అద్దిరిపోయే "చికెన్-గోంగూర బిర్యానీ" - ఇలా ప్రిపేర్ చేసుకోండి!

Gongura Biryani : బిర్యానీ అనగానే అందరికీ గుర్తొచ్చేది మసాలాల ఘుమఘుమలే. మెత్తని మటన్, చికెన్ పీసులు మనసును ఊరిస్తాయి. అయితే, ఈ సారి డిఫరెంట్​గా పుల్లపుల్లగా, కారంకారంగా ఉండే సరికొత్త బిర్యానీ రెసిపీని ట్రై చేయండి. అదే గోంగూర బిర్యానీ. పులుపును ఇష్టపడే ఫుడ్ లవర్స్​ కి ఇది సూపర్ ఆప్షన్. బాస్మతీ బియ్యం, గోంగూర మిశ్రమంతో కలిపి ప్రిపేర్ చేసే ఈ వంటకం విందు భోజనాన్ని తలపిస్తుందంటే నమ్ండి! మరి, ఈ రుచికరమైన బిర్యానీ ఇంట్లోనే ఎలా ప్రిపేర్ చేసుకోవాలో ఇప్పుడు తెలుసుకుందాం.

కావలసిన పదార్థాలు :

• బాస్మతి బియ్యం - 2 కప్పులు
• గోంగూర ఆకులు - 2 కప్పులు
• చికెన్ - అరకేజీ
• ఉల్లిపాయలు - పెద్దవి 2
• పచ్చిమిర్చి - నాలుగైదు
• అల్లం వెల్లుల్లి పేస్టు - 1 టేబుల్ స్పూన్
• లవంగాలు - ఐదారు
• యాలకులు - ఐదారు
• దాల్చినచెక్క - 3 ఇంచులు
• బిర్యానీ ఆకు - ఒకటి
• నెయ్యి - 2 స్పూన్లు
• కారం - తగినంత
• పసుపు - ఒక స్పూన్
• ఉప్పు - రుచికి తగినంత
• పుదీనా - ఒక కట్ట
• కొత్తిమీర - ఒక కట్ట

అసలైన "ఆవకాయ బిర్యానీ" - ఘుమఘుమలకే నోట్లో నీళ్లు ఊరిపోతాయ్!

తయారీ విధానం :

• ముందుగా బాస్మతి రైస్ శుభ్రం చేసుకొని అరగంట పాటు నానబెట్టుకోవాలి
• ఆ తర్వాత ఉల్లిపాయలను నిలువుగా కట్ చేసి పెట్టుకోవాలి
• ముందుగా ఒక బాణాలిలో కొద్దిగా నూనె వేసి, పచ్చిమిర్చి, గోంగూర ఆకులను ఫ్రై చేయాలి.
• ఆకులు మగ్గిన తర్వాత వాటిని చల్లార్చి, మెత్తని పేస్టులా గ్రైండ్ చేసి పక్కన పెట్టుకోవాలి.
• ఇప్పుడు మరో గిన్నెలో రైస్ కోసం ఎసరు సిద్ధం చేయాలి. తగినన్ని నీళ్లు పోసి బిర్యానీ దినుసులు, కొద్దిగా ఉప్పు వేసి మరిగించాలి.
• మరిగిన తర్వాత అందులో నానబెట్టిన బియ్యం వేసి 70 % వరకు ఉడికించుకోవాలి.
• రైస్ ఉడికేలోగా చికెన్ ప్రిపేర్ చేసుకోవాలి. మరో స్టౌ మీద అడుగు మందంగా ఉన్న పాత్రలో నూనె, నెయ్యి వేసి వేడయ్యాక ఉల్లిపాయ ముక్కలు వేసి ఫ్రై చేయాలి.
• ఆనియన్స్ గోల్డెన్ బ్రౌన్ కలర్‌లోకి వచ్చాక అల్లం వెల్లుల్లి పేస్ట్ వేసి పచ్చివాసన పోయేదాకా ఫ్రై చేసుకోవాలి
• ఇప్పుడు చికెన్ వేసి, ఐదారు నిమిషాలు మగ్గించుకోవాలి.
• తర్వాత పసుపు, కారం, ఉప్పు వేసి బాగా కలపాలి. మరికాసేపు ఉడికించుకోవాలి.
• ముక్కలు సగం ఉడికిన తర్వాత, పక్కన పెట్టుకున్న గోంగూర పేస్ట్ వేసి బాగా కలపాలి.
• నూనె పైకి తేలేంత వరకు ఉడికించాలి. దీనివల్ల గోంగూర పులుపు చికెన్ ముక్కలకు బాగా పడుతుంది.
• ఈ లోగా అన్నం 70 శాతం ఉడికిపోతుంది. ఇప్పుడు ఈ మిశ్రమం పైన ఉడికించిన అన్నం ఒక పొర మాదిరిగా వేసుకోవాలి
• పైన కొత్తిమీర, పుదీనా, ఫ్రై చేసుకున్న ఉల్లిపాయలు , కొద్దిగా నెయ్యి చల్లుకోవాలి
• తర్వాత మూత పెట్టి ఆవిరి బయటకు పోకుండా 10 నుంచి 15 నిమిషాల పాటు చిన్న మంట మీద దమ్ చేయాలి.
• అంతే, అద్దిరిపోయే గోంగూర బిర్యానీ సిద్ధమైపోతుంది. మీకు నచ్చితే తప్పకుండా ట్రై చేయండి
• చిట్కాలు:
• గోంగూర మరీ పుల్లగా ఉంటే, కాస్త తగ్గడానికి కొద్దిగా ధనియాల పొడి చల్లుకోవచ్చు. లేదంటే గరం మసాలా మోతాదు పెంచండి.
• బిర్యానీకి ఎర్ర గోంగూర వాడితే మరింత రుచికరంగా ఉంటుంది
• ఈ గోంగూర బిర్యానీని ఉల్లిపాయ పెరుగు పచ్చడితో తిన్నారంటే అదుర్స్ అనిపిస్తుంది.

వావ్ అనిపించే "గోంగూర అన్నం" - ముద్ద ముద్దలో మజా!