ఉదయ్ కృష్ణారెడ్డిని కస్టడీలోకి తీసుకున్న ఉమెన్ సేఫ్టీ వింగ్ - చంచల్‌గూడ జైలు నుంచి కస్టడీకి తరలింపు

Trainee IPS Uday krishnareddy Case Update : ట్రైనీ ఐపీఎస్ ఉదయ్ కృష్టారెడ్డిని ఉమెన్ సేఫ్టీ వింగ్ అధికారులు కస్టడీలోకి తీసుకున్నారు. చంచల్‌గూడ జైలు నుంచి బుధవారం సాయంత్రం కస్టడీకి తరలించారు. ఉదయ్​ను కస్టడీలోకి తీసుకునేందుకు కోర్టు అనుమతిచ్చిన విషయం తెలిసిందే. పోలీస్ కస్టడీలో పలు అంశాలపై అతడిని ప్రశ్నించే అవకాశం ఉంది.

పోలీసు కస్టడీకి అనుమతిచ్చిన కోర్టు : అత్తాపూర్ పోలీస్​స్టేషన్ పరిధిలో ట్రైనీ ఐపీఎస్ అధికారి ఉదయ్​కృష్ణారెడ్డిపై నమోదైన కేసులో కీలక పరిణామం చోటుచేసుకుంది. విచారణలో భాగంగా నిందితుడు ఉదయ్​కృష్ణారెడ్డిని రెండు రోజుల పోలీస్ కస్టడీకి ఇవ్వాలని అత్తాపూర్ పోలీసులు కోర్టును కోరగా, న్యాయస్థానం ఆ అభ్యర్థనను ఆమోదించింది. దీంతో గురువారం, శుక్రవారం రెండు రోజుల పాటు ఉదయ్​ కృష్ణారెడ్డిని పోలీసులు కస్టడీలోకి తీసుకుని విచారించనున్నారు. ఈ కస్టడీలో కేసుకు సంబంధించిన కీలక అంశాలపై ప్రశ్నించి, అవసరమైన ఆధారాలను సేకరించనున్నట్లుగా సమాచారం. కస్టడీ విచారణ అనంతరం నిందితుడిని తిరిగి కోర్టులో హాజరుపరచనున్నారు.

ఇదీ కేసు నేపథ్యం : హైదరాబాద్​ నగరంలోని నేషనల్​ పోలీస్ అకాడమీలో ఓ మహిళా ట్రైనీ ఐపీఎస్​పై లైంగిక వేధింపులు, బ్లాక్​మెయిలింగ్​కు పాల్పడ్డారనే ఆరోపణలపై శిక్షణ ఐపీఎస్​ ఉదయ్​ కృష్ణారెడ్డిపై జులై 18న అత్తాపూర్​ పోలీసుస్టేషన్​లో కేసు నమోదైంది. తనకు ఉదయ్​ కృష్ణారెడ్డి అసభ్యకరమైన మెసేజ్​లు పంపించాడని, తన సెల్​ఫోన్​ లాక్కును పాస్​వర్డ్​ చెప్పాలని బెదిరించాడని ఫిర్యాదులో పేర్కొన్నారు. దీంతో అత్తాపూర్ పోలీస్​ స్టేషన్​లో ఉదయ్​పై పలు సెక్షన్లకింద కేసు నమోదు చేశారు.

మరోవైపు తనపై వచ్చిన ఫిర్యాదులు, ఆరోపణలు అవాస్తవమంటూ ట్రైనీ ఐపీఎస్​ ఉదయ్ కృష్ణారెడ్డి ఇన్​స్టా వేదికగా కొద్దిరోజుల క్రితం పోస్టు చేశారు. చట్టంపై, న్యాయస్థానాలపై తనకు పూర్తిగా నమ్మకం ఉందని, న్యాయం గెలుస్తుందని అతడు పేర్కొన్నారు. అనంతరం మోతీనగర్​లో ఉన్న బంధువుల నివాసానికి వచ్చిన ఉదయ్​ కృష్ణారెడ్డి మద్యం సేవించి అపస్మారక స్థితికి వెళ్లాడు. కానీ అంతకు ముందు ఆత్మహత్యాయత్నం చేసి, ఆస్పత్రి పాలైనట్లుగా ప్రచారం జరిగింది. ఆస్పత్రిలో చికిత్స అనంతరం ఉదయ్​, గత నెల 22వ తేదీన ఆస్పత్రి​ నుంచి డిశ్ఛార్జి అయ్యారు.

కేసు విచారణలో భాగంగా ఉదయ్​ కృష్ణారెడ్డికి నోటీసులు ఇచ్చేందుకు పోలీసులు ప్రయత్నం చేశారు. కానీ నిందితుడు తెలిపిన రెండు అడ్రస్​లలోనూ అతడి ఆచూకీ లభించలేదు. మొబైల్​ కూడా స్విచ్చాఫ్​ వస్తోందని పోలీసులు ఇటీవల తెలిపారు. దీంతో నాలుగు ప్రత్యేక బృందాలను ఏర్పాటు చేసి గాలింపు చర్యలు చేపట్టిన పోలీసులు కొద్దిరోజుల క్రితం అరెస్ట్ చేసి కోర్టులో హాజరుపరచగా న్యాయమూర్తి 14రోజుల రిమాండ్ విధించారు.

ఉదయ్​ కృష్ణారెడ్డికి మరో మహిళతోనూ సన్నిహిత సంబంధం - గదిలో లవ్​ లెటర్స్ లభ్యం​!

మహిళా ఐపీఎస్​పై దాడి జరిగినట్లు నిర్థారణ - శిక్షణ ఐపీఎస్​ ఉదయ్​ కృష్ణారెడ్డి అరెస్ట్​