజాగా సుబ్బారావును హైదరాబాద్ రైల్వే పోలీసులు అదుపులోకి తీసుకుని విచారిస్తున్నారు.

కేసుకు సంబంధించి.. వివిధ కోణాల్లో అతడి నుంచి వివరాలు సేకరిస్తున్నారని సమాచారం. దాడికి సంబంధించి 10 మంది వాట్సప్ అడ్మిన్‌లను అదుపులోకి తీసుకున్న పోలీసులు ఘటనపై అన్నికోణాల్లో దర్యాప్తు చేస్తున్నారు. సికింద్రాబాద్‌ రైల్వేస్టేషన్‌పై దాడికేసులో ఇప్పటివరకు 55 మందిని పోలీసులు అరెస్ట్‌ చేశారు. విచారణ అనంతరం సుబ్బారావును అరెస్టు చేసే అవకాశాలు ఉన్నాయి.

సికింద్రాబాద్‌ అల్లర్లకు సంబంధించి పలువురు అభ్యర్థులతో సాయి డిఫెన్స్‌ అకాడమీ డైరెక్టర్‌ ఆవుల సుబ్బారావు దిగిన ఫొటోలు సామాజిక మాధ్యమాల్లో వైరలయ్యాయి. ఈ నేపథ్యంలో నరసరావుపేటలో సుబ్బారావు నిర్వహిస్తోన్న సాయి డిఫెన్స్‌ అకాడమీలో అధికారులు సోమవారం తనిఖీలు చేశారు. కేంద్ర ఇంటెలిజెన్స్, ఐటీ అధికారులు సంయుక్తంగా ఈ తనిఖీలు నిర్వహించారు. కార్యాలయంలోని దస్త్రాలు పరిశీలించిన అధికారులు.. సిబ్బంది నుంచి పలు వివరాలు సేకరించారు. నరసరావుపేటలో దాదాపు పదేళ్లుగా సుబ్బారావు సాయి డిఫెన్స్‌ అకాడమీని నిర్వహిస్తున్నట్లు అధికారులు గుర్తించారు. ఇన్నేళ్లుగా ఇక్కడి నుంచి ఎంత మంది ఆర్మీకి ఎంపికయ్యారు ? అభ్యర్థుల నుంచి ఎంత ఫీజు వసూలు చేసేవారు ? పన్నులు కడుతున్నారా ? లేదా వంటి ఇతరత్రా లావాదేవీలు, శిక్షణకు సంబంధించిన వివరాలపై అధికారులు ఆరా తీశారు.

ఇవీ చదవండి:

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.