Mount Everest Record: నేపాల్కు చెందిన 52 ఏళ్ల కామీ రీతా అరుదైన రికార్డును సాధించారు. ప్రపంచంలోనే అత్యంత ఎత్తైన పర్వతమైన ఎవరెస్ట్ను 26వ సారి అధిరోహించారు. దీంతో ఆయన రికార్డును ఆయనే తిరగరాశారని యాత్ర నిర్వాహకులు దవా షెర్పా తెలిపారు.
11 మంది సభ్యులతో కూడిన కామీ రీతా బృందం శనివారం సాయంత్రం 6:55 గంటలకు 8,848.86 మీటర్ల ఎత్తుకు చేరుకున్నారని నిర్వాహకులు వెల్లడించారు. ఎవరెస్ట్ అధిరోహించే వారి కోసం తాడులు బిగించడానికి కామీ రీతా.. అంతకుముందే ఒకసారి ఈ సాహస యాత్రను పూర్తిచేశారు. 1953లో న్యూజిలాండ్కు చెందిన సర్ ఎడ్మండ్ హిల్లరీ అధిరోహించిన సంప్రదాయ ఆగ్నేయ శిఖర మార్గం నుంచే ఈ యాత్రను పూర్తిచేశారు.
కొవిడ్ కారణంగా 2020లో నిలిపివేసిన పర్వతయాత్రను నేపాల్ ప్రభుత్వం తాజాగా పునఃప్రారంభించింది. ఈ ఏడాది 316 మంది పర్వతారోహకులకు అనుమతులు జారీ చేసింది నేపాల్ పర్యటక శాఖ. కాగా ఎవరెస్ట్ను ఇప్పటివరకు 10,567 సార్లు అధిరోహించారు. శిఖరాన్ని అధిరోహించే ప్రయత్నంలో చాలా మంది విజయవంతమవగా.. 300 మందికి పైగా ప్రాణాలు కోల్పోయారు. తాజాగా భారత్కు చెందిన నారాయణన్ అనే పర్వాతారోహకులు ప్రాణాలు విడిచారు.
ఇదీ చదవండి: కాంచెన్‌జంగా పర్వతం అధిరోహిస్తూ భారతీయుడు దుర్మరణం
