మయన్మార్ నుంచి భారత్లోకి అక్రమంగా తరలిస్తున్న రూ.11.65 కోట్ల విలువైన 23.23 కిలోల బంగారాన్ని డైరక్టరేట్ ఆఫ్ రెవెన్యూ ఇంటిలిజెన్స్(డీఆర్ఐ) అధికారులు స్వాధీనం చేసుకున్నారు. ఈ కేసులో నలుగుర్ని అరెస్ట్ చేశారు.
అధికారుల సమాచారం ప్రకారం.. గత నెల 28-29న డీఆర్ఐ అధికారులు సెర్చ్ ఆపరేషన్ చేపట్టారు. శిలిగుడి- గువాహటి ప్రాంతంపై ప్రత్యేక దృష్టి పెట్టారు. అదే సమయంలో ఆ మార్గంలో నలుగురు వ్యక్తులు రెండు వాహనాల్లో ప్రయాణిస్తున్నారు. అనుమానం వచ్చిన అధికారులు.. వాహనాలను ఆపి రెండు రోజుల పాటు తనిఖీలు చేపట్టారు. వాహనం లోపలి భాగంలో 23.23 కిలోల బంగారాన్ని 21 భాగాలు చేసి దాచినట్లు గుర్తించారు.
వాహనం వెనుక భాగంలో ఉన్న రెండు చక్రాలను కలిపే క్రాస్-మెంబర్ మెటల్ పైపు లోపల బంగారాన్ని దాచారు స్మగ్లరు. ఈ కేసులో ఇప్పటి వరకు నలుగురిని అరెస్టు చేశారు. మొత్తంగా.. సెప్టెంబర్ నెలలో ఈశాన్య కారిడార్‌లో 121 కిలోల బంగారాన్ని స్వాధీనం చేసుకున్నట్లు అధికారులు తెలిపారు. 11 కేసులు నమోదు చేసినట్లు వెల్లడించారు.
పాక్ సరిహద్దులో హెరాయిన్ ప్యాకెట్లు..
పంజాబ్లోని అమృత్సర్ సరిహద్దులో నాలుగు హెరాయిన్ ప్యాకెట్లను బీఎస్ఎఫ్ దళాలు స్వాధీనం చేసుకున్నాయి. దీంతో పాటు 9 మి.మీ 50 లైవ్ క్యాట్రిడ్జ్లను కూడా స్వాధీనం చేసుకున్నాయి. పాకిస్థాన్ వైపు నుంచి ముళ్ల తీగ ద్వారా దుండగులు ఈ హెరాయిన్ ప్యాకెట్లను విసిరారని బీఎస్ఎఫ్ దళాలు తెలిపాయి.
ఇవీ చదవండి: ఆస్పత్రిలో ఘోర అగ్నిప్రమాదం.. డైరెక్టర్ ఫ్యామిలీలో ముగ్గురు సజీవదహనం!
