పల్లీలను ఇలా వేయించి "చట్నీ" చేయండి - టేస్ట్ అదుర్స్, వారం రోజులు నిల్వ!

Secret Tips to Make Palli Pachadi : కొన్నిసార్లు మార్నింగ్ బ్రేక్​ఫాస్ట్​లోకి ఎన్ని రకాల చట్నీలు చేసినా పిల్లలకు అవి ఒక పట్టాన నచ్చవు. దాంతో టిఫెన్ తినమంటే చట్నీ బాగలేదని మారాం చేస్తుంటారు. అలాంటి వారూ ఇష్టంగా తినేలా చేసి పెట్టే ఒక అద్భుతమైన రెసిపీ ఉంది. అదే, హోటల్ స్టైల్​లో అద్దిరిపోయే "పల్లీ చట్నీ". ఇది రెగ్యులర్​గా చేసుకునే వాటితో పోల్చితే చాలా రుచికరంగా ఉంటుంది. పల్లీలను వేయించడంలోనే ఈ చట్నీ టేస్ట్ మొత్తం దాగి ఉంటుంది. ఇలా చేశారంటే చిన్నారులు ఏ టిఫెన్ అయినా కాస్త ఎక్కువే తింటారు. అంతేకాదు, ఈ పచ్చడిని ​వారం రోజులు నిల్వ కూడా చేసుకోవచ్చు! మరి, తక్కువ టైమ్​లోనే ఈ సూపర్ టేస్టీ పల్లీ చట్నీని ఎలా చేసుకోవాలో ఇప్పుడు చూద్దాం.

Peanut Chutney Recipe (Getty Images)

కావాల్సిన పదార్థాలు :

• పల్లీలు - అర కిలో
• నూనె - నాలుగు టేబుల్​స్పూన్లు
• పచ్చిమిర్చి - 50 గ్రాములు
• పచ్చికొబ్బరి ముక్కలు - 250 గ్రాములు
• చింతపండు - ఏడెనిమిది గ్రాములు
• అల్లం - చిన్నముక్క
• బెల్లం - ఒక టేబుల్​స్పూన్

తెలంగాణ స్టైల్​ "టమాటా పప్పు" - వేడి వేడి అన్నంలో నెయ్యితో తింటే ఆహాఁ!

Peanut Chutney Recipe (Getty Images)

తయారీ విధానం :

• హోటల్ స్టైల్​లో అద్దిరిపోయే ఈ పల్లీ చట్నీ తయారీ కోసం ముందుగా స్టవ్ మీద కడాయిలో నాలుగు టేబుల్​స్పూన్ల నూనె వేసుకోవాలి.
• ఆయిల్​ లైట్​గా వేడయ్యాక పల్లీలను వేసి సన్నని సెగ మీద వేరుశనగ గుండ్లు చిట్లే వరకు కలుపుతూ నిదానంగా వేయించుకోవాలి.
• అప్పుడే పల్లీలు లోపలి వరకు బాగా వేగి చట్నీ మంచి రుచికరంగా వస్తుంది. పల్లీలు ఆయిల్​లో మంచిగా వేగాయనుకున్నాక స్టవ్ ఆఫ్ చేసుకుని వాటిని ఒక ప్లేట్​లోకి తీసుకోవాలి.
• తర్వాత అదే కడాయిలో మరో నాలుగు టేబుల్​స్పూన్ల నూనె వేసి వేడి చేసుకోవాలి.

Peanut Chutney Recipe (Getty Images)

• ఆయిల్ హీట్ అయ్యాక మీ రుచికి తగినన్ని పచ్చిమిరపకాయలను వేసి వాటిని బాగా వేయించి మరో ప్లేట్​లోకి తీసుకోవాలి.
• ఇప్పుడు పచ్చడిలోకి కావాల్సిన పరిమాణంలో పచ్చికొబ్బరి ముక్కలను సిద్ధం చేసుకుని పక్కనుంచాలి.
• అనంతరం మిక్సీ జార్ తీసుకుని అందులో వేయించుకున్న పల్లీలు, పచ్చిమిర్చి, సన్నని పచ్చికొబ్బరి ముక్కలు, చాలా కొద్దిగా నానబెట్టిన చింతపండు, చిన్న అల్లం ముక్క, బెల్లం వేసుకోవాలి.
• ఆపై అవసరంమేరకు కొద్దికొద్దిగా వాటర్(నాలుగైదు కప్పుల వరకు) యాడ్ చేసుకుంటూ వీలైనంత మెత్తగా పచ్చడిని గ్రైండ్ చేసుకోవాలి.
• తర్వాత గ్రైండ్ చేసుకున్న పచ్చడిని ఒక గిన్నెలోకి తీసుకుని అందులో రుచికి తగినంత ఉప్పు వేసుకుని మొత్తం కలిసేలా ఒకసారి బాగా కలుపుకోవాలి. ఇప్పుడు పచ్చడిలోకి తాలింపును రెడీ చేసుకోవాలి.

