Snake Catcher Died: కర్ణాటకలో విషాద ఘటన జరిగింది. నాగుపామును సంరక్షించే క్రమంలో కాటుకు గురైన ఓ వ్యక్తి.. చికిత్స పొందుతూ మరణించాడు. దీంతో అతడి కుటుంబంలో విషాద ఛాయలు అలుముకున్నాయి.
అసలేం జరిగిందంటే.. నెలమంగళలోని మారుతీనగర్​కు చెందిన లోకేశ్​.. చుట్టుపక్క ప్రాంతాల ప్రజలు ఫోన్​ చేస్తే పాములను సంరక్షించడానికి వెళ్లేవాడు. అందుకే అందరూ అతడిని స్నేక్​ లోకేశ్ అని పిలుస్తుంటారు. అయితే ఆగస్టు 17న డాబస్​ పట్టణం నుంచి లోకేశ్​కు కాల్​ వచ్చింది. వెంటనే వెళ్లిన అతడు అక్కడ బుసలు కొడుతున్న ఓ నాగుపామును పట్టుకునేందుకు ప్రయత్నించాడు. కానీ అదే సమయంలో ఆ సర్పం.. లోకేశ్​ కుడి చేతి వేలిపై కాటు వేసింది.

నాగు పామును పట్టుకుంటున్న లోకేశ్​

వెంటనే స్థానికులు అతడిని నెలమంగళ ప్రైవేట్​ ఆస్పత్రికి తీసుకెళ్లారు. అక్కడి నుంచి అత్యవసర చికిత్స నిమిత్తం బెంగళూరు మణిపాల్​ హాస్పిటల్​కు తరలించారు. అప్పటి నుంచి చికిత్స పొందుతున్న లోకేశ్​.. మంగళవారం మరణించాడు. అతడికి భార్య, ఇద్దరు పిల్లలు ఉన్నారు. నెలమంగళలో చిన్న హోటల్​ నడుపుకుని జీవనం కొనసాగిస్తున్నాడు. కొన్ని సీరియల్స్​లో కూడా నటించాడు. పర్యావరణ, వన్యప్రాణుల ప్రేమికుడైన లోకేశ్​​ ఇప్పటివరకు సుమారు 35,000 పాములను పట్టుకుని అడవిలో విడిచిపెట్టాడు. పాములు పట్టుకునేటప్పుడు జాగ్రత్తగా ఉండటం చాలా అవసరమని వైద్యులు సూచిస్తున్నారు.

సర్పాన్ని పట్టుకుంటున్న లోకేశ్​

ఇవీ చదవండి: ప్రభుత్వం సకాలంలో నిర్ణయాలు తీసుకోవట్లేదని గడ్కరీ విమర్శలు

ప్రభుత్వానికి దంపతులను విడదీసే అధికారం లేదు