ఫైన్​ పడుతుందని తెలుసు - ప్రాణం పోతుందనీ తెలుసు - అయినా 'తలకెక్కించు'కోరు!

Two-Wheeler Road Accidents Reasons : రోడ్డు ప్రమాదాల్లో చిన్న చిన్న తప్పిదాలే ప్రాణ నష్టాలకు కారణమవుతున్నాయి. ప్రతి పనికి బైక్​ బయటికి తీస్తారు కానీ, హెల్మెట్​ మాత్రం ధరించరు. ప్రయాణ సమయాల్లో చిన్నపాటి జాగ్రత్తలు తీసుకోకపోవడం వల్ల ఓ నిండు ప్రాణం బలైపోతుంది. హెల్మెట్​ ధరించకుండానే రోడ్లపైకి వచ్చేస్తున్నారు. రోడ్డు ఖాళీగా ఉంటే చాలు రయ్​ రయ్​మంటూ దూసుకెళ్తుంటారు. ఇటీవల హైదరాబాద్​ మూసారాంబాగ్​లో ట్రాఫిక్​ నిబంధనలు ఉల్లంఘించే వాహనదారుల్ని పోలీసులు ఆపి జరిమానా విధిస్తున్నారు.

అన్నీ తెలుసు అయినా పెట్టుకోరు! : ఈ క్రమంలో హెల్మెట్​ ధరించని వాహనదారున్ని ఆపి ఎందుకు హెల్మెట్​ పెట్టుకోలేదని ప్రశ్నిస్తే మా ఇళ్లు పక్కనే ఉందని ఒకరు సమాధానం ఇచ్చారు. ఇలానే మరో వాహనదారుడిని ప్రశ్నించగా, మర్చిపోయి వచ్చానంటూ బదులిచ్చాడు. ఇలా శిరస్త్రాణం పెట్టుకోకుండా వాహనంతో రోడ్డెక్కితే ట్రాఫిక్​ పోలీసులు జరిమానా విధిస్తారని తెలుసు. అది ధరించకపోతే పొరపాటున ప్రమాదం జరిగితే తలకు గాయమై ప్రాణాలు పోతాయనీ తెలుసు. అన్నీ తెలిసినా అదే నిర్లక్ష్యం, అదే తప్పులు. దాని ఫలితమే పెరుగుతున్న రోడ్డు ప్రమాదాలు.

హెల్మెట్​ ధరించకపోవడం వల్లే : నగరంలో ట్రాఫిక్​ రూల్స్​ పాటించకపోవడంలో అత్యధికం హెల్మెట్​ ధరించకపోవడం వల్లే నమోదవుతున్నాయి. హైదరాబాద్​, రాచకొండ, సైబరాబాద్​ కమిషనరేట్ల పరిధిలో 2025లో ఏకంగా 80 లక్షల మంది వాహనదారులకు హెల్మెట్​ ధరించకపోవడంతో ఫైన్స్​ విధించారు. శిరస్త్రాణం ధరించకపోవడం వల్లే ఎక్కువ మంది ప్రాణాలు కోల్పోతున్నట్లు అవగాహన కల్పిస్తున్నా, చాలా మంది వినిపించుకోవడం లేదు. ఏడాది కిందట 3 కమిషనరేట్ల పరిధిలో ప్రమాదాలు 9601 జరగ్గా, అందులో 2275 మంది మృతి చెందారు.

తూతూమంత్రంగా తనిఖీలు :

• హెల్మెట్​ ధరించనందుకు 2024లో 3 కమిషనరేట్ల పరిధిలో 60.38 లక్షల మంది వాహనదారులకు ఫైన్స్​ వేశారు. 2025 నాటికి ఈ సంఖ్య దాదాపు 80 లక్షలకు పెరిగింది. ఇలా ఈ స్థాయిలో పెరగడానికి అనేక కారణాలున్నాయి.
• వాహనదారులు హెల్మెట్​ లేకుండా ఇతర నిబంధనలు ఉల్లంఘిస్తే పదే పదే పట్టబడినప్పుడు లైసెన్సు పాయింట్లలో కోత విధించేందుకు చట్టంలో అవకాశముంది. సరిగా రెండేళ్లలో 12 పాయింట్లు కోతపడితే వారి లైసెన్సు రద్దు చేయవచ్చు.
• ట్రాఫిక్​ సిబ్బంది దాని జోలికిపోకుండా, చలానా విధించి వదిలేస్తున్నారు. ట్రాఫిక్​ కెమెరాల ద్వారా చలానా విధిస్తున్నా, ఎక్కువ మంది చెల్లించడం లేదు.

