కర్నూలులో నేడు గణేశ్ నిమజ్జనోత్సవం జరగనుంది. గణేశ్ నిమజ్జనానికి అధికారులు తగిన ఏర్పాట్లు చేశారు. నగరంలో వివిధ ప్రాంతాల్లో 700కుపైగా వినాయక విగ్రహాలు కొలువుదీరాయి. కేసీ కెనాల్‌ వద్దనున్న వినాయక ఘాట్‌ వద్ద విగ్రహాల నిమజ్జన కార్యక్రమం జరగనుంది. భారీ విగ్రహాలను నిమజ్జనం చేసేందుకు మూడు క్రేన్లు అందుబాటులో ఉంచారు. రాంబొట్ల దేవాలయం వద్ద ఉదయం 11 గంటలకు తొలి విగ్రహానికి పూజలు చేసిన తర్వాత శోభాయాత్ర ప్రారంభంకానుంది. ప్రజాప్రతినిధుల పూజల తర్వాత నిమజ్జన కార్యక్రమం ప్రారంభించనున్నారు. తొలి విగ్రహానికి పూజ తర్వాతే మిగిలిన విగ్రహాలు బయలుదేరనున్నాయి.
తొలుత కలెక్టరేట్‌లో ఏర్పాటుచేసిన పరిపాలన గణపతి విగ్రహం నిమజ్జనం చేయనున్నారు. అతిథుల చేతుల మీదుగా పరిపాలన గణపతి విగ్రహం నిమజ్జనం జరగనుంది. పరిపాల గణపతి విగ్రహం తర్వాతే మిగిలిన విగ్రహాల నిమజ్జనం చేస్తారు. రాత్రి 10 గంటల్లోగా నిమజ్జనం పూర్తికి అధికారులు చర్యలు చేపట్టారు.
నిమజ్జనోత్సవంలో డీజేలకు అనుమతి లేదని పోలీస్ శాఖ ప్రకటించింది. సంప్రదాయబద్ధంగా నిమజ్జన కార్యక్రమాలకు పోలీస్‌శాఖ ప్రోత్సాహకాలు అందిస్తోంది. మండప నిర్వాహకులకు ప్రథమ, ద్వితీయ, తృతీయ బహుమతులు ఉంటాయని.. పోలీస్ శాఖ ప్రోత్సాహకాలు ప్రకటించింది. ఉత్సవ కమిటీలు.. సంప్రదాయ నిమజ్జనానికే ప్రాధాన్యత ఇస్తున్నాయి. నిమజ్జనం సందర్భంగా కర్నూలులో రాకపోకలపై ఆంక్షలు విధించారు. నిమజ్జనాన్ని తిలకించేందుకు పెద్దఎత్తున ప్రజలు తరలిరానున్నారు.
కొవిడ్‌ నిబంధనలు తప్పనిసరి
గణేశ్ మండపాల నిర్వాహకులు తప్పనిసరిగా కొవిడ్‌ నిబంధనలు పాటించాలని అధికారులు, గణేశ్ ఉత్సవ కేంద్ర సమితి నాయకులు సూచిస్తున్నారు. ఉరేగింపులో పాల్గొనేవారు మాస్కులు ధరించాలని పేర్కొన్నారు. విగ్రహం.. విగ్రహం మధ్య ఆరడుగుల దూరం ఉండేలా చర్యలు చేపట్టారు. ఘాట్‌ వద్ద బారికేడ్లు ఏర్పాటు చేశారు. డీజేలు, రంగులు చల్లుకునేందుకు అనుమతులు ఇవ్వడం లేదు.
ఇదీ చదవండి:
