కాంగ్రెస్​కు సంపూర్ణ మద్దతు.. అఖిలేశ్ కీలక ప్రకటన

author img

By

Published : Jan 15, 2022, 5:50 PM IST

Updated : Jan 15, 2022, 10:05 PM IST

Akhilesh Yadav News

Akhilesh Yadav News: ఉత్తర్​ప్రదేశ్​ అసెంబ్లీ ఎన్నికలు జరగనున్న వేళ.. ఉన్నావ్​ నియోజకవర్గంలో తమ పార్టీ పోటీ చేయదని ప్రకటించారు సమాజ్​వాదీ పార్టీ అధినేత అఖిలేశ్​ యాదవ్​. కాంగ్రెస్​ అభ్యర్థి ఆశా సింగ్​కు మద్దతుగా ఈ నిర్ణయం తీసుకున్నట్లు పేర్కొన్నారు. ఇకపై భాజపా నేతలను తమ పార్టీలోకి చేర్చుకోమని స్పష్టం చేశారు అఖిలేశ్.

Akhilesh Yadav News: యూపీలో ఎన్నికలు సమీపిస్తున్న వేళ కాంగ్రెస్​కు మద్దతుగా నిలిచింది సమాజ్​వాదీ పార్టీ. ఉన్నావ్​ నియోజకవర్గంలో కాంగ్రెస్​కు మద్దతుగా ఎస్​పీ.. పోటీ నుంచి తప్పుకుంటున్నట్లు ప్రకటించారు ఆ పార్టీ అధ్యక్షులు అఖిలేశ్​ యాదవ్​. కాంగ్రెస్ అభ్యర్థిగా బరిలో నిలిచిన ఉన్నావ్ అత్యాచార కేసు బాధితురాలి తల్లి ఆశా సింగ్​కు ఎస్​పీ అడ్డురాదని స్పష్టం చేశారు. ఆమెకు తమ పార్టీ సంపూర్ణ మద్దతు ఇస్తుందని తెలిపారు.

ఎంట్రీలు బంద్​..

గత కొద్ది రోజులుగా భాజపా నుంచి ఎస్​పీలోకి ఫిరాయింపులు జరుగుతున్న నేపథ్యంలో ఆసక్తికర వ్యాఖ్యలు చేశారు అఖిలేశ్​ యాదవ్​. ఇకపై భాజపా ఎమ్మెల్యేలను, మంత్రులను తమ పార్టీలోకి చేర్చుకునేది లేదని స్పష్టం చేశారు. కావాలంటే తమ నేతలకు భాజపా టికెట్లు నిరాకరించుకోవచ్చు అని పేర్కొన్నారు.

స్వామి ప్రసాద్​ మౌర్య, భగవతి సాగర్​, వినయ్​ శక్యా, రోషన్​ లాల్​ వర్మ, ముకేశ్​ వర్మ, బ్రజేశ్​ కుమార్​ ప్రజాపతి వంటి కీలక భాజపా నేతలను తమ పార్టీలోకి చేర్చుకున్న కొన్ని గంటలకే అఖిలేశ్​ ఈ ప్రకటన చేయడం ప్రాధాన్యం సంతరించుకుంది.

ఎస్​పీకి ఈసీ నోటీసులు

కొవిడ్​ నిబంధనలు ఉల్లఘించినందుకు గాను సమాజ్​వాదీ పార్టీకి ఎన్నికల సంఘం నోటీసులు జారీ చేసింది. వర్చువల్​ ర్యాలీ పేరుతో లఖ్​నవూలోని పార్టీ కార్యాలయం వద్ద శుక్రవారం భారీగా కార్యకర్తలు గుమిగూడారని ఈసీ పేర్కొంది. ఈ ఉల్లంఘనపై ఎస్​పీ 24 గంటల్లోగా వివరణ ఇవ్వాలని నోటీసులో పేర్కొంది.

ఉత్తర్​ప్రదేశ్​లో ఏడు విడతల్లో శాసనసభ ఎన్నికలు జరగనున్నాయి. ఫిబ్రవరి 10న మొదలై మార్చి 7 వరకు కొనసాగుతాయి. ఫిబ్రవరి- 10, 14, 20, 23, 27 సహా మార్చి- 3,4 తేదీలలో ఎన్నికలు నిర్వహించాలని ఈసీ నిర్ణయించింది.

ఇదీ చూడండి : పంజాబ్​ ఎన్నికలకు కాంగ్రెస్ ఫస్ట్ లిస్ట్​- సోనూ​ సోదరికి టికెట్​

Last Updated :Jan 15, 2022, 10:05 PM IST
ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.