ఆసియా ఛాంపియన్​షిప్ : ఆయుశ్​కు నిరాశ- ఫైనల్​లో ఘోర ఓటమి

Asia Championship Badminton 2026 : 2026 బ్యాడ్మింటన్ ఆసియా ఛాంపియన్‌షిప్స్ పురుషుల సింగిల్స్ ఫైనల్‌లో భారత యువ షట్లర్ ఆయుశ్ శెట్టికి ఎదురుదెబ్బ తగిలింది. అతను ప్రపంచ నంబర్ టూ షి యు క్వి చేతిలో 21-8, 21-10 తేడాతో వరుస సెట్లలో ఓడిపోయాడు. ఫైనల్‌కు చేరడానికి ముందు అగ్రశ్రేణి ఆటగాళ్లను ఓడించిన ఆయుశ్ శెట్టి, టైటిల్‌ పోరులో చతికిలపడి సిల్వర్ మెడల్​తో సరిపెట్టుకున్నాడు. ఈ ఓటమితో ఆసియా బ్యాడ్మింటన్ ఛాంపియన్‌షిప్స్ పురుషుల సింగిల్స్ టైటిల్ కోసం భారత్ నిరీక్షణ ఇంకా కొనసాగుతుంది.

ఫైనల్​లో ఆయుశ్ తడబాటు
భారీ అంచనాలతో బరిలోకి దిగిన ఆయుశ్ ఫైనల్​లో తడబడ్డాడు. ఒత్తిడికి గురయ్యాడో ఏమో కానీ వరుస సెట్లలో పరాజయం పాలయ్యాడు. చైనాకు చెందిన షి యుకి మొదటి సెట్‌లో ఆరంభం నుంచే ఆధిపత్యం ప్రదర్శించాడు. బ్రేక్ సమయానికి 11-6 లీడ్​లో ఉన్నాడు. అదే లీడ్ కొనసాగిస్తూ 21- 8 తేడాతో తొలి సెట్​ను షి యుకి గెలుచుకున్నాడు. రెండో సెట్​లో ఆయుశ్ కాస్త పుంజుకున్నట్లే కనిపించాడు. తొలుత 7- 2తో లీడ్​లోకి వచ్చాడు. దీంతో కమ్​బ్యాక్ ఇచ్చినట్లే అనిపించింది. కానీ షి యుకి జెట్ స్పీడ్​లో దూసుకొచ్చాడు. తొలి సెట్​లో ప్రదర్శించిన అదే జోరు అందుకొంటూ బ్రేక్ సమయానికి 11- 8తో ఆధిక్యం సాధించాడు. ఆ తర్వాత అదే జోరు ప్రదర్శించిన అతడు, ఆయుశ్​కు ఎలాంటి ఛాన్స్ ఇవ్వలేదు. చివరికి ఈ సెట్​ను కూడా 21- 10తో గెలుచుకొని స్వర్ణ పతరం ముద్దాడాడు.

అంతకుముందు ఈ టోర్నీలో ఆయుశ్ శెట్టి అసాధారణ ప్రదర్శనతో ఆకట్టుకున్నాడు. అతడు ఫైనల్‌కు చేరడానికి ముందు, ప్రపంచ నంబర్ 7 లీ షి ఫెంగ్, ప్రపంచ నంబర్ 4 జోనాథన్ క్రిస్టీ, ప్రపంచ నంబర్ 1 కున్లావుట్ విట్సెర్న్‌లను ఓడించాడు. బ్యాడ్మింటన్ ఆసియా ఛాంపియన్‌షిప్‌లకు ముందు ఆయుశ్ పారిస్ ఒలింపిక్ కాంస్య పతక విజేత లీ జి జియా, మాజీ ప్రపంచ ఛాంపియన్ లో కీన్ యు, బ్రియాన్ యంగ్‌లను కూడా ఓడించాడు. దీంతో భారీ అంచనాలతో ఫైనల్​లోకి దూసుకెళ్లాడు. కానీ తుది మెట్టుపై బోల్తా కొట్టాడు.