సర్కార్​ వారి హెయిర్​ స్టైల్ - స్కూల్ విద్యార్థులు ఇలాగే కటింగ్ చేయించుకోవాలి

Govt New Hair Style Rules For Students : ప్రతి ఒక్కరి జీవితంలో విద్యార్థి దశ ఎంతో కీలకమైనది. చిన్న వయసు నుంచే బాలలకు క్రమశిక్షణ, వ్యక్తిత్వ వికాసాన్ని పెంపొందించేందుకు తెలంగాణ రాష్ట్ర ప్రభుత్వం ప్రత్యేకంగా దృష్టిసారించింది. ఇందులో భాగంగానే పాఠశాల విద్యార్థులకు కేశాలంకరణ(హెయిర్​ స్టైల్​) విషయంలో సర్కారు నూతన మార్గదర్శకాలను విడుదల చేసింది. విద్యార్థి రూపం వారి వ్యక్తిత్వాన్ని ప్రతిబింబించాలనే ఈ నిర్ణయం తీసుకున్నట్లుగా విద్యాశాఖ వెల్లడించింది.

పాఠశాల విద్యార్థుల హెయిర్​ స్టైల్ మార్గదర్శకాలు (ETV Bharat)

నిబంధనలు ఇలా : విద్యాశాఖ నూతన నిబంధనల ప్రకారం మగ విద్యార్థులు జుత్తును సరళంగా, శుభ్రంగా కత్తిరించుకోవాల్సి ఉంటుంది. వెనుక భాగంలో చక్కగా, శుభ్రంగా హెయిర్​కట్ చేసుకోవాలి. చిన్న కేశాలకు అనుమతి ఉంటుంది. క్రమశిక్షణకు విరుద్ధంగా, వింతగా ఉండే హెయిర్​​ స్టైల్​ను ఇకమీదట తరగతి గదులోకి అనుమతించరు. తల్లిదండ్రులు ఈ విషయమై సహకరించాలని పాఠశాలల నిర్వాహకులు కోరుతున్నారు.

అనుమతించని హెయిర్ స్టైళ్లు ఇవే

• చాలా పొడవుగా లేదా గీరజాలుగా ఉన్న జుట్టు
• జుట్టులో డిజైన్లు లేదా గీతలు
• తల వెనుక భాగంలో పొడవుగా ఉండే మల్లెట్ స్టైల్
• స్పైక్​ లేదా నిలువుగా ఉండే హెయిర్ స్టైల్
• జుట్టుకు రంగు వేయడం
• ఎక్స్​ట్రీమ్​ ఫేమ్​ లేదా అతిగా స్టైలింగ్ చేసిన హెయిర్ కట్

విద్యాశాఖ సాధారణ సూచనలు :

• జుట్టును ఎల్లప్పుడూ శుభ్రంగా, చక్కగా ఉంచండి
• పాఠశాల నియమాలను పాటించి క్రమశిక్షణతో ఉండండి
• చక్కగా, శుభ్రంగా ఉండే హెయిర్​ స్టైల్​ను ఎంచుకోండి
• మీ రూపం మీ వ్యక్తిత్వాన్ని ప్రతిబింబిస్తుంది

విద్యార్థుల్లేని పాఠశాలలు సున్నా : తెలంగాణ రాష్ట్రంలో ఒక్క విద్యార్థీ లేని బడుల సంఖ్య ఈసారి సున్నా. ఇలాంటి బడులు 2022-23లో 1,672, 2023-24లో 2,097 ఉండగా 2024-25 సంవత్సరంలో 2,245కు పెరిగింది. కాగా ఈసారి ఒక్కటీ లేకపోవడం గమనించదగ్గవిషయం. ప్రీప్రైమరీ నుంచి ఇంటర్ వరకు అన్ని రకాల పాఠశాలలు, జూనియర్‌ కాలేజీలకు సంబంధించి 2025-26 అకాడమిక్ ఇయర్​లో ఏకీకృత జిల్లా పాఠశాల విద్యా సమాచారం(యూడైస్‌) గణాంకాలను కేంద్ర విద్యాశాఖ మంగళవారం విడుదల చేసింది.

తగ్గిన సింగిల్ టీచర్ పాఠశాలల సంఖ్య : ఈసారి యూడైస్‌ గణాంకాల్లో జీరో విద్యార్థులున్న పాఠశాలలను చూపరాదని తెలంగాణ ప్రభుత్వం నిర్ణయం తీసుకుంది. వీటిని తాత్కాలికంగా మూసివేశామనే ఆప్షన్‌ను ఎంచుకుంది. ఈ క్రమంలో విద్యార్థులు ఒక్కరూ లేని పాఠశాలల సంఖ్య సున్నాకు పడిపోయింది. విద్యార్థులు చేరినట్లయితే మళ్లీ వాటిని తెరుస్తారు. 2022-23లో 6,054 సింగిల్ టీచర్ పాఠశాలలు ఉండగా 2023-2024లో 5,895, 2024-25లో 5,001, 2025-26లో 4793కి తగ్గడం విశేషం. పాఠశాలల్లో మౌలిక వసతుల్లో జాతీయ సగటు కంటే రాష్ట్ర పరిస్థితి మెరుగ్గా ఉన్నట్లు గణాంకాలు స్పష్టంచేస్తున్నాయి.

• రాష్ట్రంలో ప్రీప్రైమరీ నుంచి ఇంటర్మీడియట్​ వరకు ప్రభుత్వ, ప్రైవేటు విద్యాసంస్థల్లో బోధించే ఉపాధ్యాయులు/అధ్యాపకులు 3,70,756 మంది ఉండగా వారిలో అధికశాతం 2,42,377 (65%) మంది మహిళలున్నారు.
• 42,755 విద్యాసంస్థల్లో 76.76 లక్షల మంది విద్యార్థులున్నారు. అంటే ఒక్కో దాంట్లో విద్యార్థుల సగటు 184. ఈ విషయంలో తెలంగాణ రాష్ట్రానికి 13వ స్థానం.
• మొత్తం విద్యార్థుల్లో ప్రభుత్వ విద్యాసంస్థల్లో చదువుకుంటున్నది కేవలం 26.52 లక్షల మందే. ఎయిడెడ్‌ పాఠశాలల్లో 69,651 మంది ఉండగా పలు ప్రైవేటు విద్యాసంస్థల్లో 49.52 లక్షల మంది చదువుతున్నారు. అంటే అధికశాతం మంది ప్రైవేటు, కార్పొరేట్ స్కూల్స్​లో చదువుకుంటున్నారు.

ఫలిస్తోన్న ప్రభుత్వ చర్యలు - తెలంగాణ విద్యా సంస్కరణలకు జాతీయ స్థాయిలో గుర్తింపు

వయసుకు మించి స్కూల్ బ్యాగ్​ల బరువు - ప్రీప్రైమరీకి పుస్తకాలను అంటగడుతున్న కార్పొ'రేటు'