సాధారణంగా ఎవరికైనా లాటరీ తగిలితే ఏం చేస్తారు..? ఎగిరి గంతేస్తారు.. ఇంటికి వెళ్లి ఈ విషయాన్ని తమ కుటుంబ సభ్యులతో పంచుకుంటారు. కానీ, బంగాల్కు చెందిన ఓ కార్మికుడు మాత్రం రూ.75 లక్షల లాటరీ వచ్చిందన్న భయంతో పోలీస్ స్టేషన్ను ఆశ్రయించాడు.
ఇదీ జరిగింది
ముర్షిదాబాద్ జిల్లాకు చెందిన ఎస్‌కే బాదేశ్ ఓ దినసరి కూలీ. కొద్ది నెలల క్రితం పొట్ట కూటి కోసం కేరళ ఎర్నాకులం జిల్లాలోని చొట్టానికర ప్రాంతానికి వచ్చి రోడ్డు నిర్మాణ పనులు చేసుకుంటూ జీవనం సాగిస్తున్నాడు. అయితే బాదేశ్కు తరచూ లాటరీ టిక్కెట్లు కొనే అలవాటు ఉంది. కానీ, ఒక్కసారి కూడా గెలవలేదు. కేరళ రాష్ట్ర ప్రభుత్వానికి సంబంధించి స్త్రీ-శక్తి అనే లాటరీ టిక్కెట్ను ఇటీవలే కొనుగోలు చేశాడు. మంగళవారం రాత్రి లాటరీ డ్రాను తీశారు నిర్వాహకులు. ఈ డ్రాలో మొదటగా ఎస్ఆర్ 570994 అనే సంఖ్యతో ఉన్న టిక్కెట్ బాదేశ్ పేరుతో రావడం వల్ల రూ.75,00,000 ప్రైజ్ మనీని గెలుపొందాడు బాదేశ్.
లాటరీ గెలవడం వల్ల ఆనంద పడ్డ బాదేశ్.. ఆ తర్వాత భయపడ్డాడు. తనకు వచ్చిన లాటరీ టిక్కెట్ను ఎవరైనా తనను బెదిరించి ఎత్తుకెళ్తారేమోనని అనుమానించాడు. ఈ కారణంతోనే బాదేశ్ స్థానికంగా ఉండే మువట్టుపుఝా పోలీస్ స్టేషన్కు పరుగులు తీశాడు. అనంతరం అక్కడున్న పోలీసులను తనకు లాటరీ డబ్బుకు రక్షణ కల్పించమని కోరాడు. అయితే బాదేశ్ స్టేషన్కు రావడానికి గల కారణాన్ని తెలుసుకున్న పోలీసులు ఒక్కసారిగా షాక్కు గురయ్యారు.
అయితే బాదేశ్కు వచ్చిన లాటరీ టిక్కెట్ను ఎలా క్లెయిమ్ చేసుకోవాలనే తెలీయదని.. దానిని ఎవరైనా అపహరిస్తారనే భయంతోనే తమ వద్దకు వచ్చినట్లు కేరళ పోలీసులు తెలిపారు. బాదేశ్ బాధను అర్థం చేసుకున్న పోలీసులు లాటరీకి సంబంధించి పూర్తి విధివిధానాలను క్లుప్తంగా అతడికి వివరించారు. దాన్ని బ్యాంక్లో ఎలా డిపాజిట్ చేసుకోవాలో అని పోలీసులు బాదేశ్కు చెప్పారు. అంతేగాక అతడికి రక్షణ కల్పిస్తామని పోలీసులు హామీ ఇచ్చారు. చివరకు పోలీసులిచ్చిన ధైర్యంతో బాదేశ్ క్షేమంగా లాటరీతో ఇంటికి చేరుకున్నాడు. కాగా, బాదేశ్ ఇంత భారీ మొత్తంలో ప్రైజ్ మనీ గెలుచుకోవడం ఇదే తొలిసారి. ఇక ఈ డబ్బు చేతికొచ్చాక తన స్వగ్రామానికి వెళ్లి తన సొంతింటికి మరమ్మతులు చేయిస్తానని.. అలాగే తన వ్యవసాయాన్ని కూడా విస్తరించుకుంటానని బాదేశ్ తెలిపాడు.
వృద్ధుడికి రూ.5 కోట్ల జాక్పాట్..
పంజాబ్కు చెందిన మహంత్ ద్వారకా దాస్ అనే వృద్ధుడిని అక్షరాల రూ.5 కోట్ల లాటరీ వరించింది. దీంతో అతడు రాత్రికి రాత్రే కోటీశ్వరుడయ్యాడు. పూర్తి వివరాల కోసం ఈ లింక్పై క్లిక్ చేయండి.