Peanut Chutney Recipe (Getty Images)

తాలింపు కోసం :

• నూనె - ఎనిమిది టేబుల్​స్పూన్లు
• ఎండుమిర్చి - నాలుగైదు
• మినప్పప్పు - రెండు టీస్పూన్లు
• శనగపప్పు - రెండు టీస్పూన్లు
• ఆవాలు - కొద్దిగా
• ధనియాలు - ఒక టీస్పూన్
• జీలకర్ర - ఒకట్రెండు టీస్పూన్లు
• కరివేపాకు - కొద్దిగా

Peanut Chutney Recipe (Getty Images)

• పోపు కోసం స్టవ్ మీద చిన్న కడాయిలో నూనె వేసి వేడి చేసుకోవాలి. ఆయిల్ కాగిన తర్వాత ఎండుమిర్చి ముక్కలు వేసి కాస్త కలర్ మారేంత వరకు వేయించాలి.
• ఆ తర్వాత అందులో మినప్పప్పు, శనగపప్పు వేసి వేయించాలి. అవి వేగి ఎర్రగా అవుతున్నప్పుడు ధనియాలను చేతితో నలిపి వేసుకోవాలి.
• అలాగే, జీలకర్ర, కరివేపాకు వేసుకుని తాలింపు మంచిగా వేయించి స్టవ్ ఆఫ్ చేసుకోవాలి.
• అనంతరం ఆ తాలింపును ముందుగా రెడీ చేసి పెట్టుకున్న పచ్చడిలో వేసి ఒకసారి మొత్తం కలిసేలా మిక్స్ చేసుకుంటే చాలు.
• అంతే, హోటల్ స్టైల్​లో సూపర్ టేస్టీగా ఉండే "పల్లీ చట్నీ" మీ ముందు ఉంటుంది!
• మీరు ఈ పచ్చడిని పోపు పెట్టకుండా ఎయిర్ టైటెడ్ డబ్బాలోకి తీసుకుని ఫ్రిడ్జ్​లో ఉంచితే వారం పాటు నిల్వ ఉంటుంది!
• టిఫెన్స్​లోకి తినాలనుకున్నప్పుడు అవసరం మేరకు కొద్దిగా తీసుకుని పోపు పెట్టి సర్వ్ చేసుకుంటే సరిపోతుంది.
• మరి, నచ్చితే మీరూ ఓసారి ఇలా పల్లీ చట్నీ ట్రై చేసి చూడండి. హోటల్ టేస్ట్​లో అద్దిరిపోయే దీన్ని ఇంటిల్లిపాదీ భలే ఇష్టంగా తింటారు.

Peanut Chutney Recipe (Getty Images)

చిట్కాలు :

• ఇక్కడ పచ్చిమిర్చీలను మీ రుచిని బట్టి తగినన్ని తీసుకోవాలి. ఎందుకంటే బయట మార్కెట్లో దొరికే వాటిల్లో కొన్ని కారం ఉంటాయి. మరికొన్ని చప్పగా ఉంటాయి.
• మీరు ఏ కొలతలతో ఈ పచ్చడిని చేసుకున్నా పల్లీల క్వాంటిటీలో సగం పచ్చికొబ్బరిని తీసుకోవాలి.
• ఒకవేళ మీరు ఈ చట్నీని తక్కువ క్వాంటిటీలో చేసుకోవాలనుకుంటే పల్లీలతో పాటు ఇతర పదార్థాలను అందుకు అనుగుణంగా తగ్గించి తీసుకుంటే సరిపోతుంది.

కరకరలాడే "సొరకాయ గారెలు" - నూనె పీల్చవు! - భలే రుచిగా ఉంటాయి!

నోరూరించే "పెసరపప్పు చెక్కలు" - సంక్రాంతి పండక్కి కరకరలాడించండి!