5,000 నిట్స్ లోకల్ పీక్ బ్రైట్​నెస్​తో "ఐకూ 15R"- సూర్యకాంతిలో కూడా స్క్రీన్ స్పష్టంగా కన్పిస్తుంది!

Hyderabad: చైనీస్ స్మార్ట్‌ఫోన్ తయారీ సంస్థ ఐకూ ఫ్లాగ్‌షిప్ లైనప్‌లో రెండవ మోడల్‌గా "ఐకూ 15R"ను ఫిబ్రవరి 24న భారతదేశంలో ప్రారంభించనుంది. దీనిలో భాగంగా కంపెనీ ఈ స్మార్ట్​ఫోన్ స్పెసిఫికేషన్‌లు, ఫీచర్లను టీజ్ చేస్తూ వస్తోంది. తాజాగా కంపెనీ ఇప్పుడు ఈ అప్​కమింగ్ స్మార్ట్​ఫోన్ డిస్​ప్లే, కనెక్టివిటీ ఎంపికలు, ఇన్‌గ్రెస్ ప్రొటెక్షన్ (IP) రేటింగ్‌ల గురించి అదనపు వివరాలను వెల్లడించింది.

ఐకూ 15R స్క్వేర్ ఆకారపు మాడ్యూల్ లోపల అమర్చిన డ్యూయల్ రియర్ కెమెరా యూనిట్‌ను కలిగి ఉందని నిర్ధారించింది. లాంఛ్ అనంతరం ఈ ఫోన్ ప్రత్యేకంగా ప్రముఖ ఇ-కామర్స్ ప్లాట్‌ఫామ్ అమెజాన్‌లో కొనుగోలుకు అందుబాటులో ఉంటుంది. ఈ సందర్భంగా ఈ స్మార్ట్​ఫోన్​పై ఇప్పటి వరకూ అందుబాటులో ఉన్న సమాచారంపై ఓ లుక్కేద్దాం రండి.

ఐకూ 15R ఫీచర్లు, స్పెసిఫికేషన్లు: ఈ ఫోన్ 1.5K రిజల్యూషన్‌తో AMOLED డిస్‌ప్లేను కలిగి ఉంటుంది. ఇది 144Hz రిఫ్రెష్ రేట్‌కు మద్దతు ఇస్తుంది. దీని అత్యంత ప్రత్యేకత ఏంటంటే ఇది 5,000 నిట్‌ల వరకు లోకల్ పీక్ బ్రైట్‌నెస్​ను అందిస్తుంది. అంటే ప్రకాశవంతమైన సూర్యకాంతిలో కూడా మనకు ఫోన్ స్క్రీన్ స్పష్టంగా కనిపిస్తుంది. అదనంగా HDR10+ సపోర్ట్ కూడా ఇందులో లభిస్తుంది. ఇది మీ వీడియో వీక్షణ అనుభవాన్ని మెరుగుపరుస్తుంది.

దీని కనెక్టివిటీ ఎంపికలలో బ్లూటూత్ 6, Wi-Fi 7, NFC, USB టైప్-C పోర్ట్, ఇన్‌ఫ్రారెడ్ బ్లాస్టర్ ఉన్నాయి. భద్రత కోసం, ఇది అల్ట్రాసోనిక్ 3D ఫింగర్ ప్రింట్ స్కానర్‌ను కలిగి ఉంది. ఈ ఫోన్ వాటర్, డస్ట్ రెసిస్టెన్సీ కోసం IP68, IP69 రేటింగ్‌ బిల్డ్ క్వాలిటీతో వస్తుంది.

This phone is equipped with Snapdragon 8 Gen 5 along with iQOO Q2 supercomputing chip and network enhancement chip. (Photo Credit- iQOO)

పనితీరు పరంగా "ఐకూ 15R" క్వాల్కమ్ 3nm స్నాప్‌డ్రాగన్ 8 Gen 5 ప్రాసెసర్ ద్వారా శక్తిని పొందుతుంది. ఇది AnTuTuలో 3.5 మిలియన్లకు పైగా స్కోర్‌ను సాధించినట్లు కంపెనీ పేర్కొంది. ఈ ఫోన్ ఐకూ Q2 సూపర్‌కంప్యూటింగ్ చిప్, నెట్‌వర్క్ ఎన్‌హాన్స్‌మెంట్ చిప్‌తో కూడా వస్తుంది. ఇది గేమింగ్, నెట్‌వర్క్ పనితీరును మెరుగుపరుస్తుంది.

ఈ ఫోన్‌లో వేడిని నియంత్రించేందుకు 6.5K ఐస్‌కోర్ VC కూలింగ్ సిస్టమ్‌ను అందిస్తున్నారు. ఇది 10 నిమిషాల్లో ఉష్ణోగ్రతను దాదాపు 15 డిగ్రీల సెల్సియస్ తగ్గించగలదు. వీటన్నింటికీ మించి ఈ ఫోన్ అత్యంత ప్రత్యేక ఫీచర్లలో మరొకటి దాని బ్యాటరీ వ్యవస్థ. ఐకూ 15R 100W ఫాస్ట్ ఛార్జింగ్, బైపాస్ ఛార్జింగ్‌ సపోర్ట్​తో భారీ 7,600mAh బ్యాటరీని కలిగి ఉంటుంది. కేవలం 10 నిమిషాల ఛార్జింగ్​తో ఈ ఫోన్ గంటల తరబడి గేమింగ్, వీడియో వీక్షణ, సోషల్ మీడియా వినియోగానికి సిద్ధంగా ఉంటుందని కంపెనీ పేర్కొంది.

ఐకూ 15R వెనుక భాగంలో డ్యూయల్ కెమెరా సెటప్ ఉంటుంది. దీని మెయిన్ కెమెరాలో 50MP సోనీ LYT-700V సెన్సార్, OIS మద్దతు ఉంటుంది. ఈ స్మార్ట్‌ఫోన్ ఆండ్రాయిడ్ 16 ఆధారంగా OriginOS 6 పై నడుస్తుంది. కంపెనీ దీనికి నాలుగు సంవత్సరాల పాటు OS అప్‌డేట్‌లు, ఆరు సంవత్సరాల భద్రతా అప్‌డేట్‌లను అందిస్తామని హామీ ఇస్తోంది.

కలర్ ఆప్షన్లు: కంపెనీ ఈ అప్​కమింగ్ ఫోన్‌ను డార్క్ నైట్, ట్రయంఫ్ సిల్వర్ అనే రెండు రంగు ఎంపికలలో విడుదల చేయనుంది.

ధర వివరాలు?: ప్రస్తుతానికి కంపెనీ "ఐకూ 15R" స్మార్ట్​ఫోన్​కు సంబంధించి పైన పేర్కొన్న వివరాలను మాత్రమే వెల్లడించింది. దీని ధర, ఆఫర్లతో పాటు ఇతర అధికారిక సమాచారం కోసం లాంఛ్ సమయం వరకు వేచి ఉండాల్సిందే!