Gaganyaan program: గగన్యాన్ ప్రయోగంలో కీలక ముందడుగు పడింది. ఇందుకోసం ఉపయోగించే క్రయోజనిక్ ఇంజిన్ను బుధవారం విజయవంతంగా పరీక్షించింది భారత అంతరిక్ష పరిశోధన సంస్థ ఇస్రో. తమిళనాడు, మహేంద్రగిరిలోని ఇస్రో ప్రొపల్సన్ కాంప్లెక్స్లో 720 సెకన్ల పాటు పరీక్షించినట్లు తెలిపింది. ఇందులో ఇంజిన్ పనితీరు లక్ష్యాలను చేరుకుందని, ముందుగా నిర్ణయించుకున్న అంచనాలను అందుకున్నట్లు పేర్కొంది.
"ఈ దీర్ఘకాల పరీక్ష విజయవంతం కావటం గగన్యాన్ ప్రాజెక్టులో కీలక మైలురాయి. ఈ టెస్ట్.. గగన్యాన్ లాంచ్ వెహికిల్లో ఉపయోగించే క్రయోజనిక్ ఇంజిన్ విశ్వసనీయతను, పటిష్ఠతను నిర్ధరిస్తుంది."
- ఇస్రో.
ఈ క్రయోజనిక్ ఇంజిన్ సుమారు 1810 సెకన్ల పాటు జరిగే మరో నాలుగు పరీక్షలను ఎదుర్కోనుందని తెలిపింది ఇస్రో. దీంతో పాటు మరో ఇంజిన్ రెండు స్వల్ప కాలిక పరీక్షలను, ఒక దీర్ఘకాలిక పరీక్షను ఎదుర్కొంటుందని, ఈ టెస్టులతో గగన్యాన్ కార్యక్రమంలోని ఇంజిన్ల అర్హత తెలుసుకునే ప్రక్రియ పూర్తవుతుందని స్పష్టం చేసింది.
గగన్యాన్ ప్రాజెక్టు డిజైన్ ప్రక్రియ పూర్తయిందని, పరీక్షల దశలోకి ప్రవేశించామని కొద్ది రోజుల క్రితమే ఇస్రో ఛైర్మన్ కే శివన్ వెల్లడించారు. భారత 75వ స్వాతంత్ర్య దినోత్సవం 2022, ఆగస్టు 15లోపే మానవ రహిత గగన్యాన్ ప్రయోగం చేపడతామన్నారు. గడువులోపే చేపట్టేందుకు అంతా తీవ్రంగా శ్రమిస్తున్నట్లు చెప్పారు. ఆ లక్ష్యాన్ని కచ్చితంగా చేరుకుంటామని ధీమా వ్యక్తం చేశారు.
ఇదీ చూడండి:
