బట్లర్, గిల్ హాఫ్ సెంచరీలు- లఖ్​నవూపై గుజరాత్ ఈజీ విన్!

GT vs LSG IPL 2026 : గుజరాత్ టైటాన్స్ ఆల్​రౌండ్ ప్రదర్శనతో అదరదొట్టింది. కెప్టెన్ శుభ్​మన్ గిల్, జాస్ బట్లర్ హాఫ్ సెంచరీలతో చెలరేగిన వేళ ఎకాన స్టేడియం వేదికగా లఖ్​నవూతో జరిగిన మ్యాచ్​లో గుజరాత్ 7 వికెట్ల తేడాతో నెగ్గింది. 165 పరుగుల ఛేదననను గుజరాత్ 18.4 ఓవర్లలో 3 వికెట్లు కోల్పోయి ఛేదించింది. గిల్ (56), బట్లర్ (60) రాణించారు. చివర్లో వాషింగ్టర్ సుందర్ (21*) ఆకట్టుకున్నాడు. లఖ్​నవూ బౌలర్లలో ప్రిన్స్ యాదవ్, దిగ్వేశ్ రాఠీ, మహ్మద్ షమీ తలో 1 వికెట్ దక్కించుకున్నారు.

లఖ్​నవూ హ్యాట్రిక్ మిస్
ఈ టోర్నీలో తొలి మ్యాచ్​లో ఓడిన తర్వాత లఖ్​నవూ రెండో మ్యాచ్​లో సన్​రైజర్స్​తో విజయం సాధించింది. మూడో మ్యాచ్​లో ఉత్కంఠ పోరులో కోల్​కతాను ఓడించి గాడిన పడ్డట్లే కనిపించింది. దీంతో హ్యాట్రిక్ విజయాలపై కన్నేయగా, గుజరాత్ దెబ్బ కొట్టింది. మరోవైపు, గుజరాత్​కు ఈ సీజన్​లో ఇది రెండో విజయం.

అంతకుముందు బ్యాటింగ్ చేసిన లఖ్​నవూ 20 ఓవర్లలో 8 వికెట్ల నష్టానికి 164 పరుగులు చేసింది. ఓపెనర్ ఎయిడెన్ మార్​క్రమ్ (30) టాప్ స్కోరర్. మిగతా బ్యాటర్ల నుంచి భారీ ఇన్నింగ్స్​ రాకపోవడంతో లఖ్​నవూ ఓ మోస్తారు స్కోర్​కే పరిమితమైంది. కెప్టెన్ రిషబ్ పంత్ (18), మిచెల్ మార్ష్ (11), ఆయుశ్ బదోనీ (9), పూరన్ (19), అబ్దుల్ సమద్ (18), ముకుల్ చౌదరి (18), జార్జి లిండే (16) విఫలమయ్యారు. గుజరాత్ బౌలర్లలో ప్రసిద్ధ్ కృష్ణ 4, అశోక్ శర్మ 2, మహ్మద్ సిరాజ్, రబాడ చెరో 1 వికెట్ పడగొట్టారు.

పూరన్ అరుదైన రికార్డ్
ఈ మ్యాచ్​లో నికోలస్ పూరన్ 19 పరుగులే చేసిన ఓ అరుదైన ఘనత సాధించాడు. లఖ్​నవూ జట్టు తరఫున అత్యధిక పరుగులు చేసిన బ్యాటర్​గా రికార్డు కొట్టాడు. అతడు ఇప్పటిదాకా 1422 పరుగులు నమోదు చేశాడు. ఈ క్రమంలోనే కేఎల్ రాహుల్ (1410 పరుగులు)ను అధిగమించాడు.

LSG తరఫు అత్యధిక పరుగులు బాదిన బ్యాటర్లు

• 1422 పరుగులు - పూరన్
• 1410 పరుగులు- కేఎల్ రాహుల్
• 1038 పరుగులు- ఆయుశ్ బదోని
• 952 పరుగులు- మార్కస్ స్టోయినిస్
• 901 పరుగులు - క్వింటన్- డి కాక్

ఆరో ఓటమి
ఈ మ్యాచ్​తో లఖ్​నవూ చెత్త రికార్డు కొనసాగుతోంది. సొంతగడ్డపై వరుసగా ఆరో ఓటమి మూటగట్టుకుంది. ఇవన్నీ కూడా తొలుత బ్యాటింగ్ చేసిన సందర్భాలే కావడం గమనార్హం.

CSK చేతిలో 5 వికెట్ల తేడాతో ఓటమి

• DC చేతిలో 8 వికెట్ల తేడాతో ఓటమి
• SRH చేతిలో 6 వికెట్ల తేడాతో ఓటమి
• RCB చేతిలో 6 వికెట్ల తేడాతో ఓటమి
• DC చేతిలో 6 వికెట్ల తేడాతో ఓటమి
• GT చేతిలో 7 వికెట్ల తేడాతో ఓటమి *

ప్రసిద్ధ్ అరుదైన రికార్డు
నాలుగు వికెట్లతో లఖ్​నవూ పతనాన్ని శాసించిన ప్రసిద్ధ్​కు ప్లేయర్ ఆఫ్ ది మ్యాచ్ అవార్డు లభించింది. అయితే ప్రసిద్ధ్ ఇప్పటిదాకా 70 మ్యాచ్​లు ఆడాడు. అందులో 2025 నుంచి 19 మ్యాచ్​ల్లో గుజరాత్ జట్టుకు ప్రాతినిధ్యం వహించాడు. ఈ 19 మ్యాచ్​ల్లోనే అతడు మూడోసారి ప్లేయర్ ఆఫ్ ది మ్యాచ్ గెలుచుకున్నాడు. అంతకుముందు 51 మ్యాచ్​ల్లో అతడు ఈ అవార్డుకు ఎంపిక కాలేదు. ఇక 2025 నుంచి అత్యధికసార్లు ప్లేయర్ ఆఫ్ ది మ్యాచ్ అవార్డు దక్కించుకున్న ప్లేయర్​గా శ్రేయస్ అయ్యర్ టాప్​లో కొనసాగుతున్నాడు. అతడికి ఈ పురస్కారం నాలుగుసార్లు దక్కింది. ఆ తర్వాత ప్రసిద్ధ్​తోపాటు కృనాల్, సమీర్ రిజ్వీలకు మూడేసి సార్లు దక్కింది.