తియ్యగా, కారంగా "బనానా బన్స్​" - బెలూన్ల మాదిరి పొంగుతాయి - టేస్ట్​ గురించి మాటల్లేవ్​!

Mangalore Buns Recipe: ‪తక్కువ ఖర్చులో, సీజన్​తో సంబంధం లేకుండా లభించే పండ్లు అంటే అరటిపండ్లు మాత్రమే. వీటిని పిల్లలు, పెద్దలు అనే తేడా లేకుండా అందరూ చాలా అంటే చాలా ఇష్టంగా తింటుంటారు. నేరుగా తినడం ఇష్టం లేని వారు మిల్క్​షేక్​ చేసుకుని తాగుతుంటారు. అయితే, అరటిపండ్లతో స్మూతీలు మాత్రమే కాకుండా కమ్మని బన్స్​ కూడా చేసుకోవచ్చు. ఇవి కర్నాటక స్పెషల్​ అని చెప్పొచ్చు. తయారు చేసుకోవడం చాలా సులువు. ఈవెనింగ్​ స్నాక్​గా, ఇంటికి చుట్టాలు వచ్చినప్పుడు వీటిని అప్పటికప్పుడు తయారు చేసి ఇవ్వొచ్చు. మరి, లేట్​ చేయకుండా తియ్యగా, ఉప్పగా ఉండే బనానా బన్స్​ ఎలా చేసుకోవాలో చూసేయండి.

అరటి పండ్లు (Getty Images)

కావాల్సిన పదార్థాలు:

• పండిన అరటి పండ్లు - 3
• బేకింగ్​ సోడా - పావు టీస్పూన్​
• ఉప్పు - రుచికి సరిపడా
• పంచదార - 1 టీస్పూన్​
• గోధుమపిండి - రెండు కప్పులు
• జీలకర్ర - 1 టీస్పూన్​
• నూనె - 1 టేబుల్​ స్పూన్లు

గోధుమపిండి (Getty Images)

తయారీ విధానం :

• పండిన అరటి తొక్కలు తీసేసి పండ్లను మిక్సింగ్​ బౌల్​లోకి వేసి వీలైనంత మెత్తగా మెదుపుకోవాలి.
• అందులోకి ఉప్పు, పంచదార, బేకింగ్​ సోడా వేసి పలుకులు లేకుండా క్రీమ్​ మాదిరి కలుపుకోవాలి.
• అరటిపండు గుజ్జులోకి గోధుమపిండి, జీలకర్ర, నూనె వేసి అంతా కలిసేలా సాఫ్ట్​ చపాతీ ముద్ద మాదిరి కలుపుకోవాలి.

పంచదార (Getty Images)

• ఇలా కలుపుకున్న పిండిపై లైట్​గా ఆయిల్ అప్లై చేసి మూత పెట్టి సుమారు మూడు లేదా నాలుగు గంటల పాటు పక్కన పెట్టుకోవాలి.
• పిండి నానిన తర్వాత మూత తీసి మరొక్కసారి కలిపి నిమ్మకాయ సైజ్​లో ఉండలుగా చేసుకోవాలి.
• స్టవ్​ ఆన్​ చేసి కడాయి పెట్టి డీప్​ఫ్రైకి సరిపడా నూనె పోసి వేడి చేసుకోవాలి.
• ఈలోపు చపాతీ పీట మీద లైట్​గా నూనె అప్లై చేసి ఓ ఉండను కర్రతో రోల్​ చేసుకోవాలి. అయితే వీటిని మరీ పల్చగా కాకుండా కాస్త మందంగానే రోల్​ చేసుకోవాలి.

జీలకర్ర (Getty Images)

• ఇలా ప్రిపేర్​ చేసుకున్న పూరీని కాగుతున్న నూనెలో వేసి హై-ఫ్లేమ్​లోనే కాలనివ్వాలి.
• పూరీ పొంగుతున్నప్పుడు గరిటెతో లైట్​గా ప్రెస్​ చేసుకుంటూ కాల్చాలి. పూరీ ఓవైపు కాలినాక రెండో వైపు తిప్పి కాల్చాలి. ఇలా రెండు వైపులా పొంగి గోల్డెన్​ బ్రౌన్​ కలర్​లోకి మారినాక తీసి ప్లేట్​లోకి వేసుకోవాలి.
• ఇలా ఒక్కొక్క ఉండను పూరీ సైజ్​లో రోల్​ చేసుకుని నూనెలో వేసి కాల్చుకోవాలి. ఈ విధంగా తయారు చేసుకున్న వాటిని వేడివేడిగా ఏదైనా చట్నీతో కలిపి సర్వ్​ చేసుకుంటే ఎంతో టేస్టీగా ఉండే బనానా బన్స్​ రెడీ. నచ్చితే మీరూ ట్రై చేయండి.

బనానా బన్స్​ (ETV Bharat)

చిట్కాలు :

• ఈ రెసిపీ కోసం మరీ పచ్చివి, మరీ పండినవి కాకుండా మీడియం సైజ్​లో పండినవి తీసుకోండి. ఒకవేళ మీకు పండిన అరటిపండ్లు అయినా ప్రాబ్లమ్​ లేదనుకుంటే వాటిని యూజ్​ చేసుకున్నా సరిపోతుంది.
• అరటి పండ్లను బాగా మెత్తగా చేసుకోవాలి. ఎలాంటి పలుకులూ లేకుండా చూసుకోవాలి. అయితే మెత్తగా రావాలని మిక్సీలో వేసి గ్రైండ్​ చేస్తే సరిగ్గా రావు. చేతితో మెదిపితేనే బన్స్ మరింత సాఫ్ట్‌గా వస్తాయి.
• గోధుమపిండిని పైన చెప్పిన కొలత ప్రకారం కాకుండా అరటి పండు గుజ్జులోని తేమను బట్టి పెంచి లేదా తగ్గించి తీసుకోవచ్చు.
• వీటిని కాల్చుకునేటప్పుడు నూనె బాగా కాగి ఉండాలి. అలాగే వీటిని హై-ఫ్లేమ్​లో ఉంచి రెండు వైపులా కాల్చుకోవాలి.
• పూరీలు ఏమాత్రం పల్చగా చేసినా, నూనె సరిగ్గా కాగకపోయినా పర్ఫెక్ట్​గా పొంగవు. పైగా ఆయిల్​ పీల్చుకుంటాయి.

బ్రేక్​ఫాస్ట్​లోకి అద్దిరిపోయే "సేమియా పులిహోర" - పావుగంటలోనే రెడీ! - టేస్ట్ సూపర్!

సంక్రాంతి స్పెషల్ : జొన్నపిండి "రిబ్బన్ పకోడీ" - తక్కువ నూనెతోనే కరకరలాడిపోద్ది!