సాయంత్రం కాగానే ఇంట్లోకి దోమలు వస్తున్నాయా? - ఇలా చేస్తే ఒక్కటి కూడా రావు!

Natural Ways to Avoid Mosquitoes: ఈవెనింగ్ అయితే చాలు దోమలు గుంపులుగా వస్తుంటాయి. సీజన్​తో సంబంధం లేకుండా మనుషులను పీల్చి పిప్పిచేస్తాయి. అందుకే వీటి నుంచి తప్పించుకునేందుకు చాలా మంది మార్కెట్​లో దొరికే ప్రొడక్ట్స్​ వాడుతుంటారు. అయితే వాటి నుంచి విడుదలయ్యే కెమికల్​ వల్ల దోమలు పోవడం అటుంచితే మన ఆరోగ్యం కూడా పాడవుతుంది. మరి ఇవి వాడకుండా దోమల నుంచి ఎలా తప్పించుకోవాలని ఆలోచిస్తున్నారా? అయితే ఇందుకోసం కొన్ని నేచురల్​ టిప్స్​ను నిపుణులు సూచిస్తున్నారు. మరి అవేంటో ఇప్పుడు చూద్దాం.

కలబంద: మెజార్టీ పీపుల్​ ఇంటి ఆవరణాల్లో కలబంద మొక్కలను విరివిగా పెంచుతుంటారు. అయితే జుట్టు ఆరోగ్యానికి మేలు చేసే అలోవెరా దోమ కాటుకి ఔషధంలా పని చేస్తుందని నిపుణులు పేర్కొంటున్నారు. దోమ కుట్టిన ప్రాంతంలో కలబంద గుజ్జును రాస్తే వెంటనే రిలిఫ్​ దొరుకుతుందని తెలియజేస్తున్నారు.

పెప్పర్​మెంట్​ ఆయిల్​ : ఇంటి నుంచి దోమలను తరిమి కొట్టేందుకు పెప్పర్​మెంట్​ ఆయిల్ ఉపయోగపడుతుందని నిపుణులు వివరిస్తున్నారు. ఇందుకోసం ఓ స్ప్రే బాటిల్​లో​ వాటర్​ పోసి అందులో కొన్ని చుక్కలు పెప్పర్‌మెంట్ నూనె వేయాలని ఒకవేళ ఇష్టమైతే ఏదైనా ఎసెన్షియల్ ఆయిల్స్​ కూడా కలిపి బాగా షేక్​ చేసి స్ప్రే చేస్తే దోమల బెడద ఉండదని పేర్కొంటున్నారు.

వెల్లుల్లి రెబ్బలు : కూరల రుచిని పెంచేందుకు ఉపయోగించే వెల్లుల్లి కూడా దోమలను నివారిస్తుందని నిపుణులు తెలియజేస్తున్నారు. కొన్ని వెల్లుల్లి రెబ్బలను కచ్చాపచ్చాగా దంచి, నెయ్యి లేదా నూనెతో పాటు కాస్తంత కర్పూరం వేసి వెలిగించుకుంటే ఆ పొగకు దోమలు నశిస్తాయని వివరిస్తున్నారు.

లావెండర్‌ నూనె : లావెండర్​ నూనె దోమలను తరిమికొట్టేందుకు ఉపయోగపడుతుందని నిపుణులు వివరిస్తున్నారు. ఇంట్లోని అన్ని రూమ్స్​, ముఖ్యంగా దోమలు ఎక్కువగా ఉండే ప్రాంతాల్లో లావెండర్‌ ఆయిల్​ స్ప్రే చేస్తే మంచి ఫలితం ఉంటుందని సూచిస్తున్నారు. ఇక దోమలు ఎక్కువగా ఉంటే లావెండర్‌ ఆయిల్‌ని కాళ్లు, చేతులకు రాసుకుంటే, దోమలు కూడా కుట్టవని పేర్కొంటున్నారు.

కర్పూరం: దాదాపుగా అందరి ఇండ్లలో కర్పూరం తప్పనిసరిగా ఉంటుంది. దీనితో దోమలను ఈజీగా తరిమికొట్టొచ్చని నిపుణులు చెబుతున్నారు. ఇందుకోసం సాయంత్రం పూట తలుపులు, కిటీకీలు క్లోజ్​ చేయాలని వివరిస్తున్నారు. అనంతరం కర్పూరం, వేపాకులు కలిపి పదిహేను నిమిషాల పాటు పొగ వేయాలంటున్నారు. ఇలా​ చేయడం వల్ల ఈ పొగకు దోమలు ఇంట్లోకి రావని పేర్కొంటున్నారు. ఒకవేళ వేపాకులు దొరక్కపోతే కర్పూరంతో పొగ వేసినా సరిపోతుందని సూచిస్తున్నారు.

సాంబ్రాణి : చిన్న పిల్లలకు వేసే సాంబ్రాణితో కూడా దోమలను నివారించవచ్చని నిపుణులు పేర్కొంటున్నారు. అరోమాల్యాంప్స్‌లో సాంబ్రాణి, కర్పూరం సహా వేప నూనె, వేసి పెట్టుకుంటే దోమల బెడద ఉండదని చెబుతున్నారు. పైగా రూమ్​ ప్రెషనర్​గానూ సూట్​ అవుతుందని సూచిస్తున్నారు. వేప నూనె లేకపోతే లెమన్ గ్రాస్ నూనె, యూకలిప్టస్ ఆయిల్, లావెండర్ నూనె ఇలా మిగిలినవి వాడొచ్చని తెలియజేస్తున్నారు.

వేప నూనె : నీమ్​ ఆయిల్​ సహజ క్రిమి సంహారణిగా పనిచేస్తుందని నిపుణులు పేర్కొంటున్నారు. అరలీటర్​​ నీళ్లలో రెండు టీ స్పూన్ల​ వేప నూనె, ఒక టీ స్పూన్​ బేకింగ్​ సోడా వేసి కలిపి స్ప్రే చేస్తే కొద్దిసేపటి తర్వాత దోమలు నశిస్తాయని చెబుతున్నారు.

ష్యూరిటీ లేకుండా "రూ.10 లక్షలు" - "పీఎం విద్యాలక్ష్మి" స్కీం గురించి తెలుసా?

"జీవితంలో ఒక్కసారైనా చార్​ధామ్​ యాత్ర" - 'IRCTC' ఫ్లైట్ జర్నీ ప్లాన్ ఇదే!