T20 వరల్డ్​కప్ సెమీఫైనల్ : సఫారీలపై కివీస్​దే డామినేషన్- కానీ ఈసారి హిస్టరీ మారే ఛాన్స్!

SA vs NZ IPL 2026 : 2026 టీ20 ప్రపంచ కప్ చివరి దశకు చేరుకుంది. టోర్నమెంట్​లో తొలి సెమీఫైనల్​కు సమయం ఆసన్నమైంది. కోల్‌కతా ఈడెన్ గార్డెన్స్‌లో దక్షిణాఫ్రికా- న్యూజిలాండ్ మధ్య అమీతుమీ తేల్చుకోనున్నాయి. ఇందులో నెగ్గి ఫైనల్ బెర్తు ఖరారు చేసుకోవాలని ఇరుజట్లు ఉవ్విళ్లూరుతున్నాయి. దీంతో ఈ పోరు రసవత్తరంగా సాగడం ఖాయంగా కనిపిస్తుంది. మరి ఇప్పటివరకు రెండు జట్ల ప్రయాణం ఎలా సాగింది? ఎవరి బలం ఎంటో తెలుసుకుందాం!

దక్షిణాఫ్రికా నిలకడగా!
ఈ టోర్నమెంట్‌లో దక్షిణాఫ్రికా అద్భుతంగా రాణిస్తోంది. గ్రూప్ దశతోపాటు సూపర్ 8లోనూ ఇప్పటిదాకా ఓటమి అనేది లేకుండా ఆడిన అన్ని మ్యాచ్​ల్లో విజయం సాధించింది. కీలకమైన సూపర్ 8లో మూడు మ్యాచ్‌ల్లోనూ గెలిచి గ్రూప్‌ 1లో అగ్రస్థానం దక్కించుకుంది. అలాగే గ్రూప్ దశలో ఇప్పటికే కివీస్​తో సఫారీ జట్టు తలపడింది. ఈ మ్యాచ్​లో దక్షిణాఫ్రికా న్యూజిలాండ్‌ను 7 వికెట్ల తేడాతో ఓడించింది. రేపటి మ్యాచ్‌లోనూ అదే ప్రదర్శనను పునరావృతం సఫారీలు భావిస్తున్నారు. ఈ జట్టులో కెప్టెన్ మార్​క్రమ్​తోపాటు డికాక్, రికిల్​టన్, డివాల్డ్ బ్రేవిస్, మిల్లర్, బోష్, ఎంగ్డి, రబాడా కీలక ఆటాగాళ్లు.

మరోవైపు, సూపర్ -8 దశలో న్యూజిలాండ్ ఒక్కటంటే ఒకే మ్యాచ్‌లో గెలిచినప్పటికీ మెరుగైన్ రన్​రేట్ ఉండడంతో సెమీస్‌లోకి దూసుకొచ్చింది. అయితే జోరుమీదున్న దక్షిణాఫ్రికాను ఆపడం మాత్రం కివీస్​కు పెద్ద సవాలే. కానీ శాంట్నర్, ఫిన్ అలెన్, రచిన్, డారిల్ మిచెల్​తో జట్టు బలంగానే కనిపిస్తుంది. కాష్టపడితే సౌతాఫ్రికాను ఓడించడం పెద్ద కష్టమేమీ కాదు. ఇక 2021 ఎడిషన్ తర్వాత తొలిసారి టీ20 ప్రపంచ కప్ ఫైనల్‌కు చేరుకోవాలని కివీస్ కలలు కంటోంది.

హెడ్ టు హెడ్ రికార్డ్
దక్షిణాఫ్రికా - న్యూజిలాండ్ ఇప్పటివరకు మొత్తం 19 టీ20 అంతర్జాతీయ మ్యాచ్‌లు ఆడాయి. ఇందులో దక్షిణాఫ్రికాదే పైచేయిగా ఉంది. అత్యధికంగా 12 మ్యాచ్‌లలో దక్షిణాఫ్రికా గెలిచింది. అటు న్యూజిలాండ్ కేవలం 7 మ్యాచ్‌ల్లోనే నెగ్గింది. అయితే న్యూజిలాండ్ - దక్షిణాఫ్రికా టీ20 ప్రపంచకప్ నాకౌట్ మ్యాచ్‌లో తలపడటం మాత్రం ఇదే మొదటిసారి.

అందులో కివీస్​దే పైచేయి
కాగా, ఈ రెండు జట్లు ఇప్పటివరకు ఐసీసీ టోర్నమెంట్​ల్లో మూడుసార్లు నాకౌట్ మ్యాచ్‌ల్లో తలపడ్డాయి. ఇందులో దక్షిణాఫ్రికాకు పేలవమైన రికార్డు ఉంది. న్యూజిలాండ్‌తో జరిగిన ఐసీసీ నాకౌట్ మ్యాచ్‌లో దక్షిణాఫ్రికా ఎప్పుడూ గెలవలేదు. అందుకే ఈసారి నెగ్గి కొత్త చరిత్ర సృష్టించాలని సఫారీలు ఆశిస్తున్నారు. న్యూజిలాండ్ - దక్షిణాఫ్రికా మధ్య జరిగిన తొలి ఐసీసీ నాకౌట్ మ్యాచ్ 2011 వన్డే ప్రపంచ కప్‌లో జరిగింది. అది క్వార్టర్ ఫైనల్. ఢాకాలో జరిగిన మ్యాచ్‌లో దక్షిణాఫ్రికాను న్యూజిలాండ్ 49 పరుగుల తేడాతో ఓడించింది.

ఆ తర్వాత 2015 వన్డే ప్రపంచ కప్ సెమీఫైనల్‌లో కివీస్ - సఫారీ తలపడ్డాయి. ఆక్లాండ్‌ వేదికగా జరిగిన ఈ మ్యాచ్​లో న్యూజిలాండ్ నాలుగు వికెట్ల తేడాతో గెలిచింది. ఇక గతేడాది 2025 ఛాంపియన్స్ ట్రోఫీలో నాకౌట్ మ్యాచ్‌లోనూ ఇరు జట్లు మూడోసారి తలపడ్డాయి. ఆ మ్యాచ్‌లో కూడా దక్షిణాఫ్రికాను న్యూజిలాండ్ 50 పరుగుల తేడాతో ఓడించింది. అలా ఐసీసీ టోర్నీల్లో నాకౌట్​లో మూడుకు మూడుసార్లు కివీసే నెగ్గింది.

మ్యాచ్ ఎప్పుడు, ఎప్పుడు జరుగుతుంది?
ఈ తొలి సెమీఫైనల్ మ్యాచ్ భారత సమయం ప్రకారం సాయంత్రం 7:00 గంటలకు ప్రారంభమవుతుంది. టాస్ మ్యాచ్ ప్రారంభానికి 30 నిమిషాల ముందు, అంటే సాయంత్రం 6:30 గంటలకు పడుతుంది. స్టార్ స్పోర్ట్స్ నెట్‌వర్క్‌లో ప్రత్యక్ష ప్రసారం అందుబాటులో ఉంటుంది. అలాగే జియో హాట్‌స్టార్ యాప్​లో లైవ్ స్ట్కీమింగ్ చూడొచ్చు!