పచ్చిమిర్చితో సింపుల్​గా చేసుకునే "కారం పొడి" - కూరలు పక్కనపెట్టి తినేస్తారు!

Green Chilli Powder in Telugu : సాధారణంగా కర్రీ, పులుసు, రోటి పచ్చడి ఇలా ఏ వంటలోనైనా పచ్చిమిర్చి తప్పనిసరిగా ఉండాల్సిందే! ఎందుకంటే ఇది వంటలకు మంచి ఫ్లేవర్​తో పాటు కమ్మదనాన్ని ఇస్తుంది. అయితే వీటితో రుచికరమైన కారం పొడి చేసుకోవచ్చని మీకు తెలుసా? ఇది సరికొత్తగా ఉండడమే కాకుండా టేస్ట్​ కూడా అంతకు మించి అనేలా ఉంటుంది. వేడివేడి అన్నంలో ఈ పొడితో పాటు కాస్త నెయ్యి వేసి తింటే వావ్ అనాల్సిందే. అంతేకాక టిఫిన్స్​లోకి పర్ఫెక్ట్ కాంబినేషన్. పైగా దీన్ని చాలా తక్కువ పదార్థాలతో నిమిషాల్లోనే ప్రిపేర్ చేసుకోవచ్చు. మరి ఈ సూపర్ టేస్టీ పచ్చిమిర్చి కారంపొడికి కావాల్సిన పదార్థాలేంటి? ఎలా ప్రిపేర్ చేయాలి? అనే వివరాలు ఈ స్టోరీలో తెలుసుకుందాం.

"చికెన్ ఫ్రై కావాలి, సెమీ గ్రేవీ ఉండాలంటే" ఇలా ట్రై చేయండి! - ప్రతి ముక్క నోరూరిస్తుంది!

పచ్చిమిర్చి (Getty Images)

కావాల్సిన పదార్థాలు :

• పుట్నాలు - ముప్పావు కప్పు
• పల్లీలు - 1 టేబుల్ స్పూన్
• జీలకర్ర - 1 టీ స్పూన్
• ధనియాలు - 1 టీ స్పూన్
• ఎండుకొబ్బరి ముక్కలు - 2 టేబుల్ స్పూన్లు
• ఆయిల్ - 2 టేబుల్ స్పూన్లు
• పచ్చిమిర్చి - 25
• కరివేపాకు - ఒక కప్పు
• దొడ్డు ఉప్పు - రుచికి సరిపడా
• ఇంగువ - పావు టీ స్పూన్
• వెల్లుల్లి రెబ్బలు - 15

జీలకర్ర (Getty Images)

తయారీ విధానం :

• ఈ రెసిపీ కోసం ముందుగా 25 పచ్చిమిర్చిని శుభ్రంగా కడిగి పొడి క్లాత్​తో తుడిచి సన్నగా పొడువుగా కట్ చేసి పక్కనుంచాలి.
• అలాగే స్టవ్ ఆన్ చేసి పాన్​లో ముప్పావు కప్పు పుట్నాలు వేసి మంటను లో ఫ్లేమ్​లో ఉంచి రెండు నిమిషాల పాటు వేయించి ఓ ప్లేట్​లో వేయాలి.

కరివేపాకు (Getty Images)

• ఇదే పాన్​లో ఒక టేబుల్ స్పూన్ పల్లీలు వేసి వేగనివ్వాలి. పల్లీలు వేగిన తర్వాత ఒక టీ స్పూన్ జీలకర్ర, ఒక టీ స్పూన్ ధనియాలు యాడ్ చేసి ఫ్రై చేసి గిన్నెలో వేయాలి. ఇందులోనే రెండు టేబుల్ స్పూన్ల ఎండుకొబ్బరి వేసి వేగనించి ప్లేట్​లోకి తీసుకోవాలి.
• ఇదే పాన్​లో రెండు టేబుల్ స్పూన్ల నూనె పోయాలి. ఆయిల్ వేడైన తర్వాత కట్ చేసుకున్న పచ్చిమిర్చి ముక్కలు వేసి మంటను లో ఫ్లేమ్​లో ఉంచి ఫ్రై చేయాలి.

పల్లీలు (Getty Images)

• పచ్చిమిర్చి వేగిన తర్వాత కప్పు కరివేపాకు వేసి క్రిస్పీగా వేయించాలి. ఇందులోకి రెండు టీ స్పూన్ల చింతపండు యాడ్ చేసి బాగా కలిపి స్టవ్ ఆఫ్ చేసుకోవాలి.
• ఈ మిశ్రమం పూర్తిగా చల్లారిన తర్వాత మిక్సీజార్​లో పల్లీలుఎండుకొబ్బరి మిశ్రమం, ఫ్రై చేసి పెట్టుకున్న కరివేపాకు, రుచికి సరిపడా దొడ్డు ఉప్పు, పావు టీ స్పూన్ ఇంగువ వేసి కాస్త బరకగా గ్రైండ్ చేయాలి.

పుట్నాలు (Getty Images)

• ఇందులోకి వేయించిన పుట్నాలు వేసి కాస్త బరకగా గ్రైండ్ చేసుకోవాలి. చివరగా 15 వెల్లుల్లి రెబ్బలు యాడ్ చేసి కాస్త బరకగా మిక్సీ పట్టి పొడిని గిన్నెలో సర్వ్ చేసుకోవాలి.
• అంతే నోరూరించే పచ్చిమిర్చి కారం పొడి తయారైనట్లే!
• వేడివేడి అన్నంలో ఈ పొడి కాస్త నెయ్యి వేసి తిన్నారంటే ఇంకో రెండు ముద్దలు ఎక్కువగానే లాగిస్తారు!

పండక్కి కరకరలాడే "రిబ్బన్ పకోడీ" - ఇలా ట్రై చేస్తే నూనె తక్కువ పడుతుంది!

కొబ్బరితో కమ్మని "మురుకులు" - ఈ సంక్రాంతి పండక్కి కరకరలాడించండి!