ఒప్పో ప్రియులకు గుడ్​న్యూస్- ఏకంగా నాలుగు ఫోన్లతో "రెనో 15" సిరీస్ వచ్చేసింది

Hyderabad: చైనీస్ స్మార్ట్‌ఫోన్ తయారీ సంస్థ ఒప్పో భారతదేశంలో తన "రెనో 15" సిరీస్‌ను విడుదల చేసింది. ఈ లైనప్‌లో "రెనో 15c 5G", "రెనో 15 5G", "రెనో 15 ప్రో మినీ 5G", "రెనో 15 ప్రో 5G" అనే నాలుగు మోడళ్లు ఉన్నాయి. వీటి ప్రారంభ వేరియంట్ల ధరలు వరుసగా రూ. 34,999, రూ. 34,999, రూ. 59,999, రూ. 67,999గా ఉన్నాయి. వీటిలో "ప్రో మినీ" మోడల్ రెనో సిరీస్‌లో కొత్తగా చేరింది. ఇది కాంపాక్ట్ డిజైన్‌ను కలిగి ఉంది. మరెందుకు ఆలస్యం భారతదేశంలో ఈ కొత్త లైనప్ స్పెసిఫికేషన్లు, ధర, లభ్యత గురించి వివరంగా తెలుసుకుందాం రండి.

ఒప్పో రెనో 15 సిరీస్ ఫోన్ల వేరియంట్లు, ధరలు:

Oppo Reno 15 Pro Mini 5G in Glacier White Colour Option (Photo Credit- Oppo)

కలర్ ఆప్షన్లు: ఈ సిరీస్​లో "రెనో 15c 5G", "రెనో 15 ప్రో 5G" ఒక్కొక్కటి రెండు విభిన్న రంగులలో లభిస్తాయి. అయితే "స్టాండర్డ్", "ప్రో మినీ" ఒక్కొక్క మోడల్ మూడు రంగు ఎంపికలలో అందుబాటులో ఉంటాయి. అవి:

Top Left - Reno 15c | Bottom Left - Reno 15 | Top Right - Reno 15 Pro Mini | Bottom Right - Reno 15 Pro (Photo Credit- Oppo)

• రెనో 15c 5G: ఆఫ్టర్‌గ్లో పింక్, ట్విలైట్ బ్లూ
• రెనో 15 5G: గ్లేసియర్ వైట్, అరోరా బ్లూ, ట్విలైట్ బ్లూ
• రెనో 15 ప్రో మినీ 5G: గ్లేసియర్ వైట్, క్రిస్టల్ పింక్, కోకో బ్రౌన్
• రెనో 15 ప్రో 5G: సన్‌సెట్ గోల్డ్, కోకో బ్రౌన్

సేల్ వివరాలు: ఈ కొత్త "ఒప్పో రెనో 15" సిరీస్​లో "రెనో 15c 5G" మోడల్ తప్ప మిగిలిన మూడు మోడళ్ల సేల్స్ జనవరి 13, 2026న ప్రారంభం కానున్నాయి. అయితే ప్రత్యేకంగా ఈ "15c 5G" ఫిబ్రవరిలో అందుబాటులోకి వస్తుంది. ఆసక్తి ఉన్నవారు భారతదేశంలో ఫ్లిప్‌కార్ట్, అమెజాన్, ఒప్పో ఇండియా ఆన్‌లైన్ స్టోర్ ద్వారా వీటిని కొనుగోలు చేయొచ్చు.

Oppo Reno 15 Pro Mini 5G in Glacier White Colour Option (Photo Credit- Oppo)

ఒప్పో రెనో 15 సిరీస్ ఫీచర్లు, స్పెసిఫికేషన్లు:

ఈ సిరీస్​లోని "ఒప్పో రెనో 15 ప్రో" 6.78-అంగుళాల ఫుల్ HD+ OLED డిస్​ప్లేను కలిగి ఉంది. ఇది 120Hz అడాప్టివ్ రిఫ్రెష్ రేట్, HDR10+ సర్టిఫికేషన్, స్ప్లాష్ టచ్, గ్లోవ్ టచ్‌కు మద్దతు ఇస్తుంది. ఈ ఫోన్ అల్ట్రా-స్లిమ్ స్క్రీన్ బెజెల్స్, ఫ్లాట్ ఫారమ్ ఫ్యాక్టర్‌ను కలిగి ఉంది. ఇది 80W సూపర్‌వూక్ ఫ్లాష్ వైర్డ్ ఛార్జింగ్, 50W ఎయిర్‌వూక్ ఫ్లాష్ వైర్‌లెస్ ఛార్జింగ్‌కు సపోర్ట్ చేసే 6,500 mAh బ్యాటరీని కలిగి ఉంది.

