తిరుమల శ్రీ‌వారి ఆర్జిత సేవలు - మే నెల కోటా బుకింగ్‌ షెడ్యూల్‌ వెల్లడి

May Month Srivari Arjitha Seva Tickets To Be Released on 18th: భక్తుల సౌకర్యార్థం 2026 మే నెలకు సంబంధించిన శ్రీవారి ఆర్జిత సేవలు టికెట్లకు సంబంధించి ఎలక్ట్రానిక్ డిప్​లో పేర్ల నమోదు ఈనెల 18న టీటీడీ ఆన్​లైన్​లో ప్రారంభం కానుంది. అనంతరం డిప్‌లో ఎంపిక చేస్తారు. డిప్​లో ఈ-టికెట్లు పొందిన వారు ఫిబ్రవరి 20 నుంచి 22వ తేదీ మధ్యాహ్నం 12 గంటల లోపు సొమ్ము చెల్లిస్తే టికెట్లు మంజూరవుతాయి. దీనికి సంబంధించి మరింత సమాచారం ఈ కథనంలో తెలుసుకుందాం.

శ్రీవారి ఆర్జిత సేవలు అయిన సుప్రభాతం, తోమాల, అర్చన, అష్టదళ పాదపద్మారాధన సేవల మే నెల కోటాను ఈనెల 18న ఉదయం 10 గంటలకు టీటీడీ ఆన్​లైన్​లో విడుదల చేయనుంది. ఈ సేవలకే లక్కీ డిప్ రిజిస్ట్రేషన్ కోసం ఈనెల 20వ తేదీ నుంచి ఉదయం 10 గంటల వరకు ఆన్​లైన్​లో నమోదు చేసుకోవచ్చు. ఎంపికైన వారు 22వ తేదీ మధ్యాహ్నం 12 గంటల లోపు సొమ్ము చెల్లించి లక్కీ డిప్ టికెట్లు పొందాల్సి ఉంటుంది.

• ఈనెల 21న కల్యాణ్యోత్సవం, ఊంజల్ సేవ, ఆర్జిత బ్రహ్మోత్సవం, సహస్ర దీపాలంకార సేవా టికెట్లు ఉదయం 10 గంటలకు విడుదల చేస్తారు. వర్చువల్ సేవలు, వాటి దర్శన స్లాట్ల కోటా మధ్యాహ్నం 3 గంటలకు ఆన్​లైన్​లో అందుబాటులో ఉంచుతుంది.
• ఈనెల 23న ఉదయం 10 గంటలకు అంగప్రదక్షిణం టోకెన్లు, అదేరోజు 11 గంటలకు శ్రీవాణి ట్రస్టు బ్రేక్ కోటా విడుదల చేస్తారు. మధ్యాహ్నం 3 గంటలకు వృద్ధులు, దీర్ఘకాలిక వ్యాధిగ్రస్థులు, దివ్యాంగులకు ఉచిత ప్రత్యేక ప్రవేశ దర్శన టోకెన్లు విడుదల చేస్తారు.
• ఈనెల 24న ఉదయం 10 గంటలకు ప్రత్యేక ప్రవేశ దర్శనం రూ.300 టికెట్లు, మధ్యాహ్నం 3 గంటలకు తిరుమల, తిరుపతిలో అద్దె గదుల బుకింగ్ కోటా విడుదల చేస్తారు.
• ఈనెల 27న ఏప్రిల్​కు సంబంధించి శ్రీవారి సేవ, పరకామణి సేవల కోటాను మధ్యాహ్నం 3 గంటలకు విడుదల చేస్తారు. భక్తులు ఈ విషయాలను గమనించి https://ttdevasthanams.ap.gov.in/home/dashboard వెబ్​సైట్​లో టికెట్లను బుక్ చేసుకోవాలని అధికారులు సూచించారు.

సర్వదర్శనానికి 8 గంటల సమయం : తిరుమలలో టోకెన్లులేని భక్తులకు సర్వదర్శనానికి 8 గంటల సమయం పడుతోంది. శ్రీవారి సర్వదర్శనానికి 13 కంపార్టుమెంట్లలో భక్తులు వేచి ఉన్నారు. నిన్న(సోమవారం 16-02-2026) తిరుమల శ్రీవారిని 73,776 మంది భక్తులు దర్శించుకున్నారు. నిన్నఒక్క రోజే హుండీ ద్వారా రూ. 4.42 కోట్లు ఆదాయం లభించింది.23,291 మంది భక్తులు శ్రీవారికి తలనీలాలు సమర్పించారు.

శ్రీవారి సేవలో టీ20 అమెరికా క్రికెట్ జట్టు: తిరుమల శ్రీవారిని టీ20 అమెరికా క్రికెట్ జట్టు దర్శించుకుంది. శ్రీవారి సేవలో అమెరికా క్రికెట్‌ జట్టులోని భారత సంతతి ప్లేయర్లు పాల్గొన్నారు. ఈ సందర్భంగా కెప్టెన్​ మోనాంక్​ పటేల్​ మాట్లాడుతూ స్వామివారి దర్శనం చాలా బాగా జరిగిందని అన్నారు. ఆలయ ప్రాంగణం, పరిసరాలు చాలా పరిశుభ్రంగా ఉన్నాయని అన్నారు. ఈ సందర్భంగా ఐసీసీ, బీసీసీఐ, ఏపీ క్రికెట్ అసోసియేషన్‌కు ప్రత్యేక కృతజ్ఞతలు తెలిపారు.

శ్రీవారి డాలర్ల విక్రయంలో మార్పులు - ఇకపై దర్శన టికెట్ ఉన్న భక్తులకు మాత్రమే

అధునాతన వ్యవస్థగా తిరుమల 'ఏఐ కమాండ్' - అయోధ్య, కాశీ, సోమనాథ్‌ ఆలయాల్లో అమలుకు సన్నాహాలు