చల్లని వేళ నోరూరించే "చంద్రముఖి చికెన్ ఫ్రై" - తిన్నారంటే లక లక లక అనాల్సిందే!

Chandramukhi Chicken Fry in Telugu : వాతావరణం చల్లగా ఉన్నప్పుడు చాలా మందికి స్పైసీ స్పైసీగా నాన్​వెజ్ రుచులను ఆస్వాదించాలని ఉంటుంది. ఈ క్రమంలోనే ఎక్కువ మంది చికెన్​తో రకరకాల రెసిపీలు ప్రిపేర్ చేసుకుని ఆరగిస్తుంటారు. అయితే, చికెన్ కర్రీని ఎప్పుడూ తినే రుచిలో కాకుండా ఈసారి కాస్త వెరైటీగా ట్రై చేయండి. అదే, నోరూరించే "చంద్రముఖి చికెన్ ఫ్రై". ఆంధ్ర క్యాటరింగ్ స్టైల్​లో సూపర్ టేస్టీగా ఉండే ఈ చికెన్ వేపుడును ఇంటిల్లిపాదీ ముక్క మిగల్చకుండా కమ్మగా తినేస్తారు. ఈ ఫ్రై స్టార్టర్​గా కూడా అద్దిరిపోతుంది. మరి, మంచి ఘాటైన గ్రేవీ కోటింగ్​తో స్పైసీ స్పైసీగా ఉండే ఈ చికెన్ ఫ్రైను ఎలా చేసుకోవాలో ఇప్పుడు చూద్దాం.

Chandramukhi Chicken Fry (Getty Images)

కావాల్సిన పదార్థాలు :

ఫ్రై కోసం :

• చికెన్ - కేజీన్నర
• నూనె - తగినంత
• లవంగాలు - నాలుగు
• యాలకులు - మూడు
• దాల్చిన చెక్క - చిన్న ముక్క
• జీడిపప్పులు - ఆరు టేబుల్​స్పూన్లు
• సన్నని ఉల్లిపాయ తరుగు - ఒకటిన్నర కప్పు
• కరివేపాకు - కొద్దిగా
• అల్లంవెల్లుల్లి పేస్ట్ - మూడు చెంచాలు
• కసూరి మేతి - కొద్దిగా
• కారం, ఉప్పు - రుచికి తగినంత
• ఎండుకొబ్బరి పొడి - నాలుగు చెంచాలు
• కొత్తిమీర తరుగు - కొద్దిగా
• నిమ్మరసం - కొద్దిగా
• చెట్టినాడు మసాలా పొడి - రెండు టీస్పూన్లు

Chandramukhi Chicken Fry (Getty Images)

మసాలా పేస్ట్ కోసం :

• నూనె - ఏడెనిమిది చెంచాలు
• లవంగాలు - ఆరేడు
• అనాసపువ్వు - ఒకటి
• యాలకులు - నాలుగు
• దాల్చినచెక్క - మూడించుల ముక్క
• మిరియాలు - రెండు టీస్పూన్లు
• ఎండుమిర్చి - ఆరేడు
• జీలకర్ర - రెండు టీస్పూన్లు
• ధనియాలు - నాలుగు టేబుల్​స్పూన్లు
• సోంపు - రెండు టీస్పూన్లు
• ఉల్లిపాయ ముక్కలు - అర కప్పు
• పచ్చిమిర్చి - నాలుగు

ఒక్కసారి తింటే మళ్లీ మళ్లీ కావాలనే "చేపల కుర్మా" - పిల్లలకూ బాగా నచ్చేస్తుంది!

Chandramukhi Chicken Fry (Getty Images)

తయారీ విధానం :

• ఈ రెసిపీ కోసం ముందుగా ఒక గిన్నెలో శుభ్రంగా కడిగిన చికెన్ ముక్కలను తీసుకోవాలి.
• ఆపై అందులో రెండున్నర కప్పుల నీళ్లు, అరటీస్పూన్ పసుపు, కొద్దిగా ఉప్పు వేసి కలుపుతూ రెండు మూడు నిమిషాలు ఉడికించాలి.
• ఆ తర్వాత గిన్నెపై మూత పెట్టి ముక్క 70 నుంచి 80 శాతం ఉడికే వరకు మధ్యమధ్యలో కలుపుతూ కుక్ చేసుకోవాలి.
• చికెన్ ఉడికేలోపు రెసిపీలోకి కావాల్సిన స్పెషల్ మసాలా పేస్ట్​ను రెడీ చేసుకోవాలి.
• ఇందుకోసం స్టవ్ మరో బర్నర్ మీద పాన్​లో ఏడెనిమిది టేబుల్​స్పూన్ల నూనె వేసి వేడి చేసుకోవాలి.

