'బౌలర్​ ఎవరైతే నాకేంటి?- నేను బంతినే చూస్తా'- వైభవ్ సూర్యవంశీ బోల్డ్ స్టేట్​మెంట్

Vaibhav Suryavanshi IPL 2026 : 15 ఏళ్ల వైభవ్ సూర్యవంశీ ఇప్పుడు ఐపీఎల్ ఆరెంజ్ క్యాప్ నయా స్టార్ అయ్యాడు. ఈ సీజన్​లో తొలి మ్యాచ్​ నుంచే బాదుడే లక్ష్యంగా బరిలోకి దిగుతున్న వైభవ్ బౌలర్లను ఉతికారేస్తున్నాడు. తాజాగా ఆర్సీబీతో మ్యాచ్​లోనూ ఆకాశమే హద్దుగా చెలరేగిపోయాడు. 26 బంతుల్లోనే 78 పరుగులు చేశాడు. ఇక ఇప్పటిదాకా నాలుగు మ్యాచ్​ల్లో 200 పరుగులు చేసి టాప్​లో కొనసాగుతున్నాడు. అయితే ఇదంతా ఒకెత్తు అయితే అతడు వరల్డ్​ టాప్ క్లాస్ బౌలర్ల బౌలింగ్​లోనూ సిక్స్​లు బాదడం చూసి అభిమానులు ఆశ్చర్యపోతున్నారు. మరి అగ్రశ్రేణి బౌలర్లను ఎదుర్కోవడంపై అతడి రియాక్షన్ ఎంటంటే?

బుమ్రాకే షాకిచ్చాడు!
రీసెంట్​గా రాజస్థాన్- ముంబయి మ్యాచ్ జరిగింది. ఈ మ్యాచ్​కు ముందు యార్కర్ కింగ్ 'బుమ్రా ముందు వైభవ్ తేలిపోతాడు', 'బుమ్రాను ఎదుర్కొనే శక్తి వైభవ్​కు ఉందా?' అనే వాదనలు వినిపించాయి. కానీ, అవన్నీ పటాపంచలు చేస్తూ ఆ రాత్రి బుమ్రా వేసిన తొలి బంతినే ఈ చిచ్చరపిడుగు స్టాండ్స్​లోకి పంపించి అందరి నోళ్లూ మూయించాడు. ఆ ఒక్క బంతేనా? ఆ తర్వాత కూడా బుమ్రా బౌలింగ్​ను ఈజీగా ఆడుతూ సిక్స్​లు, ఫోర్లు కొట్టేశాడు. ప్రపంచంలోని టాప్ బ్యాటర్లనే బెంబేలెత్తించే బుమ్రా బౌలింగ్​, 15ఏళ్ల కుర్రాడి ముందు తేలిపోయింది.

భువీ, హేజిల్​వుడ్​ కూడా​!
ఇక తాజాగా ఆర్సీబీ మ్యాచ్​లోనూ ఇదే రిపీట్ అయ్యింది. ప్రత్యర్థి జట్టులో స్వింగ్ కింగ్ భువనేశ్వర్ కుమార్, పేస్ గన్ జోష్ హేజిల్​వుడ్ ఉన్నాకన్న కంగారు వైభవ్​లో కాసింతైనా కనపించలేదు. క్రీజులో కూల్​గా ఉంటూ ఈ ఇద్దరి బౌలింగ్​లో ఎడాపెడా బౌండరీలు బాదేశాడు. 'మీరు ఎవరైతే నాకేంటి? బౌండరీ బాదడమే నా పని' అన్నట్లు భువీ, హేజిల్​వుడ్​ను వైభవ్ ఎదుర్కొన్న తీరుపై అభిమానులు ప్రశంసల వర్షం కురిపిస్తున్నారు. హేజిల్​వుడ్ వేసిన నాలుగో ఓవర్లో ఏకంగా మూడు ఫోర్లు, ఒ సిక్స్​ కొట్టాడు. ఆ తర్వాతి ఓవర్లో భువీనీ వదల్లేదు. 17 పరుగులు బాది తన బాధితుల అకౌంట్​లో వేసేశాడు.

వీళ్లనూ డోంట్​కేర్!
వీళ్లతోపాటు ఈ సీజన్​లో వైభవ్ ఇప్పటికే మ్యాట్ హెన్రీ, మహ్మద్ సిరాజ్, సిరాజ్, ప్రసిద్ధ్‌కృష్ణ, కగిసో రబాడ, శార్దూల్ ఠాకూర్​లను అయితే లెక్కే చేయలేదు. వీళ్లందరి బౌలింగ్​లోనూ బౌండరీలు బాదేశాడు. దీంతో వైభవ్​పై సోషల్ మీడియాలో ప్రశంసలు కురుస్తున్నాయి.

వైభవ్ రియాక్షన్!
బుమ్రా, భువనేశ్వర్, హేజిల్‌వుడ్ వంటి బౌలర్లను ఎదుర్కోవాలంటే భయమేసిందా? అన్న ప్రశ్నకు, తాను బ్యాటింగ్ చేసేటప్పుడు బౌలర్​ ఎవరు అనేది చూడనని కేవలం బంతినే చూస్తానని క్లియర్​గా చెప్పాడు. 'సర్, నేను బౌలర్‌ను చూడను. కేవలం బంతిని ఆడటానికే ప్రయత్నిస్తా. నేను నా బలాన్నే నమ్ముతా. నెట్స్​లో చేసిన ప్రాక్టీస్​ను క్రీజులో అమలు చేయడానికే ప్రయత్నిస్తాను. అయితే బౌలర్ ఎవరో అనేది నా మనసుకు తెలుసు. అయినప్పటికీ, నేను బౌలర్‌ ఎవరు అనేది చూడకుండా బంతిని ఆడటంపైనే దృష్టి పెడతాను' అని ఆర్సీబీతో మ్యాచ్ అనంతరం ప్రజెంటేషన్​లో వైభవ్ స్పష్టంగా చెప్పాడు.

నెక్ట్స్ వీళ్లే!
వరుసగా స్టార్ బౌలర్లను ఉతికారేయంతో వైభవ్​పై నెటిజన్లు సోషల్ మీడియాలో మీమ్స్​ క్రియేట్ చేస్తున్నారు. రాజస్థాన్ జట్టు సన్​రైజర్స్, పంజాబ్ కింగ్స్, దిల్లీ క్యాపిటల్స్, లఖ్​నవూతో ఆడాల్సి ఉంది. దీంతో బుమ్రా, భువీ అయిపోయారని ఇకపై ఆడాల్సిన జట్లలోని స్టార్ బౌలర్లను ఎలా బాదేస్తాడో అంటూ ఫన్నీ మీమ్స్​ క్రియేట్ చేస్తున్నారు. అయితే ఆయా జట్లలో ఉనాద్కత్, అర్షదీప్ సింగ్, యుజ్వేంద్ర చాహల్, లుంగి ఎంగ్డి, ముకేశ్ కుమార్, నటరాజన్ లాంటి బౌలర్లు ఉన్నారు.

'మామూలోడు కాదు- ద్రవిడ్​కు చెప్పి మరీ చేశాడుగా!'- వైభవ్ గేమ్​ప్లాన్ రివీల్ చేసిన శాంసన్

టీమ్ఇండియా టెస్టు భవిష్యత్తు కోసం బీసీసీఐ మాస్టర్ ప్లాన్- కుర్రాళ్లకు బంపర్ ఆఫర్- లిస్టులో వైభవ్ సూర్యవంశీ కూడా!