'స్టాగ్తో ఎంట్రీ లేదంటూ నో ఎంట్రీ బోర్డే పెట్టారురో' అంటూ ఓ చిత్రంలో కథానాయకుడి పరిస్థితిని వివరించాడు ఒక సినిమా కవి. అందులో అమ్మాయిలు లేకపోతే పబ్లోకి ఎంట్రీ ఉండదు. దానికి కొంచెం భిన్నంగా అచ్చం అలాంటి ఘటనే ఒకటి జరిగింది. ఆ కథానాయకుడికి వచ్చిన పరిస్థితే ఇక్కడ అమ్మాయిలకు వచ్చింది. బాయ్ఫ్రెండ్లు ఉంటేనే అమ్మాయిలు కాలేజీకి రావాలని.. లేదంటే అనుమతించబోమని చెప్పారు. ఇక్కడ నో ఎంట్రీ బోర్డు బదులు.. ఓ నోటీసు జారీ చేశారు!. ఈ ఘటన ఒడిశాలో జరిగింది.
జగత్సింగ్పుర్ జిల్లాలోని జగత్సింగ్పుర్ స్మామీ వివేకనందా మెమోరియల్ అటోనమస్ కాలేజీ అనే పేరుతో ఓ నోటీసు సామాజిక మాధ్యమాల్లో వైరల్ అయింది. అందులో ఆడపిల్లలు బాయ్ ఫ్రెండ్స్తో కాలేజీకి రావాలని చెప్పారు. బాయ్ఫ్రెండ్ లేకుంటే కళాశాలలోకి అనుమతించేది లేదని అందులో ఆజ్ఞాపించారు. " ఫిబ్రవరి 14వ తేదీ వరకు అందరు అమ్మాయిలకు కనీసం ఒక్క బాయ్ ఫ్రెండ్ అయినా ఉండాలి. భద్రతా కారణాలు దృష్ట్యా ఇది చేస్తున్నాం. సింగిల్ గర్ల్స్ను కాలేజీ పరిసరాల్లోకి అనుమతించరు. వారు తమ బాయ్ ఫ్రెండ్తో దిగిన లేటెస్ట్ ఫొటో చూపించాలి. ప్రేమను పంచండి" నోటీసులో రాసుకొచ్చారు. ఆ నోటీసుపై ఆ కాలేజీ ప్రిన్సిపాల్ సంతకం కూడా ఉండటం గమనార్హం.
అయితే ఈ ఘటనపై సమాచారం అందుకున్న ఆ కాలేజీ ప్రిన్సిపల్ విజయ్ కుమార్ పాత్రా పోలీసులకు ఫిర్యాదు చేశారు. "నా పేరు మీద ఓ తప్పుడు నోటీసు చక్కర్లు కొడుతోంది. అది పూర్తిగా అవాస్తవం. దాని గురించి మాట్లాడటం.. దాన్ని ఓ వార్తగా ప్రచారం చేయడం మంచిది కాదు. అది మా కాలేజీ నుంచి జారీ అయిన సర్క్యులర్ కాదు. ఆ నోటీసుపై ఉంది మా లెటర్ హెడ్ కాదు. కొంతమంది కావాలనే మా కళాశాల పేరును చెడగొట్టడానికి ఈ పని చేశారు" అని ఫిర్యాదులో పేర్కొన్నారు. ఈ ఘటనపై దర్యాప్తు ప్రారంభించామని పోలీసులు తెలిపారు.
