దేశవ్యాప్తంగా హిందువులు మహాశివరాత్రి పర్వదినాన్ని జరుపుకుంటున్న వేళ జమ్ముకశ్మీర్లోని ఓ శివాలయంలో జ్యోతి వెలిగించాడు ఓ ముస్లిం వ్యక్తి. షోపియన్లోని తీరథ్ రాజ్ కపల్ మోచన్ దేవగమ్లో గురువారం భారీ వర్షాన్ని సైతం లెక్కచేయక.. ఆలయంలో దీపాలు వెలిగించాడు గులాం ఖాదిర్ షేక్. ఆ గుడి సంరక్షకుడిగా వ్యవహరిస్తున్నాడు.
పర్యాటక శాఖ కొన్నేళ్ల క్రితం తనను రెండు నెలలపాటు ఆలయ పరిరక్షణ చూసుకోవాలని, అందుకు కొంత మొత్తాన్ని ఇవ్వడానికి అంగీకరించిందని ఖాదిర్ చెప్పారు. అయితే తాను ఆ తర్వాత కూడా గుడికి రావడం మానలేదని వివరించారు.
"నాకు ఎవరూ డబ్బులు ఇవ్వకపోయినా.. ఇప్పటికీ ఆలయాన్ని చూసుకుంటున్నా. ఒక కశ్మీరీగా నా పండిట్ సోదరుల పట్ల అది నా బాధ్యత అని భావిస్తాను.హెరాత్ (శివరాత్రి) సందర్భంగా ఈ రోజు కశ్మీరీ పండిట్ భక్తులెవరూ గుడికి రావడం నేను చూడలేదు. అందుకే వచ్చి దీపాలు వెలిగించాను. "
-గులాం ఖాదిర్ షేక్, ఆలయ సంరక్షుడు
శివరాత్రిని 'హెరాత్'గా జరుపుతారు కశ్మీరీ పండిట్లు. మూడు రోజులపాటు నిర్వహిస్తారు.
ఇతర మతాలను గౌరవించాలి..
సర్వ మతాలు సమానమే అని చాటుతున్నారు ఉత్తర్ప్రదేశ్కు చెందిన బాబూఖాన్. ఇతర మతాల్లో ఆలయాలను నిర్మించిన తన పూర్వీకుల వారసత్వాన్ని ఆయన పుణికిపుచ్చుకున్నారు.
దాదాపు రూ.లక్ష ఖర్చు చేసి 2013లో అలీగఢ్లో శివాలయాన్ని నిర్మించారు బాబు. అప్పటినుంచి అక్కడ పూజలు నిర్వహిస్తున్నారు. ఎవరి మతాలను వారు పాటిస్తూనే ఇతర మతాలనూ గౌరవించాలని ప్రజలకు విజ్ఞప్తి చేస్తున్నారు.
ఇదీ చూడండి: అబ్బురపరిచే సూక్ష్మ కళ.. సీసాలో హరుని కోవెల
