రూ.కోట్లు కురిపిస్తున్న కేరళ లాటరీ.. మనం కొనచ్చా?.. రూల్స్ ఏంటో తెలుసా?

author img

By

Published : Sep 21, 2022, 3:26 PM IST

kerala lottery

'ఆటో డ్రైవర్​కు లాటరీలో రూ.25 కోట్లు'.. 'ఓనం లాటరీలో రూ.12 కోట్ల జాక్​పాట్'.. 'కూలీపై కనకవర్షం'.. ఇలాంటి వార్తలు చదివినప్పుడల్లా.. రెండు క్షణాలు ఆశ్చర్యపోయి.. 'అరెరే.. ఇలాంటి లక్కీ డే మనకెప్పుడు వస్తుందో?' అని చాలా మంది అనుకునే ఉంటారు! ఒక్కసారైనా అదృష్టం పరీక్షించుకోవాలని భావించే ఉంటారు. మరి ఎప్పుడైనా లాటరీ టికెట్ కొనేందుకు నిజంగా ప్రయత్నించారా? ఎలా కొనాలో.. ఎక్కడ కొనాలో తెలుసా?.. తెలియకపోతే మేం చెబుతాం రండి...

Kerala lottery: కేరళలో లాటరీలు రూ.కోట్లు కురిపిస్తున్నాయి. టికెట్ కొన్నవారికి కళ్లుచెదిరే ప్రైజ్ మనీని కట్టబెడుతున్నాయి. వందలు పెడితే రూ.కోట్లు వచ్చిపడుతున్నాయి కాబట్టి సాధారణంగానే దీనిపై అందరికీ ఆసక్తి ఉంటుంది. ఇటీవల ఈ ఆసక్తి ఇంకా ఎక్కువైంది. దేశవ్యాప్తంగా దీనిపై చర్చ మొదలైంది. కేరళ ప్రభుత్వం విక్రయిస్తున్న ఈ లాటరీల గురించి అందరూ ఆరా తీస్తున్నారు. టికెట్లు ఎలా కొనలానే విషయంపై గూగుల్​లో తెగ వెతికేస్తున్నారు. ఈ నేపథ్యంలో లాటరీకి సంబంధించిన వివరాలు ప్రశ్నలు-సమాధానాల రూపంలో మీకోసం..

కేరళ ప్రభుత్వం విక్రయిస్తున్న లాటరీలు ఇతర రాష్ట్రాల ప్రజలు కొనుక్కోవచ్చా..?
ప్రస్తుతం అమలులో ఉన్న ఆ రాష్ట్ర 'లాటరీ రెగ్యులేషన్ చట్టం' ప్రకారం కేరళ వెలుపల లాటరీ టికెట్లు విక్రయించడం నిషిద్ధం. అయితే ఇతర రాష్ట్రాల ప్రజలు కేరళకు వచ్చి లాటరీలు కొనుక్కోవచ్చు. ప్రైజ్ మనీ గెలుచుకుంటే సంబంధిత డాక్యుమెంట్లు చూయించి డబ్బు కలెక్ట్ చేసుకోవచ్చు.

Kerala Lottery
లాటరీ టికెట్...

లాటరీ టికెట్లను ఆన్​లైన్​లో కొనుక్కోవచ్చా?
Kerala lottery online: లాటరీ రూల్స్ ప్రకారం.. ఆన్​లైన్​లో లాటరీలు కొనడం చట్టవిరుద్ధం. క్యాష్ ప్రైజ్​ను గెలుచుకునేందుకు భౌతిక టికెట్ ఉండటం తప్పనిసరి. టికెట్లు విక్రయిస్తాం అంటూ కొన్ని వాట్సాప్ గ్రూపులు సైతం వెలిశాయి. వీరిలో ఎవరైనా నిజమైన టికెట్లు అమ్మేవారు ఉన్నా.. దీనికి చట్టబద్ధత అంటూ లేదు. ఈ వాట్సాప్ విక్రయాలు నమ్మకంపైనే ఆధారపడి ఉంటాయి. వీరు మోసం చేసినా.. బాధితులకు ప్రభుత్వం నుంచి రక్షణ ఉండదు. వాట్సాప్​లో కొనుగోలు చేసినా.. వాటి ఒరిజినల్ టికెట్​ను సమర్పిస్తేనే ప్రైజ్ మనీ ఇస్తారు.

Kerala Lottery
లాటరీ టికెట్

ప్రైజ్ మనీ కోసం సమర్పించాల్సిన డాక్యుమెంట్లు?

  • ఒరిజినల్ లాటరీ టికెట్
  • ఫామ్ నెం.8పై స్టాంప్ వేసిన రసీదు
  • పాస్​పోర్టు సైజ్ ఫొటోలు అతికించి, దానిపై గెజిటెడ్ అధికారి సంతకం చేసిన నోటరీ (రెండు కాపీలు)
  • ఫొటోకాపీలు అతికించి ఉన్న టికెట్
  • ప్రభుత్వ గుర్తింపు పత్రాలు (పాస్​పోర్ట్/ రేషన్ కార్డు/ ఓటర్ కార్డు/ డ్రైవింగ్ లైసెన్స్/ పాన్ కార్డు)
  • వీటితో పాటు ప్రైజ్ మనీ గెలిచిన వ్యక్తి నుంచి ధ్రువీకరణ పత్రం, బ్యాంకు పత్రాలు సమర్పించాల్సి ఉంటుంది.
    Kerala Lottery
    .

