'ఒక్క రన్, ఒకే ఒక్క రన్'​- దిల్లీపై గుజరాత్ థ్రిల్లర్ విక్టరీ

IPL 2026 DC Vs GT : దిల్లీ క్యాపిటల్స్‌తో జరిగిన ఉత్కంఠ పోరులో గుజరాత్ టైటాన్స్‌ ఒక్క పరుగు తేడాతో విజయం సాధించింది. గుజరాత్ టైటాన్స్​ నిర్దేశించిన 211 పరుగుల లక్ష్య ఛేదనలో దిల్లీ క్యాపిటల్స్ ఓవర్లన్నీ ఆడి 8 వికెట్లు కోల్పోయి 209 పరుగులు చేసింది. ఛేదనలో కేఎల్ రాహుల్ 52 బంతుల్లో 11 ఫోర్లు, 4 సిక్స్‌లు బాది 92 పరుగులతో ఆకట్టుకున్నాడు. నిశాంక 24 బంతుల్లో 41 పరుగులు, డేవిడ్ మిల్లర్ 20 బంతుల్లో 41 రన్స్‌తో మెరుపులు మెరిపించినా దిల్లీకి ఓటమి తప్పలేదు. గుజరాత్ బౌలర్లలో రషీద్ ఖాన్ 3, ప్రసిద్ధ్‌ కృష్ణ 2, సిరాజ్ ఒక వికెట్ పడగొట్టారు. మూడు వికెట్లు పడగొట్టి గుజరాత్ విజయంలో కీలక పాత్ర పోషించిన బౌలర్ రషీద్ ఖాన్​కు 'ప్లేయర్ ఆఫ్ ది మ్యాచ్' అవార్డు లభించింది.

ఆఖర్లో ఉత్కంఠ
గుజరాత్ గెలుపు కోసం చివరి ఓవర్లో 13 పరుగులు కావాల్సి వచ్చింది. ఈ ఓవర్​ను ప్రసిద్ధ్ కృష్ణ బౌలింగ్ చేశాడు. క్రీజులో ఉన్న విప్రజ్ నిగమ్ తొలి బంతికి ఫోర్ బాదాడు. అయితే రెండో బంతికి అతడు ఔటయ్యాడు. ఇక క్రీజులోకి వచ్చిన కుల్దీప్ యాదవ్ మూడో బంతికి సింగిల్ తీసి మిల్లర్​కు స్ట్రైక్ ఇచ్చాడు. నాలుగో బంతికి మిల్లర్ సిక్స్​ బాది దిల్లీని విజయం అంచులదాకా చేర్చాడు. అయితే ఒత్తిడిలో ఉన్నప్పటికీ చివరి రెండు బంతులను ప్రసిద్ధ్ డాట్స్​గా మలిచి గుజరాత్​కు విజయం అందించాడు.

తొలుత బ్యాటింగ్ చేసిన గుజరాత్ 20 ఓవర్లలో 4 వికెట్ల నష్టానికి 210 పరుగులు చేసింది. గుజరాత్ బ్యాటర్లలో టాప్‌-4లో ముగ్గురు అర్ధ శతకాలు బాదారు. కెప్టెన్ శుభ్‌మన్ గిల్ 45 బంతుల్లో 4 ఫోర్లు, 5 సిక్స్‌లతో 70 పరుగులు చేశాడు. జాస్ బట్లర్ 27 బంతుల్లో 3 ఫోర్లు, 5 సిక్స్‌లు బాది 52 రన్స్‌తో రాణించాడు. వాషింగ్టన్ సుందర్ 32 బంతుల్లో 6 ఫోర్లు, 2 సిక్స్‌లతో హాఫ్‌ సెంచరీ సాధించాడు. సాయి సుదర్శన్ 12, గ్లెన్ ఫిలిప్స్‌ 14 పరుగులు నిరాశ పర్చారు. దిల్లీ బౌలర్లలో ముకేశ్ కుమార్ 2, లుంగి ఎంగిడి, కుల్‌దీప్ యాదవ్ ఒక్కో వికెట్ తీశారు.

ఇద్దరికీ మొదటిదే!
ప్రస్తుత సీజన్​లో దిల్లీ జట్టుకు ఇదే తొలి ఓటమి కాగా, అటు గుజరాత్ టైటాన్స్​కు ఇది మొదటి విజయం కావడం విశేషం. ఈ మ్యాచ్​కు ముందు లఖ్​నవూ సూపర్ జెయింట్స్​, ముంబయి ఇండియన్స్​తో ఆడిన దిల్లీ వరుసగా రెండు విజయాలు నమోదు చేసింది. మరోవైపు, తొలి రెండు మ్యాచ్​ల్లో వరుసగా పంజాబ్ కింగ్స్, రాజస్థాన్ రాయల్స్​ను ఢీ కొట్టిన గుజరాత్ రెండింట్లోనూ ఓటమి చెందింది. ఇక పట్టికలో ప్రస్తుతం నాలుగు పాయింట్లతో దిల్లీ నాలుగో స్థానంలో ఉండగా, రెండు పాయింట్లతో గుజరాత్ ఆరో ప్లేస్​లో కొనసాగుతోంది.

ఐపీఎల్​లో గుజరాత్ టైటాన్స్​ స్వల్ప తేడాతో నెగ్గిన సందర్భాలు (పరుగుల పరంగా)

• 1 పరుగు vs దిల్లీ క్యాపిటల్స్, దిల్లీ, 2026
• 6 పరుగులు vs ముంబయి ఇండియన్స్, అహ్మదాబాద్, 2024
• 7 పరుగులు vs లఖ్​నవూ సూపర్ జెయింట్స్​, లఖ్​నవూ, 2023
• 8 పరుగులు vs కోల్​కతా నైట్​రైడర్స్, ముంబయి, 2022
• 14 పరుగులు vs దిల్లీ క్యాపిటల్స్, పుణె, 2022

కాగా, ఐపీఎల్​లో ఒక్క పరుగు తేడాతో ఓటమి చెందడం దిల్లీ జట్టుకు ఇది తొలిసారేం కాదు. ఈ మ్యాచ్​తో సహా ఇప్పటిదాకా దిల్లీ క్యాపిటల్స్ నాలుగు సార్లు 1 పరుగు స్వల్ప తేడాతో విజయం ముంగిట ఆగిపోయింది. ఐపీఎల్ చరిత్రలో ఇదే అత్యధికం. ఇన్నిసార్లు ఏ జట్టు కూడా ఇంత తక్కువ తేడాతో ఓడిపోలేదు.

1 పరుగు స్వల్ప తేడాతో దిల్లీ కోల్పోయిన మ్యాచ్​లు

• vs చెన్నై సూపర్ కింగ్స్, చెన్నై- 2015
• vs గుజరాత్ లయన్స్​, దిల్లీ- 2016
• vs రాయల్ ఛాలెంజర్స్ బెంగళూరు, అహ్మదాబాద్- 2021
• vs గుజరాత్ టైటాన్స్, దిల్లీ- 2026

రఫ్పాడించిన రిజ్వీ- ముంబయిపై దిల్లీ గ్రాండ్ విక్టరీ

'ఒక్క ఫెయిల్యూర్​తో అలా అనడం కరెక్ట్ కాదు'- హిట్​మ్యాన్​కు కెప్టెన్​ గిల్ మద్దతు