వాట్సాప్​లో ఫోన్ నంబర్ లేకుండానే చాటింగ్- మీ 'యూజర్‌నేమ్' ఇప్పుడే రిజర్వ్ చేసుకోండి!

Hyderabad: వాట్సాప్ నుంచి బిగ్ అప్డేట్! చాలా రోజులుగా ఎదురుచూస్తున్న యూజర్‌నేమ్ ఫీచర్ ఎట్టకేలకూ తీసుకొచ్చింది. దీంతో ఇక నంబర్ ఇవ్వకుండానే మీ యూనిక్ యూజర్‌నేమ్‌తో చాట్ చేసుకోవచ్చు. కేవలం మీ ప్రొఫైల్‌కు కేటాయించిన ఒక యూనిక్ యూజర్‌నేమ్ ద్వారానే ఇతరులు మిమ్మల్ని సంప్రదించవచ్చు. దీనివల్ల తెలియని వ్యక్తుల నుంచి వచ్చే స్పామ్ మెసేజ్‌లకు అడ్డుకట్ట పడటమే కాకుండా, యూజర్ల వ్యక్తిగత వివరాలకు పూర్తి రక్షణ లభిస్తుంది.

అయితే, ఈ ఫీచర్ 'ఫస్ట్-కమ్, ఫస్ట్-సెర్వ్' (ముందుగా వచ్చిన వారికి ప్రాధాన్యత) ప్రాతిపదికన రోల్ అవుట్ అవుతోంది. అంటే, మీకు నచ్చిన నిర్దిష్టమైన యూజర్‌నేమ్‌ను వేరొకరు సెట్ చేసుకోకముందే, మీరు వెంటనే మీ అకౌంట్‌లో దాన్ని రిజర్వ్ చేసుకోవాల్సి ఉంటుంది. ఆలస్యం చేస్తే మీకు కావలసిన పేరు అందుబాటులో లేకపోవచ్చు. దీంతో మీరు ప్రత్యామ్నాయ పేరును ఎంచుకోవాల్సి వస్తుంది. కాబట్టి, వెంటనే మీ వాట్సాప్ యాప్‌ను లేటెస్ట్ వెర్షన్‌కు అప్‌డేట్ చేసి, ప్రొఫైల్ సెట్టింగ్స్‌లోకి వెళ్లి మీ యూనిక్ యూజర్‌నేమ్‌ను ఇప్పుడే రిజర్వ్ చేసుకోండి.

ఎలా సెట్ చేసుకోవాలి?: లేటెస్ట్ వాట్సాప్ వెర్షన్‌లో Settings > Account > Username విభాగంలోకి వెళ్లడం ద్వారా కేవలం కొన్ని సెకన్లలోనే మీ యూజర్‌నేమ్ క్రియేట్ చేసుకోవచ్చు.

ప్రస్తుతానికి ఈ యూజర్‌నేమ్ రిజర్వేషన్ సదుపాయం వాట్సాప్ వెబ్ (WhatsApp Web) లేదా డెస్క్‌టాప్ (Desktop) వెర్షన్లలో అందుబాటులో లేదు. కాబట్టి, మీకు నచ్చిన యూనిక్ యూజర్‌నేమ్‌ను సురక్షితంగా రిజర్వ్ చేసుకోవడానికి మీ ప్రాథమిక మొబైల్ పరికరాన్ని (Primary Mobile Device) మాత్రమే ఉపయోగించాల్సి ఉంటుంది. అయితే, యూజర్‌నేమ్‌లను రూపొందించడానికి వాట్సాప్ కొన్ని కఠినమైన నిబంధనలను కూడా ఏర్పాటు చేసింది.

వాట్సాప్ యూజర్‌నేమ్ సృష్టించడానికి నియమాలు:

• యూజర్‌నేమ్ 3 నుంచి 35 అక్షరాల లోపు మాత్రమే ఉండాలి.
• వాటిలో కనీసం ఒక అక్షరం (ఆల్ఫాబెటికల్ క్యారెక్టర్) తప్పనిసరిగా ఉండాలి.
• కేవలం అంకెలు లేదా ప్రత్యేక అక్షరాలను ఉపయోగించి 'యూజర్​నేమ్​'లను సృష్టించలేరు.
• మీరు అండర్‌స్కోర్‌లు (_), స్మాల్ లెటర్స్, చుక్కలను (.) ఉపయోగించవచ్చు.
• యూజర్‌నేమ్ "www." తో ప్రారంభం కాకూడదు, అలాగే .com, .in, లేదా .net వంటి డొమైన్ ఎక్స్‌టెన్షన్‌లతో ముగియకూడదు.

