యాపిల్ కొత్త సీఈఓగా జాన్ టెర్నస్​- టిమ్ కుక్ స్థానంలో బాధ్యతలు స్వీకరణ!

Apple New CEO :ప్రముఖ టెక్​ దిగ్గజం యాపిల్ కంపెనీ కొత్త సీఈఓగా జాన్​ టెర్నస్​ మంగళవారం బాధ్యతలు స్వీకరించారు. టిమ్​ కుక్ 15 ఏళ్ల సుదీర్ఘ సారథ్యంలో ఐఫోన్​కు వచ్చిన విపరీతమైన ప్రజాదరణ కారణంగా యాపిల్ కంపెనీ విలువ ఏకంగా 4.6 ట్రిలియన్ డాలర్లకు చేరుకుంది. ఈ కీలక సమయంలో ఆ దిగ్గజ కంపెనీ సారథ్య బాధ్యతలు జాన్ టెర్నస్​ చేపట్టడం విశేషం.

2007లో స్టీవ్ జాబ్స్​ మొదటి ఐఫోన్​ను పరిచయం చేశారు. ఆ తర్వాత టెక్​ పరిశ్రమలో కృత్రిమ మేధ (ఏఐ) ఇప్పుడు అతిపెద్ద విప్లవాన్ని తీసుకువచ్చింది. అయితే దాదాపు రెండేళ్ల క్రితం ఏఐ ఫీచర్లు తీసుకువస్తామని యాపిల్ వాగ్దానం చేసింది. కానీ ఆ ఫీచర్లు సకాలంలో తీసుకురాలేక ఇబ్బంది పడిన యాపిల్​, ప్రారంభంలో ఏఐ రేసులో వెనుకబడింది. కానీ ఈ ఏడాది ప్రారంభంలో ఆర్టిఫిషియల్ ఇంటెలిజెన్స్​ ఫీచర్స్ తీసుకురావడంలో కాస్త పురోగతి సాధించింది. ఇందులో భాగంగా తన ప్రత్యర్థులతో పోటీ పడేందుకు వీలుగా, యూజర్ల ప్రైవసీకి, రోజువారి వినియోగానికి ప్రధాన్యత ఇస్తూ 'సిరి' అసిస్టెంట్​ను అప్​గ్రేడ్ చేసింది.

టెర్నస్​ ముందు ఎన్నో సవాళ్లు!
యాపిల్ కొత్త సీఈఓ అయిన జాన్ టెర్నస్​ వాస్తవానికి హార్డ్​వేర్ ఇంజనీరింగ్ రంగానికి చెందినవారు. కానీ ఆయన ఇప్పుడు సాఫ్ట్​వేర్​ వైపు కూడా చూడాల్సి ఉంటుంది. ఇందులో అనేక సరికొత్త సవాళ్లు ఎదుర్కోవాల్సి వస్తుంది. ముఖ్యంగా ఏఐ పోటీలో యాపిల్​ను ముందంజలో ఉంచడంతోపాటు, సప్లై చైన్ సమస్యలను పరిష్కరించాలి. మరీ ముఖ్యంగా రాజకీయ నాయకులతో సంబంధాలను జాగ్రత్తగా నడపాల్సి ఉంటుంది. ముఖ్యంగా అమెరికా అధ్యక్షుడు డొనాల్డ్ ట్రంప్​తో సఖ్యంగా ఉండాల్సి వస్తుంది. ఎందుకంటే యాపిల్ సీఈఓగా పనిచేసేందుకు, కీలక వ్యక్తులతో సంబంధాలను పెంపొందించుకునే సాఫ్ట్​ స్కిల్స్ చాలా అవసరం.