ద్విచక్ర వాహనదారులే అధికం : గతేడాది సైబరాబాద్​లో 4,608 రోడ్డు ప్రమాదాలు జరిగాయి. అందులో 803 తీవ్రమైనవి. ఇందులో 53 శాతం ద్విచక్రవాహన ప్రమాదాలే ఎక్కువ. వీటిలో ఏకంగా 449 మంది మరణించారు. అధిక శాతం మంది హెల్మెట్​ ధరించకపోవడం వల్లే మృత్యువాత పడుతున్నారు. మరి కొందరు కేవలం ట్రాఫిక్​ జరిమానాలకు భయపడి నాణ్యత లేని, కాలం చెల్లిన హెల్మెట్​లు ధరిస్తున్నారు. దీంతో ప్రమాదం జరిగినప్పుడు అవి కనీస రక్షణ సైతం కల్పించలేకపోతున్నాయి.

హెల్మెట్​ను కొనేటప్పుడు ఇవి తప్పక పరీక్షించండి :

• నాణ్యత విషయంలో ఎక్కడా రాజీపడకూడదు. ప్రభుత్వ ప్రమాణాలకు తగినవి మాత్రమే ఎంచుకోవాలి.
• కూల్​ ఫైబర్​ ఉన్న హెల్మెట్లు, గాలి లోపలకు వెళ్లే వాటిని మాత్రమే తీసుకుంటే ఎలాంటి చెమట పట్టదు. ఉక్కపోతగా అనిపించదు.
• తలకు సరిపోయే సైజ్​ హెల్మెట్​ను​ ఎంపిక చేసుకోవాలి.
• చుండ్రు, చర్మ వ్యాధులు ఏవైనా ఉంటే వెంటనే డాక్టర్లను సంప్రదించి చికిత్స తీసుకోవాలి.

వాహనదారులూ ఇది గమనించండి :

• హెల్మెట్​ ధర ఎక్కువ ఉందని అసలు ఆలోచించొద్దు. ఐఎస్​ఐ గుర్తుతో మరింత రక్షణ కల్పిస్తుందా? అనేది పరిశీలించాలి.
• నాసిరకం, ధర తక్కువ వాటితో ప్రమాదం నుంచి రక్షణ ఉండదు. మామూలు దానికి, నాణ్యమైన వాటికి తేడా రూ.500లోపే ఉంటుంది.
• హెల్మెట్​ను పోలీసుల కోసం కాకుండా మీ కోసం ధరించండి.
• సాధారణంగా కొంతమంది హెల్మెట్​ను బైక్​ అద్దానికో, వెనుక కొక్కేనికో తగిలిస్తుంటారు. అయితే ఇది సరికాదు. హెల్మెట్​ని కేవలం తలకు మాత్రమే ధరించండి.
• హెల్మెట్​ను కేవలం తలకు ధరించడం వల్ల ఎలాంటి ప్రయోజనం ఉండదు. క్లిప్​ పెట్టుకుంటేనే ప్రమాద సమయాల్లో గాయాలు కాకుండా ఉంటాయి.
• తనిఖీల నుంచి తప్పించుకోవడానికో, గాలి వీస్తుందనో టోపీ తరహా తేలిక వాటిని వినియోగిస్తే ఎలాంటి ఉపయోగం లేదు.

'నాకే చాలా బాధగా ఉంది - నన్ను ధరించండి - మీ ప్రాణాన్ని కాపాడుకోండి'

బైకుల వల్లే 60 శాతం ప్రమాదాలు - హెల్మెట్ లేకపోతే ప్రాణాలకు నో గ్యారంటీ!