Oppo Reno 15 Pro 5G in Sunset Gold Colour (Photo Credit- Oppo)

ఇంకా ఈ "ప్రో" మోడల్‌లో ట్రిపుల్ రియర్ కెమెరా సెటప్ ఉంది. ఇందులో 200MP ప్రైమరీ కెమెరా, 50MP 3.5x టెలిఫొటో పోర్ట్రెయిట్ కెమెరా, 50MP అల్ట్రావైడ్ కెమెరా ఉన్నాయి. సెల్ఫీలు, వీడియో కాలింగ్​ల కోసం ఫోన్ ముందు భాగంలో 50MP అల్ట్రావైడ్ సెల్ఫీ కెమెరా ఉంది. ఈ ఫోన్ సరైన స్కిన్ టోన్​ను క్యాప్చర్ చేసే ప్యూర్‌టోన్ టెక్నాలజీతో సహా అనేక ఫొటోగ్రఫీ ఫీచర్లతో వస్తుంది.

ఇది 4nm మీడియాటెక్ డైమెన్సిటీ 8450 చిప్‌సెట్‌తో పనిచేస్తుంది. ఇది 12GB వరకు RAM, 512GB వరకు స్టోరేజ్​తో వస్తుంది. ఈ పరికరం స్మూత్ హై-FPS గేమ్‌ప్లేను అందించేందుకు AI హైపర్‌బూస్ట్ 2.0ను కలిగి ఉంది. ఈ ఫోన్‌లో మెరుగైన నెట్‌వర్క్, వైఫై కనెక్టివిటీ కోసం వరుసగా నెట్‌వర్క్‌బూస్ట్ చిప్ S1, కస్టమ్ X1 చిప్ కూడా ఉన్నాయి.

ఈ ఒప్పో "రెనో 15 ప్రో 5G" ColorOS 16పై పనిచేస్తుంది. ఇది ఏఐ మైండ్ స్పేస్, ఏఐ ట్రాన్స్‌లేట్, ఏఐ కాల్ ట్రాన్స్‌లేటర్ వంటి ఫీచర్లను కలిగి ఉంది. ఈ ఫోన్ దుమ్ము, నీటి నుంచి రక్షణ కోసం IP69 రేటింగ్​తో వస్తుంది.

The Pro Mini model is a New Entrant to The Reno Series (Photo Credit- Oppo)

అదే సమయంలో స్క్రీన్, బ్యాటరీ పరిమాణం మినహా "ఒప్పో రెనో 15 ప్రో మినీ 5G" కూడా "ప్రో" వేరియంట్​లోని అదే స్పెసిఫికేషన్లను కలిగి ఉంది. మరింత కాంపాక్ట్‌గా ఉండేందుకు "ప్రో మినీ" వేరియంట్‌లో 6.31-అంగుళాల డిస్‌ప్లే, 6,200 mAh బ్యాటరీని అందించారు.

Oppo Reno 15 5G in Glacier White Colour Option (Photo Credit- Oppo)

ఇక స్టాండర్డ్ "ఒప్పో రెనో 15 5G" విషయానికి వస్తే, ఇది "ప్రో" వేరియంట్‌ను పోలిన 6.59-అంగుళాల డిస్‌ప్లే, 6,500 mAh బ్యాటరీని కలిగి ఉంది. అయితే ఇందులో వైర్‌లెస్ ఛార్జింగ్​కు సపోర్ట్ లభించదు. కానీ అదే 80W వైర్డ్ ఛార్జింగ్ వేగాన్ని కొనసాగిస్తుంది. ఈ మోడల్ క్వాల్కమ్ స్నాప్‌డ్రాగన్ 7 జెన్ 4 ప్రాసెసర్ ద్వారా పనిచేస్తుంది. ఇంకా ఈ స్టాండర్డ్ వేరియంట్‌లో 200MP ప్రైమరీ కెమెరా స్థానంలో 50MP ప్రైమరీ కెమెరాను అమర్చారు.