ఆసియా దేశాల్లో యాపిల్​కు భారీ స్థాయిలో మాన్యుఫ్యాక్చురింగ్ సప్లై చైన్ నెట్​వర్క్ ఉంది. అందుకే టిమ్​ కుక్​ ట్రంప్​తో ఉన్న సంబంధాలను జాగ్రత్తగా వాడుకున్నారు. ఆసియా దేశాలను లక్ష్యంగా చేసుకొని ట్రంప్​ వాణిజ్య యుద్ధం (టారిఫ్ వార్​) చేసినప్పటికీ, తమ యాపిల్​ కంపెనీని గట్టెక్కించడంలో టిమ్​ కుక్ సఫలీకృతమయ్యారు. ఇప్పుడు టిమ్ కుక్​ ఎగ్జిక్యూటివ్ ఛైర్మన్​ పాత్రలోకి మారారు. కనుక జాన్​ టెర్నస్​కు సీఈఓ పగ్గాలు అప్పగించినప్పటికీ, ట్రంప్​తో కంపెనీకి ఉన్న మంచి సంబంధాలను అలానే కొనసాగేలా ఆయనను గైడ్ చేసే అవకాశం ఉంది.

జాన్ టెర్నస్ ప్రొఫైల్​
జాన్‌ టెర్నస్‌ 2001లో యాపిల్‌ కంపెనీలో చేరారు. అక్కడ ఆయన హార్డ్‌వేర్‌ ఇంజినీరింగ్‌ విభాగం సీనియర్‌ వైస్‌ ప్రెసిడెంట్‌గా పనిచేశారు టిమ్ కుక్ సారథ్యంలోనే టర్నెస్​ యాపిల్ వాచ్​, ఎయిర్​పాడ్స్​, యాపిల్ విజన్ ప్రో లాంటి ప్రతిష్ఠాత్మక ఉత్పత్తుల తయారీలో తనదైన పాత్రను పోషించారు. అలాగే ఐఫోన్​, ఐప్యాడ్​, మ్యాక్​, ఎయిర్​పాడ్స్​ తదితర ఉత్పత్తుల అభివద్ధిలోనూ ఆయన హస్తం ఉంది. కాలిఫోర్నియాలోని కుపెర్టినోలో ఉన్న యాపిల్ ప్రధాన కార్యాలయంలో వచ్చే వారం జరగనున్న సరికొత్త ఐఫోన్ లాంఛ్​ కార్యక్రమానికి ఆయన ముఖ్య అతిథిగా వ్యవహరించనున్నారు. అంటే సెప్టెంబరు 9న జరగనున్న యాపిల్‌ కార్యక్రమంలో టెర్నస్‌ తొలిసారి సీఈవోగా వేదికపై కనిపించనున్నారని తెలుస్తోంది.

ప్రేమ అలానే ఉంటుంది!
మరోవైపు సీఈఓ బాధ్యతల నుంచి తప్పుకున్న టిమ్ కుక్​ యాపిల్ కంపెనీపై తన ప్రేమను వెలిబుచ్చారు. "రేపటి నుంచి నా పదవి మారుతుంది కానీ ఈ సంస్థపై నాకున్న ప్రేమ ఎప్పటికీ మారదు. నిరంతరం నాకు స్ఫూర్తిగా నిలిచిన వారందరికీ నా ధన్యవాదాలు. దీని తర్వాత నిర్వర్తించాల్సిన బాధ్యతలపై నేను ఎంతో ఉత్సాహంగా ఉన్నాను" అని ఆయన ఎక్స్‌ వేదికగా ఓ పోస్ట్ పెట్టారు. వాస్తవానికి టిమ్ కుక్​ యాపిల్​ను వదలడం లేదు. ఆయన యాపిల్​ ఎగ్జిక్యూటివ్‌ ఛైర్మన్‌గా కొనసాగనున్నారు. సంస్థకు సంబంధించిన కీలక అంశాల్లో తన సహకారం అందించనున్నారు.

అమెరికా కీలక విభాగాలపై చైనా హాకర్ల పంజా: రంగంలోకి దిగి చెక్ పెట్టిన FBI, జస్టిస్ డిపార్ట్‌మెంట్!

'తొలి డార్క్ స్కై' విలేజ్​గా ఉధమల్- 'స్టార్స్​' చూసేందుకు డెస్టినేషన్- 22ఏళ్ల యువకుడి ఆలోచనకు ఫలితం!