పిల్లల బాక్స్​లోకి ఇలా "ఉసిరి పులిహోర" చేసి పెట్టండి - కమ్మగా, కడుపునిండా తినేస్తారు!

Usirikaya Pulihora Recipe in Telugu : శీతాకాలం స్టార్ట్ కావడంతో మార్కెట్లోకి ఉసిరికాయలు విరివిగా వస్తుంటాయి. ఈ క్రమంలోనే చాలా మంది ఉసిరితో పచ్చడి నుంచి పప్పు వరకు రకరకాల రెసిపీలు ట్రై చేస్తుంటారు. మీరు ఉసిరితో ఏదైనా కొత్తగా ట్రై చేయాలనుకుంటున్నారా? అయితే, మీకోసమే ఒక స్పెషల్ రెసిపీని తీసుకొచ్చాం. అదే, నోరూరించే "ఉసిరికాయ పులిహోర". నార్మల్​గా మనందరం నిమ్మకాయ, చింతపండు వంటి వాటితో ఎక్కువగా పులిహోర చేసుకుంటుంటాం. కానీ, ఒకసారి ఈ సీజన్​లో దొరికే ఉసిరితో ఇలా 'పులిహోర' చేసి చూడండి.

ఇది ప్రత్యేకమైన టేస్ట్​తో ఆహా అనిపిస్తుంది. పిల్లల లంచ్​బాక్స్​లోకి కూడా ఈ పద్ధతిలో ఉసిరి అన్నం చేసి పెట్టారంటే మెతుకు మిగల్చకుండా కమ్మగా, కడుపునిండా తినేస్తారు! అలాగే, దీని తయారీకి ఎక్కువ టైమ్ కూడా పట్టదు. చాలా తక్కువ టైమ్​లో ఇన్​స్టంట్​గా రెడీ చేసుకోవచ్చు. మొదటిసారి చేసేవారైనా ఈ కొలతలతో చేశారంటే పర్ఫెక్ట్​ టేస్ట్​తో అదుర్స్ అనిపిస్తుంది. మరి, సూపర్ టేస్టీగా ఉండే ఉసరికాయ పులిహోరకు కావాల్సిన పదార్థాలేంటి? ఎలా ప్రిపేర్ చేసుకోవాలో ఇప్పుడు చూద్దాం.

ఉసిరికాయలు (Eenadu)

కావాల్సిన పదార్థాలు :

• బియ్యం - ఒక కప్పు
• నూనె - మూడు చెంచాలు
• పల్లీలు - మూడు చెంచాలు
• ఉసిరికాయలు - నాలుగు
• తాలింపు దినుసులు - ఒకట్రెండు టేబుల్​స్పూన్లు
• ఉప్పు - రుచికి తగినంత
• పసుపు - కొద్దిగా
• ఇంగువ - అరటీస్పూన్
• ఎండుమిర్చి - నాలుగైదు
• కరివేపాకు - ఒకట్రెండు రెమ్మలు

కమ్మని "ఉసిరికాయ రోటి పచ్చడి" - వేడివేడి అన్నంలోకి అమృతమే - అప్పటికప్పుడు చేసుకోవచ్చు!'

రైస్ (Getty Images)

తయారీ విధానం :

• ఈ నోరూరించే ఉసిరికాయ పులిహోర తయారీ కోసం ముందుగా ఒక గిన్నెలో బియ్యం తీసుకుని కడిగి ఆపై తగినన్ని నీళ్లు పోసి ఉడికించుకోవాలి.
• అయితే, ఇక్కడ అన్నంను మరీ మెత్తగా కాకుండా కాస్త పొడిపొడిలాడేలా వండుకోవాలి.
• అన్నం ఉడికేలోపు రెసిపీలోకి కావాల్సిన ఉసిరికాయలను గింజలు తీసేసి శుభ్రంగా కడిగి మిక్సీ జార్​లో వేసి మెత్తగా మిక్సీ పట్టుకోవాలి.
• తర్వాత మిక్సీ పట్టుకున్న ఉసిరి పేస్ట్​లో రుచికి తగినంత ఉప్పు వేసి అంతా కలిసేలా కలపాలి.

ఎండుమిర్చి (Getty Images)

• ఇప్పుడు పొడిపొడిగా ఉడికించుకున్న అన్నంను ఒక వెడల్పాటి ప్లేట్ లేదా బేషన్​లోకి తీసుకోవాలి. ఆపై అందులో ఉప్పు కలిపిపెట్టుకున్న ఉసిరి పేస్ట్​ను వేసి అది రైస్​లో చక్కగా కలిసిపోయేలా మిక్స్ చేసుకుని పక్కనుంచాలి.
• అనంతరం స్టవ్ మీద కడాయిలో నూనె పోసి వేడి చేసుకోవాలి. ఆయిల్ కాగిన తర్వాత పల్లీలు వేసి దోరగా వేయించాలి.
• పల్లీలు లైట్​గా వేగాక తాలింపు దినుసులు(ఆవాలు, శనగపప్పు, మినప్పప్పు) వేయించుకోవాలి.

సిసలైన "మిరియాల చారు"! - వేడివేడి అన్నంలోకి అద్దిరిపోవాల్సిందే!

పల్లీలు (Getty Images)

• ఆవాలు చిటపటలాడుతున్నప్పుడు ఎండుమిర్చి, పసుపు, ఇంగువ, కరివేపాకు వేసి తాలింపును చక్కగా వేయించుకుని స్టవ్ ఆఫ్ చేసుకోవాలి.
• తర్వాత ఈ తాలింపును ముందుగా రెడీ చేసి పెట్టుకున్న అన్నంలో వేసి మొత్తం కలిసేలా మిక్స్ చేసుకుంటే చాలు. అంతే, సరికొత్త రుచితో ఘుమఘుమలాడే "ఉసిరికాయ పులిహోర" రెడీ అవుతుంది!
• మరి, నచ్చితే మీరు చింతపండు, నిమ్మకాయకు బదులుగా ఒకసారి ఇలా ఉసిరి పులిహోర ట్రై చేయండి. అటు మంచి రుచితో ఇటు ఆరోగ్యాన్ని సొంతం చేసుకుంటారు! పిల్లల నుంచి పెద్దల వరకు అందరూ లొట్టలేసుకుంటూ తింటారు!

పోపుదినుసులు (Getty Images)

కార్తికమాసం స్పెషల్ : "వంకాయ చిక్కుడుకాయ పచ్చికారం" - ఉల్లి, వెల్లుల్లి లేకుండానే సూపర్ టేస్ట్​!