ఘుమఘుమలాడే "బిర్యానీ మసాలా పౌడర్​" - ఒక్కసారి ప్రిపేర్​ చేసుకుంటే 2 నెలలు నిల్వ!

Shahi Biryani Masala: బిర్యానీ పేరు చెబితే నాలుక లబలబలాడుతుంది. ఎప్పుడెప్పుడు తిందామా అని నోరు ఊరుతుంది. ఘుమఘుమలాడే సువాసనతో పొగలు కక్కే బిర్యానీ ఎదురుగా ఉంటే తగ్గేదేలే అని ఓ పట్టుపడతారు ఫుడ్డీస్​. అందుకే చాలా మంది ఫేవరెట్​ ఫుడ్​ లిస్ట్​లో బిర్యానీ ముందు​ వరస​లోనే ఉంటుంది. అయితే బిర్యానీ అంత టేస్టీ అండ్​ యమ్మీగా రావడానికి మెయిన్​ రీజన్​ "మసాలా".

ఎందుకంటే, మసాలా ఫ్లేవర్​ను బట్టే బిర్యానీ రుచి ఉంటుంది. అందుకే పెద్ద పెద్ద రెస్టారెంట్స్​, హోటల్స్ లో బిర్యానీ టేస్ట్​ అద్దిరిపోవడానికి రీజన్ ఇదే! అయితే, హోటల్స్​ టేస్ట్​ రావాలని చాలా మంది మార్కెట్లో లభించే మసాలా పొడిని కొనుగోలు చేస్తుంటారు. కానీ అది ఓపెన్​ చేసిన కొద్దిరోజులకే వాసన, రుచి మారుతుంది. ఇలాంటి సమస్య రాకూడదంటే ఇంట్లోనే బిర్యానీ మసాలా ప్రిపేర్​ చేసుకోవడం మంచిది. చాలా అంటే చాలా సింపుల్​గా దీన్ని తయారు చేసుకోవచ్చు. మరి, లేట్​ చేయకుండా ఇంట్లోనే షాహీ బిర్యానీ మసాలా ఎలా చేయాలో చూసేయండి.

ధనియాలు (Getty Images)

కావాల్సిన పదార్థాలు:

• ధనియాలు - 3 ​స్పూన్లు
• షాజీరా - ఒకటిన్నర ​స్పూన్లు
• జీలకర్ర - ఒకటిన్నర ​స్పూన్లు
• పచ్చ యాలకులు - 2 ​స్పూన్లు
• నల్ల యాలకులు - 1 ​స్పూన్​
• మిరియాలు - 2 ​స్పూన్లు
• లవంగాలు - 1 స్పూన్​
• దాల్చిన చెక్క - 4 ఇంచ్​లు
• అనాస పువ్వులు - 2
• మరాఠీ మొగ్గలు - 5
• జాపత్రి - అర స్పూన్​
• జాజికాయ - అర ముక్క
• బ్యాడిగీ మిర్చి - 5
• రాతి పువ్వు - 2 స్పూన్లు
• బిర్యానీ ఆకులు - 15
• కసూరీ మేథీ - 1 స్పూన్​
• పసుపు - 1 స్పూన్​

మసాలా దినుసులు (Getty Images)

తయారీ విధానం:

• ముందుగా దాల్చినచెక్క, బిర్యానీ ఆకులను చిన్న ముక్కలుగా కట్​ చేసి పెట్టుకోవాలి.
• స్టవ్​ ఆన్​ చేసి అడుగు మందంగా ఉన్న పాన్​ పెట్టి హీట్​ చేసుకోవాలి. పెనం వేడెక్కిన తర్వాత స్టవ్​ ఆఫ్​ చేయాలి.
• ఇప్పుడు పెనంలోకి ధనియాలు, షాజీరా, జీలకర్ర, పచ్చ యాలకులు, నల్ల యాలకులు, మిరియాలు, దాల్చినచెక్క, లవంగాలు, అనాసపువ్వు, మరాఠీ మొగ్గ, జాపత్రి, జాజికాయ, బ్యాడిగీ మిర్చి, రాతి పువ్వు, బిర్యానీ ఆకులు వేసుకోవాలి.

మసాలా దినుసులు (Getty Images)

• మసాలా దినుసులు అన్నీ పాన్​లోకి వేసుకున్న తర్వాత స్టవ్​ ఆన్​ చేసి లో-ఫ్లేమ్​లో కలుపుతూ 5 నిమిషాల పాటు వేయించుకోవాలి.
• మసాలా దినుసులు వేగిన తర్వాత స్టవ్​ ఆఫ్​ చేసి కసూరీ మేథీ వేసి కలిపి పాన్​ను పక్కకు దింపి పూర్తిగా చల్లారనివ్వాలి.
• మసాలా దినుసులు పూర్తిగా చల్లారిన తర్వాత అందులో నుంచి కొన్ని యాలకులు తీసి పక్కన పెట్టాలి.
• మిగిలిన దినుసులను మిక్సీజార్​లోకి వేసుకోవాలి. ఆపై అందులో పసుపు వేసి మూత పెట్టి పల్స్​ మోడ్​లో మరీ మెత్తగా కాకుండా కాస్త బరకగా గ్రైండ్​ చేసుకోవాలి.

మసాలా దినుసులు (Getty Images)

• పదార్థాలను గ్రైండ్​ చేసుకున్న తర్వాత ప్లేట్​లోకి తీసుకుని పక్కకు తీసిన యాలకులు, కొన్ని ముక్కలుగా కట్​ చేసిన బిర్యానీ ఆకులు వేసి కలపాలి.
• చివరగా ఈ పొడిని తడి లేని, గాలి చొరబడని డబ్బాలో స్టోర్​ చేసి ఫ్రిజ్​లో నిల్వ చేస్తే సరి. ఎంతో ఘుమఘుమలాడే బిర్యానీ మసాలా పౌడర్​ రెడీ.
• ఈ పొడిని వెజ్​, నాన్​వెజ్​ బిర్యానీల్లోకి వేసుకోవచ్చు. వెజ్​ బిర్యానీకి అయితే ఒక స్పూన్​, నాన్​వెజ్​లోకి ఒకటిన్నర స్పూన్లు వేసుకోవాలి. లేదంటే మీరు తీసుకునే క్వాంటిటీని బట్టి యాడ్​ చేసుకోవచ్చు.

బిర్యానీ మసాలా పొడి (Getty Images)

చిట్కాలు:

• మసాలా దినుసులను మరీ ఎక్కువ సేపు వేయించాల్సిన పనిలేదు. మనం చేతితో తాకేంత వేడి వరకు ఫ్రై చేసుకుంటే సరిపోతుంది.
• కేవలం లో-ఫ్లేమ్​లో మాత్రమే వేయించుకోవాలి. హై -ఫ్లేమ్​లో అయితే మసాలా రుచి మారుతుంది.
• గ్రైండింగ్​ కోసం ఉపయోగించే మిక్సీజార్​, మసాలా పొడిని స్టోర్​ చేయాడానికి ఉపయోగించే జార్​లో అస్సలు తడి లేకుండా చూసుకోవాలి. తడి ఉన్నట్లైతే పొడి పాడయ్యే అవకాశం ఉంటుంది.

దీపావళికి శ్రీలంకన్ "లవారియా" స్వీట్ - ఈ మిఠాయితో పండగ చేసుకుంటారు!

ఇడ్లీ పిండితో "వడలు" చేసుకోండి - నూనె పీల్చకుండా క్రిస్పీగా వస్తాయి!