కేరళ ప్రభుత్వం ఏఏ రకాల లాటరీలు విక్రయిస్తోంది?
Kerala lottery chart: వారంలో ప్రతిరోజూ లాటరీ డ్రాలు ఉంటాయి. సోమవారం- అక్షయ; మంగళవారం- కారుణ్య; బుధవారం- కారుణ్య ప్లస్; గురువారం- నిర్మల్; గురువారం- స్ట్రీశక్తి; శనివారం- విన్​విన్; ఆదివారం- ఫిఫ్టీఫిఫ్టీ పేర్లతో డ్రాలు నిర్వహిస్తారు. ఫిఫ్టీఫిఫ్టీ లాటరీ గెలిచినవారికి రూ.కోటి ఇస్తారు. రోజూవారీ లాటరీలలో అధిక ప్రైజ్ ఉన్నది దీనికే.

Kerala Lottery
.

వీటికి అదనంగా ఏడాదికి ఆరు బంపర్ లాటరీలు ఉంటాయి. బంపర్ లాటరీల్లో భారీగా క్యాష్ ప్రైజ్ గెలుచుకునే అవకాశం ఉంటుంది. మాన్​సూన్ బంపర్, పూజ బంపర్, సమ్మర్ బంపర్, తిరువోనం బంపర్, విశు బంపర్, క్రిస్మస్ న్యూఇయర్ బంపర్ పేర్లతో ఈ లాటరీలు ఉంటాయి.

ఈ లాటరీ విక్రయాల ద్వారా వచ్చిన మొత్తాన్ని సామాజిక కార్యక్రమాలకే వెచ్చిస్తుంది కేరళ సర్కారు. ఒక్కో రకం లాటరీపై వచ్చిన ఆదాయాన్ని.. ఒక్కో ప్రత్యేక కార్యక్రమానికి కేటాయిస్తుంది. ఉదాహరణకు కారుణ్య లాటరీ టికెట్ ద్వారా వచ్చే మొత్తాన్ని పేదలకు ఉచిత వైద్యం అందించేందుకు, స్త్రీశక్తి లాటరీ ఆదాయాన్ని మహిళా సాధికారత ప్రాజెక్టుల కోసం ఖర్చు చేస్తుంది.

ఈ లాటరీ టికెట్ల ప్రింటింగ్, విక్రయానికి ఎవరు బాధ్యత వహిస్తారు?
కేరళ ప్రభుత్వంలో ఉన్న లాటరీ శాఖ ఈ టికెట్ల ప్రింటింగ్, విక్రయాలను పర్యవేక్షిస్తుంది. టికెట్ల ప్రింటింగ్​ లాటరీ డైరెక్టర్ అధీనంలో ఉంటుంది. ప్రభుత్వ ప్రెస్​లోనే టికెట్లు ప్రింట్ చేస్తారు. కమీషన్ ఆధారంగా లాటరీ ఏజెంట్లు టికెట్లు విక్రయిస్తారు. టికెట్​పై సీరియల్ నెంబర్, టికెట్ ధర, ప్రైజ్ మనీ వివరాలు, డ్రా తేదీ, మోసాలకు తావులేకుండా ఓ బార్​కోడ్​ను టికెట్​పై ముద్రిస్తారు.

Kerala Lottery
.

ప్రైజ్ మనీ ఎలా కలెక్ట్ చేసుకోవాలి?
Kerala lottery result: కేరళ రాజధాని తిరువనంతపురంలో లాటరీ టికెట్ 'డ్రా'లు నిర్వహిస్తారు. ప్రైజ్ మనీ రూ.5వేల వరకు ఉంటే లాటరీ ఏజెంట్ దగ్గరే నగదు తీసుకోవచ్చు. రూ.లక్ష లోపు ప్రైజ్ మనీని జిల్లా లాటరీ అధికారి నుంచి తీసుకోవచ్చు. అంతకుమించి ప్రైజ్ మనీ ఉంటే.. జాతీయ బ్యాంకులను ఆశ్రయించాలి. ఒరిజినల్ టికెట్ సహా పైన పేర్కొన్న డాక్యుమెంట్లు, వివరాలు బ్యాంకర్లకు సమర్పించాలి. ఆదాయ పన్ను, ఏజెంట్ కమీషన్​ మినహాయించుకున్న తర్వాత మిగిలిన డబ్బును బ్యాంకు ఖాతాలో జమా చేస్తారు.

ఇంకో ముఖ్యమైన విషయం..,
విన్నింగ్ టికెట్​ను 'డ్రా' తీసిన 90 రోజుల్లోగా బ్యాంక్ అధికారులకు సమర్పించాల్సి ఉంటుంది. 90 రోజులు దాటితే టికెట్​ చెల్లదు. పదేపదే టికెట్ కొని విసిగిపోయిన వారు.. 'డ్రా' ఫలితాలను చెక్ చేసుకోకుండా ఉంటే అంతే సంగతులు! ఒక్కోసారి అదృష్టం తలుపు తడుతుందంటారుగా... అప్పుడు తలుపు తీయాల్సిన బాధ్యత మనదే!!!

రీసెంట్ విన్నర్ వీరే...
ఇటీవలే ఓ ఆటో డ్రైవర్ ఓనం బంపర్ లాటరీలో రూ.25 కోట్లు గెలుచుకున్నాడు. టికెట్ కొనుగోలు చేసిన మరుసటి రోజే డ్రాలో ఆయన విజేత అని తేలింది. మలేసియా వెళ్లేందుకు సిద్ధమైన అతడు.. వెంటనే మనసు మార్చుకున్నాడు. ఈ లింక్​పై క్లిక్ చేసి ఆయన కథేంటో మీరూ చదివేయండి..

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.