Chandramukhi Chicken Fry (Getty Images)

• ఆయిల్ కాగిన తర్వాత లవంగాలు, అనాసపువ్వు, యాలకులు, దాల్చినచెక్క, మిరియాలు వేసి అర నిమిషం పాటు వేయించాలి.
• ఆ తర్వాత ఎండుమిర్చి, జీలకర్ర, ధనియాలు, సోంపు వేసి మసాలాలు కాస్త పొంగే వరకు వేయించుకోవాలి.
• ఇక్కడ మసాలాలను మరీ ఎర్రగా వేయించుకోవద్దు. అలా వేయిస్తే కూర చేదు వస్తుందని గుర్తుంచుకోవాలి.
• మసాలాలను ఆవిధంగా వేయించుకున్నాక అందులో ఉల్లిపాయ ముక్కలు, పచ్చిమిర్చి తుంపలు వేసి ఆనియన్స్ కాస్త రంగు మారేంత వరకు వేయిచుకోవాలి.
• అలా వేయించుకున్నాక స్టవ్ ఆఫ్ చేసుకుని మిక్సీ జార్​లోకి తీసుకుని మెత్తని పేస్ట్​లా గ్రైండ్ చేసుకుంటే మసాలా పేస్ట్ రెడీ అవుతుంది!
• ఇప్పుడు స్టవ్ మీద ఉడుకుతున్న చికెన్ 80 శాతం కుక్ అయ్యిందనుకున్నాక స్టవ్ ఆఫ్ చేసి ఆ మిశ్రమంలో నుంచి చికెన్ ముక్కలను వడకట్టేసి ఒక ప్లేట్​లోకి తీసుకుని పక్కనుంచాలి.

Chandramukhi Chicken Fry (Getty Images)

• నెక్ట్స్ ఫ్రై కోసం స్టవ్ మీద కడాయిలో అర కప్పు నూనె వేసి హీట్ చేసుకోవాలి. ఆయిల్ హీట్ అయ్యాక లవంగాలు, యాలకులు, దాల్చినచెక్క, జీడిపప్పులు వేసి వేయించాలి.
• జీడిపప్పులు లైట్​గా వేగాక కట్ చేసి పెట్టుకున్న సన్నని ఉల్లిపాయ తరుగు, రుచికి తగినంత ఉప్పు వేసి కలుపుతూ ఆనియన్స్ లైట్ గోల్డెన్ కలర్ వచ్చేంత వరకు ఫ్రై చేసుకోవాలి.
• ఉల్లిపాయ ముక్కలు వేగాక కరివేపాకు, అల్లంవెల్లుల్లి పేస్ట్ వేసి పచ్చివాసన పోయేంత వరకు వేయించాలి.
• ఆ తర్వాత ఉడికించి పక్కన పెట్టుకున్న చికెన్ ముక్కలు వేసి ఉల్లిపాయ మిశ్రమంలో ఒక నిమిషం పాటు ఫ్రై చేసుకోవాలి.

Chandramukhi Chicken Fry (Getty Images)

• అనంతరం ముందుగా గ్రైండ్ చేసి పెట్టుకున్న మసాలా పేస్ట్ మిశ్రమాన్ని వేసి అంతా బాగా కలిసేలా మిక్స్ చేసుకోవాలి.
• ఆ తర్వాత స్టవ్​ను మీడియం ఫ్లేమ్​లో ఉంచి అడుగంటకుండా కలుపుతూ చికెన్ మిశ్రమంలో నుంచి ఆయిల్ సెపరేట్ అయ్యేంత వరకు కుక్ చేసుకోవాలి.
• ఆవిధంగా వేయించుకున్నాక కసూరిమేతిని చేతితో నలిపి వేసుకోవాలి. ఆపై రుచికి తగినంత కారం వేసుకుని కలుపుకోవాలి.
• ఒకవేళ కర్రీ అడుగంటుతున్నట్లనిపిస్తే కొద్దిగా నీళ్లను చిలకరించుకుని కలుపుతూ బాగా వేయించుకోవాలి.
• కారాలు మంచిగా వేగాక చివరగా ఎండుకొబ్బరి పొడిని వేసుకుని మూడ్నాలుగు నిమిషాలు కలుపుతూ వేయించుకుని స్టవ్ ఆఫ్ చేసుకోవాలి.

Chandramukhi Chicken Fry (Getty Images)

• ఆ తర్వాత సన్నని కొత్తిమీర తరుగు, నిమ్మరసం పిండుకుని, చెట్టినాడు మసాలా పౌడర్ వేసుకుని అంతా కలిసేలా బాగా టాస్ చేసుకుని వేడి వేడిగా సర్వ్ చేసుకుంటే చాలు.
• అంతే, ఆంధ్ర క్యాటరింగ్ స్టైల్​లో స్పైసీ స్పైసీగా నోరూరించే "చంద్రముఖి చికెన్ ఫ్రై" రెడీ అవుతుంది!
• ఇక్కడ చెట్టినాడు మసాలా పొడి లేనివారు నార్మల్ గరంమసాలా వేసుకున్నా సరిపోతుంది.
• మరి, నచ్చితే ఈ చల్లని వేళ మీరూ ఓసారి ఇలా చంద్రముఖి చికెన్ వేపుడును ట్రై చేయండి. తిన్నవారేవరైనా సరే ఈ కర్రీ అద్భుతమైన టేస్ట్​కు లక లక లక లక అనాల్సిందే!

ఎన్నడూ ట్రై చేయని కొత్తరకం "టమాటా పచ్చడి" - తక్కువ టైమ్​లో ఎక్కువ రుచికరంగా!

పిల్లల కోసం అప్పటికప్పుడు చేసే క్రిస్పీ "స్నాక్" - నెల రోజులు కరకరలాడుతూ కమ్మగా తినేయొచ్చు!