ఈ-చలానా అంటూ నకిలీ లింక్​లు - క్లిక్​ చేస్తే ఖాతా ఖాళీ

Cybercrime Through WhatsApp Links to Pay Traffic Challan: సైబర్​ నేరగాళ్లు టెక్నాలజీని విరివిగా ఉపయోగిస్తున్నారు. అసలైన వాటిని పోలిఉండే లింక్​లు తయారు చేసి సామాన్యులను మోసగిస్తున్నారు. ఆ క్రమంలోనే ఎంతో మంది తమ సొమ్ము పోగొట్టుకుని బాధితులవుతున్నారు. ట్రాఫిక్‌ ఉల్లంఘనలను అడ్డుగా పెట్టుకుని సైబర్‌ కేటుగాళ్లు నకిలీ చలానాల వివరాలతో తప్పుడు సందేశాలు పంపిస్తున్నారు. వాటి ద్వారా ఆ వ్యక్తి ఖాతాలోని సొమ్ము అంతా మాయం చేస్తున్నారు. వీళ్లు చలానాల పేరుతో పంపించే సందేశాలు నిజమైన వాటికి ఏమాత్రం తీసిపోవు. అంత అసలైనవిగా ఉండడం వల్లనే చాలా మంది ఈ కేటుగాళ్ల వలలో చిక్కుతున్నారు.

తక్కువ జరిమానా చూపిస్తారు- క్లిక్​ చెయ్యమని సూచిస్తారు: రవాణా శాఖ, ట్రాఫిక్‌ పోలీసుపేరుతో ట్రాఫిక్‌ నిబంధనలు పాటించనందకు మీ వాహనంపై చలానా పెండింగ్‌లో ఉందంటూ మోసగాళ్లు ఎస్‌ఎంఎస్, వాట్సప్‌ ద్వారా సందేశాలు పంపుతారు. పెండింగ్​లో ఉన్న జరిమానా అంతా వెంటనే కట్టాలని దాంట్లో ఉంచుతారు. జరిమానా చెల్లించడానికి ఈ మెసేజ్‌లో ఇచ్చిన లింక్‌ మీద క్లిక్​ చేయ్యాలని సూచిస్తారు.

ఆ సందేశంలో కట్టాల్సిన జరిమానాను తక్కువగా చూపిస్తారు. అది కేవడం అదే నిజమని మనల్ని నమ్మించడానికి మాత్రమే. ఒకవేళ కేటుగాళ్ల మాయలో పడి లింక్‌మీద క్లిక్‌ చేసినట్లైనతే వెంటనే నకిలీ వెబ్‌సైట్‌లోకి వెళ్తుంది. అందులో ఓటీపీలు, క్రెడిట్‌ , డెబిట్ కార్డుల నంబర్లు నమోదు చేయాలని కోరుతుంది. సందేశంలో ఉన్న విధంగా మనం మన వివరాలన్నీ అందులో నమోదు చేస్తే ఆ వెంటనే బ్యాంక్​ ఖాతా ఖాళీ అవ్వడం ఖాయం. ఏపీకే ఫైళ్లను కూడా కొన్ని సార్లు సందేశాల్లో పంపిస్తుంటారు. జరిమానా చెల్లించేందుకు, సరిచూసుకునేందుకు దీనిపై క్లిక్‌ చేయ్యాలని సూచిస్తారు. ఆ లింక్​ని క్లిక్‌ చేస్తే ఆటోమెటిక్​గా మాల్‌వేర్‌ మన ఫోన్​లో ఇన్​స్టాల్​ అవుతుంది. అంతే కాక ఫోన్​ నియంత్రణ పూర్తిగా సైబర్‌ నేరగాళ్ల చేతిలోకి వెళ్తుంది.

సందేశాలు పంపుతారు- సొమ్ము మాయం చేస్తారు : విజయవాడ నగరంలోని ఒక వ్యక్తికి ట్రాఫిక్‌ ఉల్లంఘన చేశారంటూ వాట్సప్‌లో ఈ-చలానా కట్టాలని సూచిస్తూ సందేశం వచ్చింది. అతడు దాని మీద క్లిక్‌ చేయగానే విడతల వారీగా తన క్రెడిట్‌ కార్డుల నుంచి రూ.1.78 లక్షలు పోయాయి. ఇటీవల నగరానికి చెందిన ఓ ఎగ్జిక్యూటివ్‌కు వాట్సప్‌ నంబర్​కు గుర్తు తెలియని నంబర్​ నుంచి ట్రాఫిక్‌ చలానా వచ్చింది. చలానా పెండింగ్​లో ఉందని ఇంకో మెసేజ్​ వచ్చింది. దీంతో అతను ఆ లింక్​లో ఉన్న ఏపీకే ఫైల్‌పై క్లిక్‌ చేసి సంబంధించిన వివరాలన్నీ ఎంటర్​చేశాడు. అలా చేసిన కొద్ది సేపటికే తర్వాత ఆ ఎగ్జిక్యూటివ్​ రెండు క్రెడిట్‌ కార్డుల నుంచి రూ.2.10 లక్షలు మాయమానట్లు నోటిఫికేషన్​ వచ్చింది.

ఈ జాగ్రత్తలు తప్పనిసరి: మీరు ట్రాఫిక్‌ నియమాలు ఉల్లంఘించారంటూ సెల్‌ఫోన్లకు వచ్చే చలానాలకు స్పందించొద్దని అధికారులు తెలుపుతున్నారు. ఆర్టీఏ, ట్రాఫిక్‌ పోలీసు పేర్లతో మెసెజ్​లో వచ్చే లింక్‌లను క్లిక్‌ చేయొద్దని సూచిస్తున్నారు. ఇలాంటి మెస్సేజ్​లు వచ్చినప్పుడు అవి క్లిక్​ చేయకుండా అధికారిక వెబ్‌సైట్లలోకి వెళ్లి వివరాలు చెక్​ చేసుకోవాలి. తెలియని/ పరిచయం లేని వ్యక్తులతో బ్యాంకింగ్‌ వివరాలను పంచుకోకూడదు. వ్యక్తిగత, బ్యాంకింగ్​ వివరాలు ఎట్టిపరిస్తుతుల్లోనూ నకిలీ వెబ్‌సైట్లలో మోదు చేసుకోవద్దు.

సామాజిక మాధ్యమాల్లో అసభ్యకర పోస్టులు - లైకుల కోసం జంతు బలులు

ఒక్కో ఖాతాకు రూ. 13 వేలు - కమీషన్‌ ఆశ చూపించిన రాజస్థాన్‌ ముఠా