మసాలా ఘాటుతో అద్దిరిపోయే "మటన్ దో ప్యాజా" - ఇంట్లోనే ఈజీగా చేసుకోండిలా!

Mutton Do Pyaza : నాన్​వెజ్ వంటకాల్లో మటన్​కు సెపరేట్ ఫ్యాన్ బేస్ ఉంటుంది. దీనితో వివిధ రకాల రెసిపీలు చేస్తుంటారు. అందుకే మీకోసం ఇవాళ ఓ కొత్త రెసిపీని పరిచయం చేస్తున్నాం. అదే మటన్​ దో ప్యాజా. ఇది స్పైసీ స్పైసీగా, కారంకారంగా ఉండి అన్నం, రోటీ, చపాతీ, పులావ్​ ఇలా ఎందులోకైనా నెక్ట్స్ లెవల్​ టేస్ట్​నిస్తుంది. ఇలా ఇంట్లో చేసి పెట్టారంటే ఇంటిల్లిపాదీ ఒక మంచి రెసిపీని తిన్నామనే ఫీలింగ్​ కలుగుతుంది. అలాగే దీని తయారీకి పెద్దగా టైమ్ కూడా పట్టదు. మరి నోరూరించే ఈ మటన్ కర్రీని ఎలా చేయాలో ఇప్పుడు తెలుసుకుందామా?

పసందైన "పనీర్ పాయసం" - ఇంట్లోనే ఇలా తియ్యని వేడుక చేసుకోండి!

మటన్ (Getty Images)

కావాల్సిన పదార్థాలు :

• మటన్ - ఒక కేజీ
• పెరుగు - ఒక కప్పు
• పచ్చిమిర్చి - 6
• ఉల్లిపాయలు - 8
• ఉప్పు - రుచికి సరిపడా
• టమోటా ప్యూరీ - 4 టేబుల్ స్పూన్లు
• అల్లంవెల్లుల్లి పేస్ట్ - 4 స్పూన్లు
• కారం - 2 స్పూన్లు
• ధనియాల పొడి - 4 స్పూన్లు
• పసుపు - 1 స్పూన్
• గరం మసాలా - 1 స్పూన్
• జీలకర్ర పొడి - 1 స్పూన్
• బిర్యానీ ఆకులు - 4
• లవంగాలు - 8
• యాలకులు - 6
• ఆయిల్ - 6 టేబుల్ స్పూన్లు
• దాల్చినచెక్క - 1
• కొత్తిమీర తరుగు - అర కప్పు

ఉల్లిపాయ ముక్కలు (Getty Images)

తయారీ విధానం :

• ముందుగా గిన్నెలో కేజీ మటన్ వేసి శుభ్రంగా కడగాలి. అలాగే ఎనిమిది ఉల్లిపాయలను పెద్ద పెద్ద ముక్కలుగా కట్ చేసుకోవాలి. అలాగే కావాల్సిన పరిమాణంలో కొత్తిమీరను తరిగి ఉంచాలి.
• ఇప్పుడు మ్యారినేట్ కోసం మిక్సింగ్​ బౌల్లో కడిగి పెట్టుకున్న మటన్, రెండు స్పూన్ల కారం వేయాలి. అలాగే కప్పు పెరుగు, ఒక స్పూన్ పసుపు, రెండు స్పూన్ల అల్లంవెల్లుల్లి పేస్ట్ వేసి కలపాలి. అనంతరం మూతపెట్టి 30 నిమిషాల పాటు పక్కనుంచాలి.

మసాలా దినుసులు (Getty Images)

• ఆ తర్వాత స్టవ్ ఆన్ చేసి పాన్​లో ఆరు టేబుల్ స్పూన్ల ఆయిల్ వేయాలి. నూనె వేడైన తర్వాత నాలుగు బిర్యానీ ఆకులు, ఒక దాల్చినచెక్క, ఆరు యాలకులు, ఎనిమిది లవంగాలు వేసి వేయించాలి.
• మసాలా దినుసులు వేగాక కట్ చేసి పెట్టుకున్న ఉల్లిపాయ ముక్కలు యాడ్ చేసి గోల్డెన్ కలర్​ వచ్చేవరకు ఫ్రై చేయాలి. ఆనియన్స్ వేగాక రెండు స్పూన్ల అల్లంవెల్లుల్లి పేస్ట్, ఆరు పచ్చిమిర్చి, నాలుగు టేబుల్ స్పూన్ల టమోటా ప్యూరీ వేసి బాగా మిక్స్ చేయాలి.
• అనంతరం మంటను మీడియం ఫ్లేమ్​లో ఉంచి మ్యారినేట్ చేసుకున్న మటన్ మిశ్రమం యాడ్ చేసి ఆరు నిమిషాల పాటు కలుపుతూ వేగనివ్వాలి.

పెరుగు (Getty Images)

• ఆరు నిమిషాల అనంతరం ఒక స్పూన్ జీలకర్ర పొడి, నాలుగు స్పూన్ల ధనియాల పొడి, రుచికి సరిపడా ఉప్పు, తగినన్ని నీళ్లు పోసి కలపాలి. అనంతరం మూతపెట్టి ఉడికించాలి.
• ఈ మిశ్రమం చక్కగా ఉడికాక కట్ చేసి పెట్టుకున్న ఉల్లిపాయ ముక్కలు వేసి మూడు నిమిషాల పాటు ఉడకనివ్వాలి. 3 నిమిషాల తర్వాత ఒక స్పూన్ గరం మసాలా, అర కప్పు కొత్తిమీర తరుగు యాడ్ చేసి మిక్స్ చేసి స్టవ్ ఆఫ్ చేసుకోవాలి.

పచ్చిమిర్చి (Getty Images)

• అంతే మటన్ దో ప్యాజా సిద్ధంగా ఉంటుంది!
• ఈ కర్రీ వేడివేడి అన్నంతో పాటు నాన్​, కుల్చా, రోటీల్లోకి అద్దిరిపోతుంది.

చింతపండు లేకుండానే "చేపల పులుసు" - ఇలా చేసి తింటే జిందగీ ఖుష్ అయిపోద్ది!

కరకరలాడే "రవ్వ మురుకులు" - తక్కువ పదార్థాలతో అప్పటికప్పుడు రెడీ!