యూజర్‌నేమ్ రిజర్వేషన్ ప్రక్రియ ప్రారంభమైనప్పటికీ, ఈ ఫీచర్ పూర్తి స్థాయిలో అందుబాటులోకి రావడానికి కొంత సమయం పడుతుంది. ఈ వారం నుంచి వినియోగదారులు తమకు నచ్చిన యూజర్‌నేమ్‌ను రిజర్వ్ చేసుకోవచ్చు, కానీ దీనిని ఉపయోగించి చాటింగ్ చేయడానికి ఈ ఏడాది చివరకు వరకు వేచి చూడాల్సి ఉంటుంది. రాబోయే నెలల్లో ఈ యూజర్‌నేమ్ ఫీచర్‌ను దశలవారీగా రోల్ అవుట్ చేయనున్నట్లు వాట్సాప్ తెలిపింది. అయితే, "ప్రతి ఒక్కరికీ తమకు నచ్చిన, ప్రాధాన్యత కలిగిన యూజర్‌నేమ్‌ను ఎంచుకునే అవకాశం లభించాలి" అనే ఉద్దేశంతోనే ఈ రిజర్వేషన్ ప్రక్రియను ముందే ప్రారంభించినట్లు సంస్థ స్పష్టం చేసింది.

వ్యక్తిగత గోప్యత (Privacy), డేటా రక్షణను పెంపొందించడమే ఈ సరికొత్త ఫీచర్ ప్రధాన ఉద్దేశం. ఇన్‌స్టాగ్రామ్ లేదా ఇతర ప్రముఖ సోషల్ మీడియా ప్లాట్‌ఫారమ్‌ల తరహాలోనే, ఇకపై వాట్సాప్ వినియోగదారులు తమ మొబైల్ నంబర్‌ను బహిర్గతం చేయకుండా, కేవలం "యూజర్‌నేమ్" (Username) ద్వారా ఇతరులతో సురక్షితంగా కనెక్ట్ అవ్వవచ్చు. కొత్త వ్యక్తులు లేదా వ్యాపార భాగస్వాములు మిమ్మల్ని సంప్రదించాలనుకుంటే, ఫోన్ నంబర్‌తో పనిలేకుండా మీ యూజర్‌నేమ్‌ను శోధించి నేరుగా మెసేజ్ పంపవచ్చు. ముఖ్యంగా డిజిటల్ ప్లాట్‌ఫారమ్‌లలో తమ వ్యక్తిగత నంబర్లను పంచుకోవడానికి ఇష్టపడని వారికి, ప్రొఫెషనల్ కమ్యూనికేషన్‌ను సురక్షితంగా నిర్వహించాలనుకునే వారికి వాట్సాప్ తీసుకొచ్చిన ఈ మార్పు అత్యంత ప్రయోజనకరంగా నిలుస్తుంది.

అదనంగా, అపరిచితుల నుంచి వచ్చే అనవసర మెసేజ్‌లను కంట్రోల్ చేయడానికి వాట్సాప్ 'యూజర్‌నేమ్ కీ' అనే ఆప్షనల్ సెక్యూరిటీ ఫీచర్‌ను కూడా తీసుకువచ్చింది. దీని ప్రకారం, ఎవరైనా మీ యూజర్‌నేమ్‌తో మొదటిసారి మెసేజ్ చేయాలంటే, మీ యూజర్‌నేమ్‌తో పాటు మీరు సెట్ చేసుకున్న ప్రత్యేక 'కీ' కూడా తెలిసి ఉండాలి.

దీని వల్ల లాభం ఏంటి?: గుర్తుతెలియని వ్యక్తులు లేదా స్పామర్లు మీ యూజర్‌నేమ్‌ను ఊహించి నేరుగా చాట్ చేయలేరు. మీ అనుమతి లేని కనెక్షన్‌లను అడ్డుకుని, ప్రొఫైల్ ప్రైవసీని మరింత పటిష్టం చేసే రక్షణ కవచంలా ఈ ఫీచర్ పనిచేస్తుంది.