నా భర్తలా నేను చూసుకోలేను - ఇద్దరు పిల్లలకు విషమిచ్చి తల్లి ఆత్మహత్య

Mother Daughter Died in kalwakurthy : సాధారణంగా ఓ మధ్య తరగతి కుటుంబం ఎలా ఉంటుంది. ఉండటానికి ఇల్లు, చేయడానికి ఒక చిన్న ఉద్యోగం, అలా అలిసిపోయి సాయంత్రం ఇంటికి రాగానే పిల్లలతో ఆటలు, కబుర్లు. ఆ తర్వాత రాత్రి అందరూ కలిసి భోజనం వంటివి చేస్తుంటారు. సెలవు రోజుల్లో మాత్రం సినిమాకో లేక బయటకో వెళుతూ ఉంటారు. ఇలా ఆనందంగా సాగుతున్న ఓ సామాన్యుడి కుటుంబంలో ఊహించని విపత్తు ఎదురైతే వారి జీవితాలు ఎలా మారుతాయి? ఇలానే ఓ సామాన్య కుటుంబంలో అనుకొని సంఘటన జరిగి వారి జీవితాలనే తారుమారు చేసింది. వివరాల్లోకి వెళితే,

మనస్తాపంతో ఇలా : భార్యాభర్తలు ఇద్దరు ముత్యాల్లాంటి పిల్లలతో ఉన్న చిన్న జీవితాన్ని ఆనందంగా గడుపుతున్నారు. ఈ కుటుంబం ప్రశాంతమైన జీవితాన్ని సాగిస్తుండగా ఆ ఇంటి పెద్ద, కడవరకూ తోడుంటానని చెప్పిన భర్త హఠాత్తుగా మరణించాడు. దీంతో ఆ ఇల్లాలు ఏం చేయాలో తెలీక కుంగిపోయింది. తన భర్త మాదిరి పిల్లలను పోషించలేకపోతున్నాను అని కొన్ని రోజులుగా మనోవేదనకు గురైంది.

ఈ క్రమంలో ఆ తల్లి కఠిన నిర్ణయం తీసుకుంది. నవ మాసాలు మోసి, పెంచిన చేత్తోనే పిల్లలకు విషపూరిత ఆహారాన్ని తినిపించి తానూ తిని తనువు చాలించింది. ఈ ఘటనలో తల్లితో పాటు కుమార్తె మృతి చెందగా, ప్రస్తుతం కుమారుడి పరిస్థితి విషమంగా ఉంది. ఈ విషాదకరమైన ఘటన నాగర్​కర్నూల్​ జిల్లా కల్వకుర్తిలో జరిగింది. స్థానికులు పోలీసులకు సమాచారం అందించడంతో ఘటనా స్థలానికి చేరుకున్న పోలీసులు కేసు నమోదు చేసి దర్యాప్తు ప్రారంభించారు.

పోలీసుల వివరాల ప్రకారం : వనపర్తి జిల్లా శ్రీరంగాపూర్​ మండల కేంద్రానికి చెందిన భీమ్​శెట్టి ప్రకాశ్​(47), ప్రసన్న (40) దంపతులకు కుమారుడు ఆశ్రిత్​రామ్​ (15), కుమార్తె మేఘన (13) వీళ్లు కల్వకుర్తిలో నివాసం ఉంటున్నారు. ప్రకాశ్​ అక్కడే పుస్తకాల దుకాణాన్ని నిర్వహిస్తూ జీవనోపాధి పొందేవారు. 2025 నవంబరు 14న ఉన్నటుండి షాప్​లో ఉండగానే ఛాతీ నొప్పి రావడంతో ఆయన అక్కడికక్కడే మృతి చెందారు. ఈ ఘటనతో ఆ ఇంటి ఇల్లాలు అప్పట్నుంచీ భర్త లేరనే బాధను ఎప్పుడూ వెంటాడుతునే ఉండేది. ప్రకాశ్​ మరణం తర్వాత ఆ దుకాణాన్ని ఆమె తమ్ముడు చక్రధర్​తో కలసి నిర్వహిస్తున్నారు.

పిల్లలకు విషం కలిపిన ఆహారాన్ని పెట్టి : ప్రసన్న తన భర్త లేరనే బాధ ఆమెలో రోజురోజుకు ఎక్కువతుంది. దీంతో జనవరి 1న (గురువారం) మధ్యాహ్నం తన ఇద్దరు పిల్లలకు విషం కలిపిన ఆహారాన్ని పెట్టి తానూ తిన్నది. ఆ తర్వాత వారంతా అపస్మారకస్థితికి చేరుకున్నారు. తన తమ్ముడు చక్రధర్​ ఇంటికెళ్లి చూడగా అప్పటికే వారు ముగ్గురూ వాంతులు చేసుకుని అపస్మారకస్థితికి చేరుకున్నారు. వీరిని గమనించిన స్థానికులు అక్కడి నుంచి కల్వకుర్తి ప్రభుత్వ ఆసుపత్రికి వారిని తరలించారు. చికిత్స పొందుతూ అమ్మాయి అక్కడే మృతి చెందింది.

మార్గం మధ్యలోనే తల్లి మృతి : తల్లికి మెరుగైన వైద్యం కోసం హైదరాబాద్​కు తరలిస్తుండగా మార్గం మధ్యలోనే మృతి చెందారు. ప్రస్తుతం ఆమె కుమారుడు కల్వకుర్తిలోని ఓ ప్రైవేటు ఆసుపత్రిలో చికిత్స పొందుతున్నాడు. ఆ చిన్నారి పరిస్థితి కూడా విషమంగా ఉంది. స్థానికుల సమాచారంతో ఘటనాస్థలానికి చేరుకున్న పోలీసులు కేసు నమోదు చేసి దర్యాప్తు చేస్తున్నారు. ఘటనాస్థలంలో ప్రసన్న రాసిన నాలుగు పేజీల సూసైడ్​ నోట్​ను పోలీసులు స్వాధీనం చేసుకున్నారు. ఈ లెటర్​లో ఏం ఉందో ఇంకా తెలియాల్సి ఉంది. అన్ని కోణాల్లోనూ పోలీసులు దర్యాప్తు చేస్తున్నారు.

'అమ్మ, నాన్న, తమ్ముడు క్షమించండి' - అప్పుల బాధతో దంపతుల ఆత్మహత్య

లవర్ కోసం లండన్​ నుంచి వచ్చి - పెళ్లికి ఒప్పుకోకపోవడంతో తనువు చాలించి